Read abua Ạsuor 50 Bible Online

Ạsuor 50 - abua bible

Ạsuor 50

¹Ọmoogh-we Ẹnaan Oomo Ịikpo phọ ạkaaph; ạmagh oomo areelhe aḅirini phọ emiigh kꞌẹpe erumuḍio phọ remite ghan bọ kụ esiemi ẹpe erumuḍio phọ remeel ghan bọ.

²Ẹnaan edi ẹpe Zạyon kụ rẹmu; ẹmha dị eseleman esi ẹnighe.

³Ẹnaan phọ ayira retu, ọdi ráḅoorian ghan; ạnian ọnuza edi ghisigh ọdi, kụ oghim ako nyọdi akitonom.

⁴Ọdi ạmagh kẹ phọ rꞌade phọ ạmeremi enye mọ ọmiin ịpe ọno kaagbonaan bọ ịiruen we phọ ọno.

⁵Kụ ạḅeni mọ, “Iikpomoghi we omeeraam mọ kꞌạmi, bụphe rꞌạmi oghiran bọ ịyo phọ sịphe rọpighiron ghan bọ ẹkia phọ.”

⁶Ạsike phọ egbeel mọ Ẹnaan eseleman ni, mọ ọdi rꞌaloor kụ osophom ọoruen.

⁷“Iler rụru, we ạmi, mị kạkaaph; mị kạgba ịkaraph anyina Ịzirel.

⁸Mị ụ́tuan ịlo ạrikia phọ anyina kụ rạle bọ; mụghumo ịlo ịphophoghineen ạrikia phọ nyina riruom ghan bọ ịmi oomo amem.

⁹Mị ụ́wa ilephiri ạsinam mꞌarekpe sịphe aḍita ịga phọ anyina.

¹⁰Oomo ịnam mọ edi bọ ẹpe ạruukpua phọ ịlo ạmi, rꞌạsinam mọ edi bọ ẹpe ạsimuunir aroogbolom mọ.

¹¹Oomo ịnun eḍum mọ ịlo ạmi, rꞌoomo ịpe ẹmoogh bọ ghuḍum ẹpe aruuḍum mọ.

¹²“Eru mạar dị ọkoony rusiph ịmi, mị inyina mípuru ẹlo olhe; aḅirini phọ rꞌoomo ạraraar phọ edi bọ sịen aḅirini phọ ịlo ạmi.

¹³Mịna rạba ghan ni iphulupul ilephiri ạsinam, mꞌọphughol ịḅaal ạrutu-ịga ḍụghum?

¹⁴Oboom ghan Ẹnaan phọ bịn kụ eru rịkia dị nyina kẹpinyon ghan. Ẹḅile ẹngo ghan Egbogh Ẹnaan oomo phọ ịpe nyina eguanaan bọ.

¹⁵Ụmagh ghan ịmi mem lọ nạ odi esi ịiḅaghami. Mị kạphel li nyịna ạsighe kụ nạ uboom ghan ịmi.”

¹⁶Kụ ọlo Ọmoogh-we phọ rapuru ghan bụo ạsipioghom mọ mọ, “Nyina ipu ghan rẹḅem ghan iilogh phọ ạmi ịlo oḍighinom eeghe? Nyina epu ghan rẹkaaph aani ghan ịlo ịyo phọ ạmi oḍighinom eeghe?

¹⁷Nyina ekel dị mị kiilemi inyina, ikpo ọnhu ọghaaph phọ ạmi nyina mẹgumom ọman.

¹⁸Nạ aḍighi ọyaghiri ạtorobo ọḅa dị nạ ạmiin; abulhiom ẹmha rꞌạna kụ relian ghan.

¹⁹“Ọḅemogh ghan ịkaraph bịn kụ edi ghan ọnhu ạna; anem mọ ạna etoph ọghaaph ghan ọkpe bịn.

²⁰Nạ rọrol ude bịn pọ nạ kạgba ạpue umor ạna; nạ rạgba ghan bịn kạphue mọony dị onhiin ạna kụ ạmar.

²¹Nạ raḍighi yogh ghan ịphen phọ kụ mị aḅoronom ghan nyịna; kụ nạ ragbiom ghan mọ mị ạghigh nyịna. Kụ ọlo nyịidipho mị ạkpalham nyịna ạḅile agananami ọghaaph phọ ạḅeni nyịna.

²²“Nyina ạbuphe mewula bọ Ẹnaan, ịnaghan ịphen phọ nyịidipho, ọbo mị kiphiemi ghan bọ inyina kụ oye dị kịphel inyina kạ́tol.

²³Ọngo ghan ạḍiseph kụ ẹkia dị righueni ghan ịmi. Esi ọgba igey, mị kạpel li oomo ạbuphe ụnaghanan bọ ịmi.”