Read abua Ạsuor 65 Bible Online

Ạsuor 65 - abua bible

Ạsuor 65

¹Ẹnaan, ẹkpe ni dị yoor kooseeny nyịna sịphe Zạyon Sịphe kụ ẹdi yoor oḍighi ịpe yoor oguanaan bọ,

²ịdi eḍighi bọ nạ rạnaghanan ghan ni ịiḅereghi. Awe bụo ekpisi rꞌekpisi kotu kꞌạna,

³loor esi ịkaraph ạbidi. Ạsipioman ayoor ịphue ni iyoor, kụ ọlo nạ ạsar ạbilenaan.

⁴Ọḅaal ologhi odianaan bụphe nạ ạsaḅar bọ, bụphe nạ ạsighe bọ mọ oru ọrol sịphe otu eegu phọ ạna. Kịgbaanyan ni iyoor ẹeḍiom ịsiphe otu phọ ạna, oomo igey ạraraar Otu Iigbia phọ ạna.

⁵Nạ rụnaghanan ghan iyoor esi ọngo ghan ayoor ọkpar-opu. Kụ nạ raḍighi ghan rạraar ịiḍaany ọphelom ayoor. Awe oomo aḅirini phọ rꞌạbudi odi ẹḅeenyom ạriphiiny phọ oḍuom nyịna ologhi.

⁶Rꞌịnyaam ạna, nạ asereghi rạaḅaraph riisi, aḍeenaan igbogh ịikpo ạna.

⁷Nạ ạpoomi ḍịolho otu-ḅualhe phọ rꞌạḍiaḅa oologh phọ. Nạ aḍighi ịyaar dị eelhe kịrokiro ekpomori ọnhu ạbidi.

⁸Oomo aḅirini odimom rꞌaḍiigu esi iboom ạraraar phọ nạ maḍighi bọ. Iiḍighi phọ ạna emitiom ịlooghi iboh emiigh kꞌeniin eekuna ade phọ kụ esi nyẹri phọ.

⁹Nạ ạmaar ri rapogh de phọ esi oseere ghan ọlophia. Ọlophia phọ ạngo ẹelha rꞌẹnuum iḅeph. Nạ amuzeḍi sikol phọ mụum, nạ ạngo de phọ ịizupha. Ịduon kụ ịdi nạ aḍighi bọ.

¹⁰Nạ ạngo ọlophia dị ạmanam iizo phọ moguphogh bọ kụ ạtophom mụum. Nạ adughiom de phọ mụum kụ aḍighi ịdi ịbam ịizupha phọ kesi.

¹¹Pọ eeghe ịma ibugha dị egeny ẹrolom mọ ạna emitiom! Tọrobo ekpisi lọ nạ ạghi, edughom kụ rẹtol ghan.

¹²Riisi lọ atugey ạroogho asi ịnam emuza, ịigaany aroogbolom mọ iboh kụ edi.

¹³Iizo phọ iyool-ịga kụ imuza; riisi lọ eḍiinyaan ịbiakpa kụ imuza. Tọrotoro ịyaar ẹlo ẹḅile ẹmoor loor esi iboh.