Read abua Ạsuor 49 Bible Online

Ạsuor 49 - abua bible

Ạsuor 49

¹Weye oomo areelhe, ịnaghan ịphen phọ. Nyina ạbuen erugh bọ sịen aḅirini phọ, iler rụru:

²bụbam rꞌabugbogh, rạalha rꞌarukulom, oye úgbi.

³Ọnhu ạmi kạkaaph ikpo ọnhu olegheri ịyaar, kụ ịitughian ologhi phọ ạmi ịlo ọnaghan ạḍughum.

⁴Mị kazuumaam ạnaghan sidogh, kụ mị ạgba ghan ẹmhu asidogh phọ mem lọ mị rati ọne.

⁵Keḍighi ika kụ mị akiilaan bọ ịkaraph asiḍughul-otu mem dị ạbumulogh-ḍien phọ ạmi uko ịmi okitonom,

⁶bụphe oḍuom bọ ologhi ẹelha phọ ạbidi kụ rootumaam bọ ḍigbo phọ ạbidi?

⁷Ọnyo ạbidi lọ katue ạtagharan loor ọdi ólho; ọlo katue ạkpe Ẹnaan ikpoki dị ẹman ghuḍum mọ ọdi ólho,

⁸ịdi eḍighi bọ aḍighi ọtagharan aghuḍum oye ẹbugh ẹpughan; ịpe ọdi kạkpe bọ kétue ẹgbaanyan

⁹ọsighe ọdi sịphe oḍi phọ, oḍighi ịlo ọdi kạtol kꞌagee-pọ.

¹⁰Tọrobo oye rạmiin ghan ni ịdi ghạlamo ạbuo olegheri ịyaar romugh ghan ni ịdipho ạbuo elologhi phọ rꞌighiil awe phọ romugh ghan bọ. Kọsar ẹelha phọ ạbidi ọwilenaan ẹemara ẹemara ạbidi.

¹¹Ariiḍi ạbidi kụ amarugh ạbidi kꞌagee-pọ; sịphe kụ ẹdi bịdi kọtol oghiil atum oghiil, ghạlamo ịdipho bịdi mọmoogh ghan bọ ni rere.

¹²Oye ólho, ạbugh bụgh, dị akpetenaan ḍuugh; ọdi kamugh ni ịdipho ịnam remugh ghan bọ.

¹³Ịmiin aani ịdi remitenaan ghan bụphe oḍuom bọ ologhi siloor ạbidi, ọda ạbuphe ọyigh bọ kụ ropogh ghan ẹelha phọ ạbidi:

¹⁴mọḅogh bịdi ọngo ḍuugh ịdipho iyool-ịga, ḅịle aḍuugh kụ keḍighi opoghom ạbidi. Bụo aruukuan phọ kọkpar ri opu bịdi, ịdipho aruzu phọ ạbidi kẹnuun bọ ẹḅor, sịphe ọmar iḍim mọ ẹkelan bọ simarugh phọ ạbidi.

¹⁵Kụ ọlo Ẹnaan kẹtagharan ni uwaloor phọ ạmi. Kụ ọdi kụsighe ni ịmi esi ịikpo aḍuugh.

¹⁶Ologhi ạna kụ́pu mem dị oye ạmoogh ẹelha, mem dị aruphua ọdi ẹbugh kẹn iboom.

¹⁷Mem dị ọdi amugh, rạ́pam rꞌẹnum ịyaar kagheelom. Ẹelha phọ ọdi rẹ́daph nyọdi sịphe oḍi phọ.

¹⁸Mem mọ ọpo ọdi odi bọ, rạsephian ghan ẹkpar-aloor ọdi, awe rootumeni ghan nyọdi loor esi dị ọdi mạkpar apu,

¹⁹ọdi kạḅophoghan ni bụrude phọ ọdi akeel ẹpe ọmar iḍim, ẹpe bịdi ẹphalaḅaal kọ́miin bọ.

²⁰Igbogh oye kétue ẹpel nyọdi ẹsighe esi aḍuugh; ọdi kamugh aani ni ịdipho ịnam remugh ghan bọ.