Read abua Ạsuor 42 Bible Online

Ạsuor 42 - abua bible

Ạsuor 42

¹Ẹnaan, ịdipho ẹephua ạmuum asikol rẹpu ghan bọ ọya ọnuen, ịdipho kụ ẹdi ẹephua ạna rẹpu ghan uwaloor ạmi.

²Ẹephua ạna rẹpu ghan uwaloor ạmi, nạ kụ Ẹnaan phọ ẹpe rémugh ghan bọ. Ạpur amem kụ ẹdi mị katu bọ aganana egbodo ạna?

³Ootaany rꞌaḍughul mị amoghi kụ izin bịn kụ eḍien ạmi; oomo amem ạbumulogh-ḍien ạmi upuru ghan ịmi, “Ẹnaan phọ ạna edi ẹghen?”

⁴Oḅiom ạmi ạsalaany mem dị mị ạatughian igbaany, mem ẹyaal dị mị ạghi rꞌaḍita phọ sịphe otu Ẹnaan phọ. Mị kụ uḍiemiom ghan bụphe rọmoor bọ koboom Ọmoogh-we phọ.

⁵Uwaloor ạmi, eeghe kụ iḍighi kụ nạ akururu bọ ịduon phọ, eeghe kụ rẹeḅaghami nyịna? Mị aḍuom Ọmoogh-we phọ ologhi kụ mị kạḅile kẹn ni aboom nyọdi ọpelia phọ ạmi rꞌẸnaan phọ ạmi.

⁶Uwaloor ạmi mạḍua loor ạmi, kụ iḍighi kụ mị odi ẹphen ade phọ ạJodan rꞌẹphen Eegum ạHermon rꞌEegum ạMizar rạatughian ghan nyịna.

⁷Aḍigher ẹmagh ḍigher, loor ẹḍogh okiilian ạmuum mọ ạna. Oomo arookpoogh oologh phọ ạna miikpereghiom ịmi.

⁸Ọmoogh-we phọ uḍeenaan ịmi ẹphomoghian phọ ọdi rémuneen ghan bọ mem ootaany, pịdi mị ạmoor ḍụor ḍughul, ạaḅereghi Ẹnaan phọ ẹmoogh bọ ghuḍum mọ ạmi.

⁹Mị kạḅeni Ẹnaan aḍighiigh phọ ạmi mọ, “Uḍighi ika kụ nạ uwula bọ ịmi, kụ mị odimom ghan bọ rꞌọto loor ịgbiphoghom ạbumulogh-ḍien phọ ạmi?”

¹⁰Ạrigilaam ạbumulogh-ḍien phọ ạmi mịlhogh ịmi ẹgha, loor ịdi bịdi rupuru ghan ịmi oomo aḍio mọ, “Ẹnaan phọ ạna edi ẹghen?”

¹¹Uwaloor ạmi, eeghe kụ iḍighi kụ nạ akururu bọ ịduon phọ, eeghe kụ rẹeḅaghami nyịna? Mị aḍuom Ọmoogh-we phọ ologhi kụ mị kạḅile kẹn ni aboom nyọdi ọpelia phọ ạmi rꞌẸnaan phọ ạmi.