Read abua Ạsuor 79 Bible Online

Ạsuor 79 - abua bible

Ạsuor 79

¹Ẹnaan, ạbumulogh-ḍien dị nyịna úmeeraam moḍigh de phọ ạna. Bịdi mọopu Otu Iigbia phọ ạna ọḅile opiemi Jeruselem.

²Bịdi ụwile ḍizu awe phọ ạna mọ ạredelhe ạa, iphorobo iḍim abutelhedom mọ ạna mọ ilhom ịnam kụ ạa.

³Bịdi uuduḍi ịḅaal awe phọ ạna mụdi ạmuum; ịḅaal kụ ekil mụdi ạmuum oomo ẹmha phọ aJeruselem, kụ oye ọ́rol oḍiighi ạbuphe omugh bọ.

⁴Areelhe phọ ekoom bọ ụsinoghom iyoor ịghor; bịdi ụmilogh iyoor kụ ụnmoghoghoom iyoor.

⁵Ọmoogh-we, nạ kụghagham iyoor ologhi kꞌagee-pọ ḍụghum? Ophin ologhi ạna kaamor mụdi ạnian, ạkiom ghisigh ḍụghum?

⁶Kiton ophin ologhi ạna aphoghomiom reelhe phọ ịpe nyịna róoseeny ghan bọ, aphoghomiom we phọ ạbuphe nyịna rọ́oḅereghi ghan bọ,

⁷ịdi eḍighi bọ bịdi mọze we phọ ạna, bịdi mọphue eelhe phọ ạna.

⁸Kụ́lhiom iyoor loor ịkaraph ạburude ạburude phọ ayoor. Ụnma iyoor ighirigiir; yoor ụ́moogh mun oḍuom-ologhi.

⁹Ụphel iyoor, Ẹnaan, ạḅile ụtagharan iyoor ạsighe; ụnma iyoor ighirigiir loor esi eghuan phọ ạna.

¹⁰Uḍighi ika kụ areelhe phọ upuru bọ iyoor mọ, “Ẹnaan phọ anyina edi ẹghen?” Eḍighi ni ịdi yoor kọmiin mọ nạ ạliom ni reelhe phọ esi ozuughi ịḅaal abutelhedom mọ ạna!

¹¹Nạghanan ịkuph awe ikoli phọ, kụ esi igbogh ịikpo phọ ạna seere ẹereegh bụphe mosophonaan bọ ọoruen aḍuugh.

¹²Ọmoogh-we, ḅulemian ịpheri phọ areelhe phọ oḍual amem esi ịpe bịdi ọsinoghom bọ nyịna ịghor phọ.

¹³Ọbo yoor, awe phọ ạna, iyool-ịga aḍita phọ ạna, ọseph nyịna kꞌagee-pọ ọḅile ooseeny nyịna oomo amem kꞌagee-pọ.