Read abua Ạsuor 45 Bible Online

Ạsuor 45 - abua bible

Ạsuor 45

¹Ịma ịitughian emuza ologhi ạmi, kụ mị ạtu bọ ạlogh ḍụor phọ ạḍien ọmooraan ọdaam mọ. Anem ạmi ẹkigh ịdipho ọgeom oye lọ ạmaar ịgeeghi.

²Nạ kụ ooḅi dị apu oomo awe; ogbul ịidoronhu ạna ghụsan ọghaaphom ghan ọghaaph, kụ iḍighi kụ Ẹnaan mẹseph nyịna kꞌagee-pọ.

³Ḅạnaam elhool ẹgham mọ ạna. Nạ ogbogh ọdaam dị ạkuan ni ạpataghan.

⁴Ḍighom ạsu rughuenian phọ ạna kụ aghiilom rꞌedughom loor ọgba ghan igey, rꞌoogbo iiḅi ịiruen, Ạḍighaagh iphelegbe phọ ạna keḍighi ịdi nạ kạkpar apu ẹpomoghian phọ.

⁵Ịkpina phọ ạna etoph ni kụ mekpurion bụphe ọlogh bọ ḍien ọdaam mọ, ḅịle oomo areelhe phọ momeleghu ude ruwol ạna.

⁶Ẹnaan, ạgada ọdaam ẹmha phọ ạna kạtol li kꞌagee-pọ. Ịkpara ọdaam ẹmha phọ ạna ịkpara iiḅi ịiruen.

⁷Nạ ạpomoghian ruukuan kụ ạsipioghom ekia ni nyịna. Pọ kụ ịyaar phọ Ẹnaan, Ẹnaan phọ ạna, mẹsaḅar bọ nyịna ogbul nyịna elho ọḅaal ologhi dị epu nyẹpe iigbo phọ ạna.

⁸Oomo arukpe phọ ạna repur ghan eḍu amaa rꞌalos rꞌakasia. Ạbuo areephegh ropheghenaan nyịna ephegh ọḅaal ologhi sịphe ogiga dị oselemiom oḍu ọoma.

⁹Ogbo arisina ạnmanyaan ịsiphe ogiga phọ ạnmanyaan ạbudaam odimom aani ni, kụ sịphe elhiom ạgada ọdaam ẹmha phọ ạna ukueni-ạnir phọ ạmeera, aanmenan ịnme ịma agol dị ọsighe ẹpe Ofir.

¹⁰Ọnyani ọdaam dị rakeel kꞌolhom, ler rụru esi ịphen mị rạḅem bọ. Bula we phọ ạna rꞌọto kꞌanyina,

¹¹Ẹnighe ạna kụ keḍighi ịdi ọdaam mọ kạwa nyịna; ọdi uwotu ạna. Esi ịduon phọ nạ ạmoogh ọnaghanan ọdi.

¹²Awe phọ aTaya koruom ni nyịna inmo; awe dị ọmoogh ẹelha kọwa ni ḍịḅeeraan esi ạna.

¹³Ọkpanyan ọdaam mọ, esi ọḍagha ílho; ibura phọ ọdi oḍighinom gol.

¹⁴Kọsighe ni ọnyani dị ọmaar oonmenemi otorori osiemi kꞌọdaam mọ; arisina phọ iigbo phọ ọdi kụ kotorori nyọdi.

¹⁵Ọḅaal ologhi rꞌiboh kụ ẹdi bịdi kọpam kụ oḍighom sịphe otu ọdaam mọ.

¹⁶Ạnmuny ạna kụ kọtol sịdol ạburude phọ ạna, ḅịle nạ kạsighe bịdi ạtolomi dọl ịtooghi sịen aḅirini phọ.

¹⁷Kụ mị aḍighi ịdi aḍien ạna képe oghiil atum oghiil, ḅịle awe koboom ghan ni nyịna ọrugh atum ọrugh.