Read abua Ạsuor 78 Bible Online

Ạsuor 78 - abua bible

Ạsuor 78

¹Ịnaghan, we ạmi, ịtughemi phọ ạmi, ẹḅile eler rụru ịlo mị ạḅem.

²Mị kạḅa ikpo ọnhu olegheri ịyaar kụ ạkaaphom ịikia ạraraar ịlo aḍiodiidi,

³rạraar dị yira mọnaghan ọḅile olegheri, rạraar dị ạburude ayira ụḅeni iyira.

⁴Yira kọ́booghinaan nmụny ayira; yira kọḅeni oghiil phọ ọpo ratu bọ ịlo ịikpo Ọmoogh-we phọ rꞌigbogh iiḍighi phọ ọdi, rạraar ịiḍaany phọ ọdi maḍighi bọ.

⁵Ọdi ạlogh iilogh ạngo we phọ Ịzirel kụ ạtooghi ạḅeni nmụny ạnmuny ạJekob. Ọdi aromoghiom bụrude ạburude ayira mọ ọtuugha iilogh phọ ọno ọḅeni nmụny ạbidi,

⁶ẹrol dị oghiil phọ ọpo ratu bọ ọtuugha kụ ọḅile ọḅeni nmụny bụo ạbidi.

⁷Ịduon phọ kẹn kụ ẹdi bịdi kọkpasi emooph ạbidi esi Ẹnaan bịn kóbula ịpe ọdi aḍighi bọ, omuton ọnaghanan ghan ịto phọ ọdi oomo amem.

⁸Bịdi kọ́kigh bụrude ạburude ạbidi, we ọḅaar ẹmhu rꞌẹ́naghanan, we dị omeeraam mọ ạbidi esi Ẹnaan ụ́meera kikiki kụ úmeeraam nyọdi bịninin.

⁹Awe eghun phọ Ifraim, ụphamagh sịkumugh rꞌịkpina, kụ oghiil osumughu ḍio ẹgham mọ.

¹⁰Bịdi úuko ịyo phọ oghiran bọ rꞌẸnaan; bịdi úmeera ọnaghanan iilogh phọ ọdi.

¹¹Bịdi owula ịpe ọdi maḍighi bọ, ịiḍaany phọ bịdi ọmiin bọ dị ọdi aḍighi.

¹²Ạburude ạburude ạbidi ọrol ropogh ghan kụ Ẹnaan eḍighi ghan ịiḍaany sịphe ẹyaghaghaany eelhe phọ aZoan ẹpe ade phọ Ijipt.

¹³Ọdi adi ọphiiny phọ kụ aḍighi ịdi ekeeny rꞌelhiom ẹmeera mụdi iikpe tụtu bịdi ọḅeeny ophun.

¹⁴Mem ootaany ọdi ạrol ologhi ọotu kụ aḍiemiom, kụ ḍughul ọdi ạrol loor anem ạnian.

¹⁵Ọdi apologh sighiigh sịphe ade ịisaar phọ kụ ạngo bịdi mụum dị ạrol ologhi.

¹⁶Ọdi aḍighi ịdi okol ạmuum amite sịphe asighiigh phọ kụ ạmuum akilogh sịphe phọ dịadi ọphiiny.

¹⁷Bịdi ụḅile ni oḍighi ghan ịkaraph esi Ẹnaan, kụ sịphe ade ịisaar phọ bịdi ụḅaar ri ẹmhu esi Ọkaraghi Ogbogh phọ.

¹⁸Bịdi olegheri kụ ọḅem ghan mọ Ẹnaan aḍeenaan oye dị ọdi aru esi ịlom eḍien dị bịdi ọwa ole.

¹⁹Bịdi ọghaaph ghan ịkaraph ịlo Ẹnaan kụ ọḅem: “Ẹnaan ketue ni emitiom eḍien sịen ade ịisaar phọ ḍụghum?

²⁰Agey ni ọdi akar ri ḍighiigh kụ ạmuum akilogh ịdipho okiilia, kụ ọdi katue ni ụngo iyira ạbred olhe ạḅile ạngo we ọdi iphulupul ịnam ạa ḍụghum?”

²¹Kụ iḍighi kụ ephin ologhi Ọmoogh-we phọ mem dị ọdi ạnaghan bọ; ọdi azuom we phọ ọdi nịan, ḅịle kẹn ophin ologhi phọ ọdi esi ạbidi ạbugh,

²²loor esi dị bịdi ụ́moogh omeeraam esi ọdi ḅịle úmeeraam mọ ọdi katue ni ạpel bụno.

²³Kụ ọlo ọdi ạḅaanaan ni okuaḍio phọ kụ ạto mọ arughuugh phọ eghunyonu.

²⁴Ọdi ạngo bịdi eḍien olhe, mạna dị ạḍua kꞌạke kụ aru.

²⁵Ịduon phọ bịdi ule eḍien ạruukpaany kꞌạke, kụ Ẹnaan ẹngo bịdi oomo ịlo bịdi ọwa.

²⁶Ọdi ạḅile aḍighi ịdi ookuugh emitenom erumuḍio phọ aghugh, kụ esi ịikpo phọ ọdi, ọdi aphighemi ookuugh esoorom ạḍighaagh phọ.

²⁷Ịnun dị eḍiza ịdipho ịisaar ọgbal ọphiiny, ọdi ạngo kẹn ni we phọ ọdi.

²⁸Ịgharaghu ogbo esi ạdol phọ ạbidi ekoom rugbogo phọ.

²⁹Kụ awe phọ olhe kụ ẹpherogh; Ẹnaan ịngo bịdi ịpe bịdi ọwa bọ.

³⁰Kụ ọlo ẹephua phọ ạbidi ị́gbaanyan kụ olhe ghan bịn rọkiom,

³¹mem dị Ẹnaan ẹghagham bịdi ologhi kụ ạze ikakara awe ạbidi, bugey ugheel ạnmuny phọ Ịzirel.

³²Ghạlamo esi oomo phọ ịphen phọ ni awe phọ ụḅile ni oḍighi ghan ịkaraph; ghạlamo esi ịiḍaany phọ ọdi amiteghom bọ, bịdi nyọdi úmeeraam.

³³Kụ ọdi akureri riiḍio ạbidi ịdipho aḍiphooghu ḅịle kẹn asighuḍum ạbidi ekureriom ekperenom ịiḅaghami.

³⁴Tọrobo amem lọ ọdi ạze buniin ạbidi, bụeri phọ uru ghan ni esi ọdi, bịdi okiton esi ịkaraph kụ ọoḅereghi ọkparami.

³⁵Bịdi ụutughian mọ Ẹnaan kụ ọpelia ạbuno, mọ Ọkaraghi Egbogh Ẹnaan phọ eḅegh bụno;

³⁶kụ ọlo ikpo ọnhu ạbidi iḍighi ọkpe-ọkpe bịn; ịyaar ị́tol dị bịdi ọghaaph dị eru igey.

³⁷Bịdi úmeelom nyọdi; bịdi ụ́pamanam ịyo phọ bịdi oghiran bọ rꞌọdi.

³⁸Kụ ọlo Ẹnaan ịnma ni ighirigiir we phọ ọdi. Ọdi ạsar ịkaraph ạbidi ạwilenaan kụ óphiemi mun bịdi. Ịbadi amem ọdi ạpham ghan ophin ologhi aḅoronom kụ ọ́kparami ghan ghẹlhe phọ ọdi.

³⁹Ọdi ạatughian ghan mọ bịdi oopho iphulupul, ịdipho ookuugh dị raten ghan bịn kụ ráḅula ghan.

⁴⁰Ịbadi amem bịdi ụḅaar ri ẹmhu esi ọdi sịphe ade ịisaar phọ; ịbadi amem bịdi uḍighi ni nyọdi ịlo ophin ologhi.

⁴¹Amem etum mem bịdi ụwa ghan ọmiin oye dị Ẹnaan aru, kụ oruomaan ḍiphin Oye Aghuḍuul phọ Ịzirel.

⁴²Bịdi uwula iboom ịikpo phọ ọdi rꞌaḍio phọ ọdi ạphel bọ bịdi ạsighe esi ạbumulogh-ḍien phọ ạbidi,

⁴³ạḅile aḍighi igbogh iiḍighi rꞌịiḍaany phọ ọdi sịphe ẹyaghaghaany eelhe phọ aZoan ẹpe Ijipt.

⁴⁴Ọdi akiton mụum ạriphiiny phọ atene ịḅaal kụ awe Ijipt ụ́moogh mun mụum ọphughol.

⁴⁵Ọdi ạlogh ịphi sịphe ogbo ạbidi dị ẹmiine bịdi, rꞌịḅal dị ẹphue de phọ ạbidi.

⁴⁶Ọdi arom igurubia eleeghi ibugha ạbidi, ẹḅile ephiemi iizo ạbidi.

⁴⁷Ọdi aphiemiom ireeny amiim mọ ạbidi iiḅoghoḍi ibikpo, ọdi aḍighi ịdi ẹephoom ẹphueghi ireeny ạfig ạbidi.

⁴⁸Ọdi ạziom sịnam ạbidi iiḅoghoḍi ibikpo, kụ ḍita ịga phọ ạziom ọomaany.

⁴⁹Ọdi aseenaan bịdi iboom ịiḅaghami, agananami oboom ophin ologhi phọ ọdi dị aru ịdipho ọokpaany aḍuugh.

⁵⁰Ọdi ọ́phamaghan ophin ologhi phọ ọdi ḅịle mꞌọ́moogh igbiririph kụ ạziom bịdi rꞌẹkaraph ẹzegh.

⁵¹Ọdi ạze ịkpana ạnmuny oomo arughunotu Ijipt.

⁵²Kụ ọdi aḍiemiom we phọ ọdi ạḍuanam ịdipho opoghom iyool-ịga, kụ ạaḅaki bịdi ạḅeenyom ẹdala phọ.

⁵³Ọdi arelhiom ni bịdi dị ịyaar ị́ḅogh kụ bịdi ụ́moogh oghiilaan; kụ ọphiiny phọ aru ni aakpereghiom bụmulogh-ḍien phọ ạbidi.

⁵⁴Ọdi arorori bịdi asiemi de iigbia phọ, ẹpe ạraaḅaraph phọ ọdi rꞌaloor kụ aphorogh bọ we phọ.

⁵⁵Ọdi aphorogh bụphe orugh bọ esi phọ mem dị awe phọ ọdi rotu; ọdi adiemi de phọ rughunughun phọ Ịzirel kụ ạngo simarugh phọ ạbidi we phọ ọdi.

⁵⁶Kụ ọlo bịdi ụḅaar ri ẹmhu esi Ọkaraghi Egbogh Ẹnaan phọ kụ ọwa ghan ọmiin oye dị Ẹnaan aru. Bịdi ụ́naghanan iilogh phọ ọdi,

⁵⁷kụ ụḅaar ghan ẹmhu ọḅile ọrol ẹnaghanan ịdipho ạburude phọ ạbidi, úḍuom ologhi mụdi ẹkpina dị eḍogha.

⁵⁸Bịdi uḍighi ghan nyọdi ịlo ophin ologhi rꞌariisi ịiḅereghi ịkaaneen ạraraar ạbidi; ạnmuny asighuḍuul phọ ạbidi kụ ịkar kẹn ephin ologhi ọdi iboom.

⁵⁹Ẹnaan ẹghagham we phọ ọdi ologhi mem dị ọdi ạmiin bọ ịphen phọ, kụ ọdi aghel bịdi ạkpaariom.

⁶⁰Ọdi ạḅitonaan ogbogo phọ ọdi ẹpe Sailo, ẹmha phọ ọdi ạrol ghan bọ sịphe ogbo phọ ayira.

⁶¹Ọdi ạngo ọgel bụmulogh-ḍien ayira mọ owum Igbe Ịyo phọ ọsighe, nyẹpe phọ eḍeenaan bọ ịikpo rꞌeegu phọ ọdi.

⁶²Ọdi ạghagham we phọ ọdi ologhi kụ ạngo ọgel dị ạbumulogh-ḍien ạbidi ọze bịdi.

⁶³Ugheel ạnmuny ụze risigh ẹgham, kụ arisina ạnmanyaan ụ́moogh we ạalagh.

⁶⁴Ạbupinyon rịkia umugh ḍuugh ekperenom, kụ úmeera mọ arukpukele ạnmariir phọ ạbidi okururu.

⁶⁵Ekureriom mọ, Ọmoogh-we phọ ạsuma mụdi ạrol rạlha; ọdi ạghigh ọgbagara oye dị amiim rakiigh.

⁶⁶Ọdi aphorogh bụmulogh-ḍien phọ ọdi aseere bịdi dọl umugholoor kꞌagee-pọ.

⁶⁷Kụ ọlo ọdi aghel li nmụny ạnmuny ạJosef, ọdi ọ́loghoma mun eghun Ifraim.

⁶⁸Ọdi ạḅile ghụn ạsaḅar eghun aJuda rꞌEegum ạZayon, ẹpe ọdi ạphomoghian bọ iboom.

⁶⁹Ịsiphe kụ ẹdi ọdi ạlogh Otu Ịiḅereghi ịdipho ạdol phọ ọdi kꞌạke; ọdi ạmaar ạkparami mụdi ade rꞌaloor, ẹmaar ẹrol kꞌagee-pọ.

⁷⁰Ọdi ạsaḅar otelhedom ọdi Devid; ọdi ạsighe nyọdi sịphe ạroogho eḍum mọ,

⁷¹esi phọ ọdi aphogh ghan bọ ḍita iyool-ịga phọ kụ aḍighi nyọdi ọdaam Ịzirel, okoriom awe phọ Ẹnaan.

⁷²ADevid ạmaar ạpham bịdi dị ụ́ḅaram ọkaraph ologhi, kụ aḍiemiom ghan bịdi rꞌẹmaar.