Read abua Ạsuor 7 Bible Online

Ạsuor 7 - abua bible

Ạsuor 7

¹Ọmoogh-we, Ẹnaan ạmi, nạ kụ ọdi mị aḍuom ologhi. Ụphel ịmi ạsighe esi oomo ạbuphe ruphorogh bọ ịmi, ạḅile ụtagharan ịmi,

²ọbo ịdipho ạnam-dịka bịdi kurool ịmi ọḍuanam esi dị rꞌoniin ịmi kụ́phel, kụ ẹpe phọ bịdi kụphanyi ịmi ịpherepe.

³Ọmoogh-we, Ẹnaan ạmi, eru mạar dị mị maḍighi ghan ni ịphen phọ, eru mạar dị mị maḅulemian ghan ni ịkaraph ọyaghiri, eru mạar dị mị mạphueghi ghan ni rạraar ọnon oye dị ịmi mạar úḍighi, eru mạar dị mị maḍighi ghan ni ịphen phọ,

⁵pọ ạmulogh-ḍien phọ ạmi uphorogh ịmi, usiph ịmi, ughiigh ịmi ạwile pạ ade phọ bịn!

⁶Ọmoogh-we, ḅetenuom rꞌọghagh ologhi phọ ạna ạghi azuom bụmulogh-ḍien phọ ạmi. Guuguna ụlhoghonaan ịmi ḍịghaagh. Igey ịiruen kụ ẹdi nạ rạwa ghan bọ.

⁷Kpookpomoghi oomo awe ịsien aḅirini phọ bịdi okoom nyịna, kụ ạrol ẹpe kꞌạke phọ ạda bịdi.

⁸Nạ Ọmoogh-we kụ oogboom ịiruen oomo aḅirini phọ. Soph ịiruen ugheelemi ịmi. Nạ alegheri ni mọ mị úlegheri aani oomo phọ ịphen phọ.

⁹Nạ kụ Ẹnaan aruukuan dị rạaḅeghion ghan iloghi rꞌạruuphua awe. Seseeny, ḍighi ịdi ạsipioghom abuḍighinom ịkaraph phọ kekunughian, kụ ạkpeeghi aḅulemian bụo aruukuan phọ ịpe bịdi oḍighi bọ.

¹⁰Ẹnaan kụ riiko ghan ịmi. Ọdi kụ rạpel ghan bụphe iloghi phọ eseleman bọ katene.

¹¹Ẹnaan raagbonaan ghan ịiruen bụo aruukuan phọ, kụ rạkagham ghan ologhi bụo ạsipioghom mọ tọrotoro aḍio.

¹²Eḍighi mạar dị bịdi únme rọozo phọ ạbidi, Ẹnaan kakola ni elhool ẹgham mọ ọdi, ạkpami kụmugh phọ ọdi kụ akoriom ghan.

¹³Ọdi maakolobinaan nyọdi rẹenema aḍuugh kụ agbon ịkpina phọ ọdi asomoriom bụo ịgbiphoghom mọ.

¹⁴Mịin ịdi remitenaan ghan oye lọ ragbiighiom ghan ọnon oye ịkaraph rꞌịlo ị́nighe.

¹⁵Ọdi aguph ghẹle ạmaar ạagelion, kụ ọdi kụ ạḅile asuma ghẹle phọ ọdi aguph bọ.

¹⁶Ịkaraph phọ ọdi agbiom bọ bụnon meḅula loor ọdi, kụ ẹkpar phọ ọdi meḅula repuru nyọdi.

¹⁷Mị kaboom Ọmoogh-we phọ ịlo aruukuan phọ ọdi. Mị kạmoor sụor aboomiom ḍien Ọmoogh-we Ọkaraghi Ogbogh phọ.