Read abua Ạsuor 58 Bible Online

Ạsuor 58 - abua bible

Ạsuor 58

¹Nyina phọ ẹdaaghi bọ resoph ghan ni ogey ọoruen ḍụghum? Nyina repoghom ghan ni oomo awe ḍiniin aḍien ḍụghum?

²Eeye. Nyina rẹetughian ghan ịkaraph dị nyina keḍighi bịn kụ esereghi sighiton sịen ade phọ.

³Ịkaraph awe roḍighi ghan ịdi eeph oomo aghuḍum mọ ạbidi; bịdi rọgba ghan ọkpe kꞌaḍio phọ ọmar bọ bịdi.

⁴Bịdi ọkigh ịkaraph ạraraar dị rụnhu ạbidi ịkaraph ịghor kụ imuza; bịdi oḅulughian reḅeri ạbidi kụ ọḅaaghaph ịdipho ophugh,

⁵dị rạ́naghan ghan ẹḍogh opiliom ẹkaraph-ịyaar rꞌạḍimagh oye ịiḍaany.

⁶Ḅonyon rạlhaal ilhom ạnam-dịka phọ ịphen, Ẹnaan.

⁷Ḍighi ịdi bịdi kọḍuaghu ịdipho ạmuum dị ramoopha kạḍuaghu. Ḍighi ịdi kọogbighi mụdi ạroogho lọ odi eten lọ rotelhe ghan.

⁸Ḍighi ịdi bịdi kọkigh ịghoony dị ẹgbo eten mugidagida ạmuum. Ḍighi ịdi bịdi kọtol mụdi ọony aḍipugh dị amugh kụ ụ́miin ḍịḅaal.

⁹Tụtu bịdi rolegheri, mọsam bịdi ịdipho ạtugbiir ạroogho; esi ọokpara ophin-ologhi ọdi, Ẹnaan kepula bịdi ẹsighiogh mem dị bịdi odi ni ropooghu.

¹⁰Awe aruukuan phọ kọmoogh ọḅaal ologhi mem dị bịdi ọmiin dị ọliom buḍighinom ịkaraph; bịdi kootola ruwol ạbidi ịḅaal ạbuo ạsipioghom mọ.

¹¹Awe kọḅem mọ, “Ọkar agey, roonmo ghan ni ruunmo weye aruukuan. Ọkar agey, Ẹnaan edi ni dị resoph ghan ọoruen aḅirini phọ.”