Read abua Ạsuor 73 Bible Online

Ạsuor 73 - abua bible

Ạsuor 73

¹Ẹnaan ẹkar ẹnighenaan we phọ Ịzirel, bụphe iloghi phọ ạbidi ẹserere bọ.

²Kụ ọlo esugha ẹnum bịn ọbo mị ologhi múḍuom mun; omeeraam ạmi ạwa ni ọḍuaghu

³loor esi dị mị ugbeghe ni we ophoophe aloor mem dị mị ạmiin bọ mọ ạraraar ẹnighenaan ghụn we ạsipioghom mọ.

⁴Bịdi rọ́miinom ghan eephina, bịdi ọmoogh ịnyaam omoonogh.

⁵Bịdi rọ́miinom ghan ịdipho ạbunon awe; bịdi ụ́moogh ghan ịiḅaghami phọ ạbunon awe ọmoogh ghan bọ.

⁶Kụ iḍighi kụ bịdi ologhoma ophoophe aloor ịdipho ikoli orum, ọkpologhian sighiton ịdipho ogudaguda ạsuoma.

⁷Ekpom ạbidi rẹḅaar ghan ịkaraph, ḅịle iloghi ạbidi edimom ghan ogbiighi ịkaraph ịitughian.

⁸Bịdi rọmilogh ghan bụnon awe kụ kọghaaphogh ịkaraph; bịdi opoophe loor kụ ọmoogh igbiighi ọgbiphoghom ạbunon.

⁹Bịdi rọkaaph ghan ịkaraph Ẹnaan phọ edi bọ kꞌạke phọ, ọḅile opoophe loor kụ rọtooghi ghan kọngo weye ịsien ade phọ,

¹⁰Kụ ghạlamo awe phọ kꞌẸnaan ni bịn mokiton ropogh bịdi ọḅile omeeraam rꞌạḍiḅeeraan tọrobo ịlo bịdi ọghaaph.

¹¹Bịdi ọḅem mọ, “Ẹnaan kélegheri; Ọkaraghi Ogbogh phọ kạ́wa ámitiom.”

¹²Ịdipho kụ ẹdi awe ạsipioghom mọ ọrol, bịdi ọmoogh ẹeḍiom kụ ẹelha phọ ạbidi rẹbugh ghan bịn.

¹³Ịlo oopho ni bịn ḍụghum, kụ mị aseere bọ dị mị ịkaraph úḍighi?

¹⁴Ẹnaan, nạ maḍighi ịdi mị rạmiinom ghan oomo aḍio phọ; ḍịroor ạḍiroor nạ ụlhiom ịmi.

¹⁵Mụghumo mị ụḅemogh ghan ọdo ạraraar phọ ịphen, mị múḅoghan mụdi mị oniin oye ạna ni.

¹⁶Mị akururu olegheri ẹmhu ịiḅaghami phọ, kụ ẹkpar ẹpughan esi ạmi

¹⁷tụtu mị ạghi aḍigh Otu Ịiḅereghi phọ ạna, kụ mị agbi olegheri ịdi kemitenaan bụo ạsipioghom mọ ruukuna phọ.

¹⁸Nạ kaseere bịdi riisi ẹghorom kụ aḍighi ịdi bịdi komeel oguul ọman.

¹⁹Kopiemi bịdi egina amem; kụ ekureriom ạbidi eḍigh ḍiigu.

²⁰Bịdi ọkighogh mạlha dị ḍịroor bịn mowula; bịdi koḍigh ighu, dị nạ mạnya, Ọmoogh-we.

²¹Mem dị ịitughian ạmi rekiḍim ẹḅile ẹeḅaghami ekpom ạmi,

²²Mị unakara ịdipho ẹnam; mị nyịna ụ́naghanan.

²³Ghạlamo ịduon phọ ni bịn mị ụrol ghan oomo amem atuman nyịna, kụ nạ ạpham ghan ḍịghaagh ạmi.

²⁴Nạ ụuḅakiom ni ịmi ịtooghi phọ ạna kụ ruukuna phọ nạ kụsighenom ni ịmi rꞌeghuan.

²⁵Eeghe ẹnon ịyaar kụ ẹdi mị ạmoogh kꞌạke epel nyịna? Mị mạmoogh bọ nyịna, mị kạḅile rạwa ghan eeghe sịen ade phọ?

²⁶Ologhi ạmi rꞌaloor ạmi ketue ni edugh, kụ ọlo Ẹnaan kụ ịnyaam ạmi; ọdi bịn kụ ẹdi mị ạwa.

²⁷Bụphe oghel bọ nyịna kọkar ri kụ ope; nạ kapiemi ni bụphe nyịna úmeelom bọ.

²⁸Kụ ẹlo ạmi, eḍighi ni ịiḍaany otuman Ẹnaan, ọmoogh eekpereghian esi Ọmoogh-we phọ ạda bọ aḅirini phọ, kụ rogbeelom ni oomo ịpe ọdi maḍighi bọ.