Read abua Ạsuor 51 Bible Online

Ạsuor 51 - abua bible

Ạsuor 51

¹Ụnma ịmi ighirigiir, Ẹnaan, loor esi ẹphomoghian phọ ạna rémuneen ghan bọ. Esi oboom ọnma ighirigiir phọ ạna gbuurogh ạsighe ịkaraph ạmi.

²Tootol ạsighe oomo ịkaraph ạmi kụ aḍighi ịdi mị kạḅaal esi ạsipioghom mọ ạmi.

³Mị alegheri ni ọpioman phọ ạmi; mị aloghoma ni ịkaraph phọ ạmi oomo amem.

⁴Mị maḍighi ịkaraph esi ạna; ạḅile aḍighi ịdi eeph ghisigh ạna. Loor esi ịduon phọ nạ ạmoogh ni elhiom osoph ọoruen ọngo ạmi; nạ ọ́pioman oghel ạmi.

⁵Mị oḍighinom ịkaraph kꞌaḍio phọ ụmar bọ ịmi; kꞌamem mọ uumor bọ ịmi, mị aḍighi ni oḍighinom ịkaraph.

⁶Ogeny ologhi rꞌọgba igeny kụ ịdi nạ rạwa; muzeḍiom ologhi phọ ạmi olegheri ịyaar phọ ạna.

⁷Sịghiogh ịkaraph phọ ạmi bịn mị kạḅaal li; uutol ịmi bịn mị kạḅaal apu ibikpo.

⁸Ḍighi ịdi mị kạnaghan ẹḍogh iboh rꞌọḅaal ologhi; nạ muwunighi ni ịmi ạḅile uugurion ịmi, kụ ọlo mị kạḅile ni ạmoogh iboh.

⁹Kạ́miin sịpioghom mọ ạmi kụ agbuurogh oomo ịkaraph ạmi ạsighe.

¹⁰Lẹm ẹser-sẹr ekpom ạlogh loor ạmi, Ẹnaan, kụ ạlogh omoom uwaloor esi ạmi.

¹¹Kúroph ịmi ạḅitonaan sịphe arisigh phọ ạna; kạ́sighe ooḅi uwaloor phọ ạna loor ạmi.

¹²Ḅulemi ụngo ịmi iboh phọ ẹḍua bọ sịphe ọphel-otene phọ ạna kụ eru, kụ aḍighi ịdi mị kaseere ologhi ọnaghanan ạna.

¹³Bịn kụ mị ạtughemi buḍighinom ịkaraph ịto phọ ạna, kụ bịdi okiton olegheri aani nyịna.

¹⁴Meera mị ụtol, Ẹnaan, ạḅile ụphel ịmi atene, kụ mị agbeelom ruukuan phọ ạna rꞌọḅaal ologhi.

¹⁵Ụlhoghonaan ịmi ḍịghaagh mị ụḅa, Ọmoogh-we, bịn mị kaaseeny ni nyịna.

¹⁶Nạ ọ́wa rạraar aghuḍum, ọbo mị muḍighi ni; ạrikia lọ ọsu nịan nyịna ị́ḅeeraan.

¹⁷Ịyaar aghuḍum ẹlo ạmi uwaloor dị asooromi loor, Ẹnaan; nạ kákel ekpom dị ekiton kụ esooromi loor.

¹⁸Ẹnaan, nmạ ighirigiir Zạyon kụ ạphel nyọdi; ḅịle ạmeremi iikpe oghoony phọ aJeruselem.

¹⁹Kụ nạ agbi ọmoogh ạḍiḅeeraan rꞌọkar ạrikia rꞌịsueneen ạrikia mọ ayoor, kụ oḍighinom ilephiri ạsinam ịyaar aghuḍum sịphe enmeny phọ ạna.