Read abua Ạsuor 68 Bible Online

Ạsuor 68 - abua bible

Ạsuor 68

¹Ẹnaan reḅetenu ghan kụ kạawalami bụmulogh-ḍien ọdi. Bụphe ọlogh bọ nyọdi ḍien rokiil ghan kosuma dị mọkpar opu bịdi.

²Ịdipho ropula ghan bọ mụghi kọwalalami, ịdipho kụ ẹdi nạ kaporogh bịdi ạwalalami; ịdipho oba rạgbo ghan bọ loor ạnian, ịdipho kụ ẹdi ạbukaraph kope egbodo Ẹnaan.

³Kụ ọlo awe aruukuan phọ rọḅaal ologhi kụ oboh risigh ọdi; bịdi rọmoogh ghan iboh kụ kọlo ḍịolho iboh.

⁴Ịmoor sụor ẹngo Ẹnaan, ịmoor eboom ḍien phọ ọdi; iseleminaan eten nyọpo ratelhe ghan bọ ẹdala phọ. Aḍien phọ ọdi — Ọmoogh-we phọ. Ịmoogh ọḅaal ologhi risigh ọdi.

⁵Ẹnaan, ọpo odi ghan bọ ologhi Otu iigbia phọ ọdi, ạmaar ghan rạpam bụnyigo ạnmuny kạḅile ạmaar aphogh rukpukele ạnmariir,

⁶Ọdi ramitiom ghan esi ọrol bụlo otu úlho kạḅile aḍiemiom bụo ikoli ọrol ạdol ẹereegh rꞌibo. Kụ ọlo awe ọḅaar ẹmhu kọtol de lọ awe úlho ghan.

⁷Ẹnaan, mem mọ nạ aḍiemiom bọ we phọ ạna, mem mọ nạ agbiriph bọ erelhe ạḅeeny de ọosaar phọ,

⁸ade phọ iphiigha ni, kụ okuaḍio asereghi ude ọlophia, loor ẹmhu eru Ẹnaan phọ aSainai, eru Ẹnaan phọ Ịzirel.

⁹Nạ uḍighi ịdi ọminighan ọlophia ạloph kụ ạḅile ạasa ḍịgharaghar ade phọ meminenom bọ.

¹⁰Awe phọ ạna oḍighi sịphe dọl ạbidi; esi egeny eḍighinom ịyaar phọ ạna, nạ ạngo rukulom phọ eḍien olhe.

¹¹Ọmoogh-we phọ ạto ạngo, kụ ịbadi ạnmariir oleenye iphiligba phọ:

¹²“Ạbudaam rꞌawe ẹgham ạbidi rosumughu.” Ạnmariir phọ osugha bọ iloghi aruutu phọ udianagh rạraar phọ owum bọ:

¹³ịkaaneen arukuru-ghọzo dị okpoghom silva, dị araphaaph ẹnmana mụdi ogey agol. (Uḍighi ika kụ buniin anyina eeḍikuan bọ rꞌiyool-ịga sịphe arugbogo phọ ḍio ẹgham mọ?)

¹⁴Mem mọ Ẹnaan Oomo Ịikpo phọ ẹewalami bọ bụdaam mọ sịphe Eegum aZalmon, ọdi aḍighi ịdi ibikpo esoor sịphe phọ.

¹⁵Pọ eeghe eboom Eegum ạBasan phọ, eegum ịbadi ịsogolo ariisi!

¹⁶Esi ika kụ nạ ạrol bọ egbogh ẹsogolo esi phọ ạna kụ aphogh ude ịlo ạrigilaam ạnyu eegum phọ Ẹnaan mẹsaḅar bọ ọrol phọ? Ọmoogh-we phọ kạtol li sịphe kꞌagee-pọ.

¹⁷Rꞌịbadi ạsimuunir igbogh arughuugh ẹgham mọ ọdi, Ọmoogh-we phọ ạḍua Sainai aru aḍigh esi iigbia phọ.

¹⁸Ọdi agheel riisi ạnyu kꞌạke, asiphi ịbadi awe ạḍuanam, ạanyi ruunmo rạghaagh awe ọḅaar ẹmhu. Ọmoogh-we Ẹnaan phọ kạtol li sịphe.

¹⁹Iboom Ọmoogh-we phọ, ọpo ratool ghan bọ ịiḅaghami ayira ḍio etum ḍio; ọdi kụ Ẹnaan phọ rịphel ghan bọ iyira.

²⁰Ẹnaan ayira Ẹnaan dị rạpel ghan; ọdi kụ Ọmoogh-we, Ọmoogh-we phọ ayira, ọpo rụtagharan ghan bọ iyira esi aḍuugh.

²¹Ẹnaan kẹmiin ni mọ ọno ạgurogh ni rụmhu ạbumulogh-ḍien ọno, bụphe ọkananaam bọ reten ịkaraph phọ ạbidi.

²²Ọmoogh-we phọ mạḅem, “Mị kạsighe ni ẹpomoghian phọ anyina ẹpe Bạsan aḅulemi; mị kạtophion ni bịdi sịphe aḍigher otu-ḅualhe phọ apune,

²³ẹrol dị nyina ẹguph ogbo ịḅaal ạbidi, ḅịle asuogh anyina ẹlaay ịlo bịdi ketue.”

²⁴Ẹnaan, oomo awe mọmiin ni ekakara erelhe ọkpar opu phọ ạna, mọmiin ịdi ạḍikool awe Ẹnaan, ọdaam ạmi, rọki esi ạdol iigbia phọ ọdi.

²⁵Ạbuo ọmoor sụor phọ odi ghisigh, ạbuo iitia phọ odi ọman, ogbo ạbidi ạnmanyaan dị rọsagh ịsagha kụ odi.

²⁶“Iboom Ẹnaan sịphe ookpomoghan awe phọ ọdi. Iboom Ọmoogh-we phọ, oomo anyina ạnmuny ạnmuny ạJekob.”

²⁷Sịphe awe phọ oru bọ osi, ạbuḅel phọ kụ eghun ạBenjamin, eghun phọ ẹkar bọ eghom; bụdi otum pạ, abuḍiemiom aJuda rꞌaḍita ạbidi, ḅịle rꞌabuḍiemiom ạZebiulon rꞌạNaftalai.

²⁸Ḍeenaan ịikpo phọ ạna, Ẹnaan, ịikpo phọ nạ aghol bọ ẹmhu ayoor aḍighinom

²⁹sịphe Otu Ịiḅereghi phọ ạna ẹpe Jeruselem, esi phọ ạbudaam ọsighe bọ ruunmo oruomonaan bọ nyịna.

³⁰Ḅạamogh weye Ijipt, bụphe ọghigh bọ ilhom ịnam mọ edi bọ loor ikpu phọ; ḅạamogh weye areelhe kịrokiro, bụphe ọghigh bọ ilephiri ạsinam rꞌạnmuny ạbidi, tụtu oomo ạbidi okpuḍughian kụ ọngo nyịna silva ạbidi. Wạawalami oomo awe phọ ạbuphe ạraagham kụ ẹḅeeraan bọ.

³¹Ạruukpaany kọḍua ni Ijipt kụ otu; awe Ẹtiopia kopoophe rạghaagh ạbidi ọoḅereghi Ẹnaan.

³²Ịmoor eboom Ẹnaan, oomo areelhe aḅirini phọ; ịmoor sụor oboomiom Ọmoogh-we phọ,

³³ọpo rakiilom bọ okuaḍio, okuaḍio ageedi phọ. Ịnaghan ịdi ọdi ạlho ḍịolho rꞌegumaguma ẹḍogh.

³⁴Gbeelom ịikpo phọ Ẹnaan; ịikpo phọ ọdi kụ ighoph Ịzirel, igbogh phọ ọdi esi ni okuaḍio phọ.

³⁵Kọsighe eeghe kụ ọtomaam egbogh eegu dị Ẹnaan, Ẹnaan phọ Ịzirel, ẹpham mem dị ọdi amite dọl iigbia phọ ọdi? Ọdi ạngo ịnyaam rꞌịikpo we phọ ọdi. Iboom Ẹnaan!