Read abua Ạsuor 71 Bible Online

Ạsuor 71 - abua bible

Ạsuor 71

¹Ọmoogh-we, mị maru esi ạna ọmoogh eekpereghiom; kámeera ọkpar upu ịmi.

²Ịdi eḍighi bọ nạ oye aruukuan, ụphel ịmi ạḅile ụtagharan ịmi; ụnaghanan ịmi ạḅile ụphel ịmi.

³Ḍighi ḍighiigh dị kemoonomi marugh ạmi; ḅịle rꞌịgbagara iikpe dị ikpeki ịmi; nạ kụ esi ịbooghian rꞌọsuaram ạmi.

⁴Ẹnaan ạmi, ụtagharan ịmi esi ạbukaraph awe; ụphel ịmi esi ịikpo awe ạsipioghom rꞌịpaaraghan.

⁵Ọmoogh-we, nạ kụ azin oḍuom-ologhi ạmi; mị ạkpasi oḍuom-ologhi ạmi esi ạna kꞌẹghoroghor.

⁶Mị mạbedenom nyịna kꞌamem mọ ụmar bọ ịmi; nạ muuko ịmi kꞌaḍio phọ ọpo ụmar bọ ịmi. Mị kạseph ni nyịna oomo amem.

⁷Aghuḍum ạmi maḍighi ni eḍeenaan ạngo ịbadi awe, loor esi dị nạ maḍighi ọgbagara ọsuaram ạmi.

⁸Oomo aḍio phọ mị ạseph ghan nyịna ạḅile agbeelom eegu phọ ạna.

⁹Kúghel ịmi nyịidipho mị mạkpo bọ; kụ́ḅitonaan ịmi nyịidipho mị madugh bọ.

¹⁰Ạbumulogh-ḍien ạmi rọwa ghan oghiigh ạmi; bịdi ọkaaph kụ omite ezue oḍighi ạmi ịkaraph.

¹¹Bịdi ọḅem: “Ẹnaan mẹḅitonaan nyọdi. Ophorogh osiph nyọdi! Oye ólho dị kạtagharan nyọdi.”

¹²Kạ́kelan, Ẹnaan. Ẹnaan ạmi, gboogborion aru uḅegh ịmi.

¹³Ḍighi ịdi awe kọkpar opu bụphe uzuom bọ ịmi. Ḍighi ịdi umugholoor kasiph bụphe ọwa bọ oḍighi ạmi ịyaar.

¹⁴Mị kaseere oḍuom-ologhi ạmi esi ạna oomo amem. Mị kạseph ghan nyịna ạḅile ạseph.

¹⁵Mị kạkaaph ni ịlo aruukuan phọ ạna; oomo phọ aḍio phọ mị kạkaaph ni ịlo iiḍighi ạpeleeny phọ ạna, ghạlamo mị úlegheri ọnhu ịlo bịdi ọman.

¹⁶Mị kaboom ni ịikpo phọ ạna, Ogbogh Ọmoogh-we; mị kagbeelom ni ruukuan phọ ạna, ịpe ạna bịn.

¹⁷Nạ mụtughemi ni ịmi kꞌẹghoroghor, kụ ẹteeny kꞌarodon mị rạkaaph ni ịlo ịiḍaany phọ ạna.

¹⁸Kụ ghạlamo mị mạkpo ni asi sụol, kụ́ḅitonaan ịmi, Ẹnaan. Tọlan rꞌạmi mem lọ mị agbeelom ịikpo rꞌigbogh phọ ạna ạḅeni bụo oghiil dị ratu.

¹⁹Aruukuan phọ ạna, Ẹnaan, ẹteeny okuaḍio phọ. Nạ maḍighi igbogh ạraraar; oye lọ ạghigh nyịna ólho.

²⁰Nạ muruomaan ịmi ịiḅaghami rꞌọmiinom, kụ ọlo nạ kaḅulemi ni ịnyaam mọ ạmi, nạ kụgbole ni ịmi sịphe oḍi phọ.

²¹Nạ kụbughe ịmi apuemi ḍigbaany ạdol phọ; kụ ạḅile ụudereghi ịmi.

²²Mị kati ọne ạsephom nyịna; mị kaboom ni nyịna, Ẹnaan ạmi, loor esi dị nạ raḍighi ghan ni ịpe nạ maguanaan bọ. Mị kati ọne ạmooraan nyịna sụor, Oye Aghuḍuul Ịzirel.

²³Mị kạlo ḍịolho iboh mem lọ mị rạmooraan nyịna; rꞌoomo aloor ạmi kụ mị ạmoorom, loor esi dị nạ mụphel ịmi.

²⁴Mị kạkaaph ni ịlo ạdol aruukuan phọ ạna ạḅeni we oomo aḍio loor esi dị mọkpar opu bụphe ọwa bọ oḍighi ạmi ịyaar kụ umugholoor masiph bịdi.