Read abua Ạsuor 69 Bible Online

Ạsuor 69 - abua bible

Ạsuor 69

¹Ụphel ạmi, Ẹnaan. Ạmuum masi orum ạmi;

²mị raḅi loor ọgbudu, kụ esi ọdaari ẹda ílho; mị masuma ḍigher ạmuum, kụ oologh rạwa oḅiemi ạmi.

³Mị maminenom loor esi ịlooghi ịlom ọloghonaan ạḍighaagh kụ ẹḍogh ạmi repin. Mị mạnmagharan riḍien iboom kụ mị odi ghan rakori ọloghonaan ạḍighaagh ạna.

⁴Bụphe ụlogh bọ ịmi ḍien phọ dị ẹmhu ílho oḍiza opu sịlaal ẹmhu ạmi. Ạbumulogh-ḍien ạmi rụgbaaghiom ghan ịmi ọkpe; bịdi awe ịikpo kụ rọwa oghiigh ạmi. Bịdi uḍighi ịdi mị aḅulemi rạraar dị mị kụ úmi.

⁵Ịkaraph ạmi, Ẹnaan, ị́booghian ghisigh ạna; nạ alegheri ni elologhi ạmi.

⁶Kámeera mị aruomaan umugholoor bụphe ọkpasi bọ ịitughian phọ ạbidi esi ạna Ogbogh Ọmoogh-we Oomo Ịikpo, Kámeera ụtuan ịmi bịn umugholoor asiph bụphe ooseeny bọ nyịna, Ẹnaan Ịzirel.

⁷Loor ẹmhu ạna kụ ẹdi ụḅeni yogh bọ ịmi kụ umugholoor uzuoghom ịmi.

⁸Mị ạkigh ooruen esi abumor ạmi, mụdi ọlo ẹnon eelhe sịphe ogbo eghunotu ạmi.

⁹Oseere ologhi sịphe Otu Ịiḅereghi phọ ạna reemor ghan ekpom ạmi ịdipho ạnian; iitunyian ạbuphe rootunyi ghan bọ nyịna misoroghuom ịmi.

¹⁰Mị asooromi loor ạmi reten ọkaagh ẹḍogh kụ awe rụḅeni yogh ghan ịmi;

¹¹Mị ạkpologhian loor ạmi iinmenan ọto, kụ bịdi rụmilogh ghan ịmi.

¹²Bịdi rọkaaph ghan ịlo ạmi sịphe oomo ịbam areten phọ, ḅịle ạbupughol miim rụmooroghom ịmi sụor.

¹³Kụ ọlo ẹlo ạmi, mị kạaḅereghi nyịna, Ọmoogh-we; ụphagharanaan ịmi, Ẹnaan, mem lọ ẹḅeeraan nyịna. Ụphagharanaan ịmi loor eboom ẹphomoghian phọ ạna loor esi dị nạ aḍighi amitiom oguanaan phọ ạna ọphel ạmi.

¹⁴Ụtophoron ịmi aphune sịphe ọgbudu phọ, kámeera mị aḅi; ụphel ịmi ạsighe esi ạbumulogh-ḍien ạmi, uphune ịmi ạsighe sịphe aḍigher ạmuum mọ.

¹⁵Kámeera amugbogh ạmuum ụminighom ịmi; kámeera mị aḅi sịphe aḍigher phọ, ḅịle mꞌosuma ologhi oḍi.

¹⁶Ụnaghanan ịmi, Ọmoogh-we, esi ẹnighe ẹphomoghian phọ ạna rémuneen ghan bọ; esi eboom ẹphomoghian phọ ạna rémuneen ghan bọ kiton usoman ịmi.

¹⁷Kạ́booghi loor phọ ạna esi otelhedom mọ ạna; mị odi esi iboom ịiḅaghami — ụnaghanan ịmi nyịidipho.

¹⁸Tue ụteeny ịmi ụphel ịmi; ụtagharan ịmi rạghaagh ạbumulogh-ḍien phọ ạmi.

¹⁹Nạ alegheri ni ịdi rụḅeni yogh ghan ịmi, ịdi ruufolomi ghan ịmi kụ ọḅile usooromi ịmi; nạ ạmiin ni oomo ạbumulogh-ḍien phọ ạmi.

²⁰Ịḅenian mẹphue ekpom ạmi mị odi dọl okururu. Mị ạnmanaghian oye lọ rụseenyaan ịmi kụ mị ụ́miin; ọlo rụudereghi ịmi kụ mị ụ́miin.

²¹Mem dị ọkoony usiph ịmi, bịdi ụngo ịmi elu oboom-oḍigh; mem dị ạmuum ụphu ịmi, bịdi ụngo ịmi mụkpueneen amiim.

²²Egbogh ẹkpa eḍien ạbidi kụ eegulemi bịdi; eḍien ẹlo ạrayaal iigbia ạbidi kụ eruomaan emeel ạbidi!

²³Ḅomoghi riḍien ạbidi ịlo ịiḍaany! Dughe rạman ạbidi oomo amem!

²⁴Kạgham bịdi ologhi; ḅịle ạghelhe phọ ạna asoroghuom bịdi!

²⁵Amarugh ạbidi aḍighi ọkpagha; rꞌoniin oye kútugh mun sịphe arugbogo phọ ạbidi.

²⁶Bịdi ọgbiphoghom bụphe nạ mạlhiom bọ; bịdi rọkaaph ghan ịlo ịminimiin awe phọ nạ maḍighi yogh bọ rạraar phọ.

²⁷Gẹeghi ịkaraph ạbidi ạlogh ḍịnya; kámeera bịdi ọmoogh esi sịphe ạpeleeny phọ ạna.

²⁸Ḍighi ịdi kogbuurogh siḍien ạbidi sịphe ạḍinya ạbuphe odi bọ eye; kụ́loghom bịdi sịphe aḍita awe phọ ạna.

²⁹Kụ ọlo mị odimom riiphina rꞌokururu; uphoophe ịmi, Ẹnaan, ḅịle ụphel ịmi.

³⁰Mị kạmoor ḍụor ạsephom Ẹnaan; mị kagbeelom igbogh phọ ọdi esi ọngo ghan ọdi ḍịseph.

³¹Ịphen kụ kẹḅeeraan Ọmoogh-we phọ epu ọsighe ạnam oḍighinom ịyaar aghuḍum kụ ọngo ọdi, epu ọsighe aḍilephiri ạnam dị ạmanam oḍighinom ịyaar aghuḍum.

³²Mem dị bụphe mọmiinom bọ ịminimiin ọmiin ịphen phọ, bịdi kọmoogh ọḅaal ologhi; bụphe ooseeny bọ Ẹnaan kọmoogh oḅio dị ạkpar.

³³Ọmoogh-we phọ rạnaghanan ghan ni bụlo odimom ẹkparam ḅịle rábula ghan we ọdi lọ odi otu ikoli.

³⁴Iboom Ẹnaan, kẹ rꞌade, rịphiiny rꞌoomo ạraraar lọ ediighi ologhi.

³⁵Ọdi kạpel li Jeruselem, ạḅile aselemi rạmha phọ aJuda. Awe ọdi kọtol sịphe kụ ọmooghom de phọ.

³⁶Ạnmuny ạnmuny abutelhedom ạbidi kole ni erua ịpa phọ, kụ bụphe ọphomoghian bọ ḍien phọ ọdi otugh sịphe.