Read abua Ạsuor 88 Bible Online

Ạsuor 88 - abua bible

Ạsuor 88

¹Ọmoogh-we Ẹnaan, ọpelia ạmi, mị amoghi amitiom oomo aḍio, kụ ogbo aḍughul mị atu ghisigh ạna.

²Nạghan ịiḅereghi ạmi; nạghan emoghi ọloghonaan ạḍighaagh phọ ạmi.

³Ịbadi ịiḅaghami misoorom ịmi dị mị matuman ḍuugh.

⁴Mugbiom ịmi ọloghom bụdi úlho; oomo ịnyaam ạmi memuneen.

⁵Mughel ịmi ọloghom bụphe momugh bọ; mị mạghigh bụdi mọze kụ otumeriom iiḍi ạbidi, bụphe nạ mawula bọ bịn, bụdi ọloghonaan ạḍighaagh ạna kạ́teeny mun ni bịn.

⁶Nạ muroph ịmi asumeeny ude oḍi, sịphe oḍi phọ awil bọ kụ ạḅile ạkel.

⁷Ạghelhe phọ ạna muwiririom ịmi ḅịle muugulemi ịmi ọlogh ude oologh.

⁸Nạ maḍighi ịdi ạrighiri ạmi mụḅitonaan ịmi; nạ maḍighi ịdi mị rapur esi ạbidi. Muukpereghiom ịmi kụ mị rákpetenaan.

⁹Ariḍien ạmi medugh esi ọmiinom. Ọmoogh-we, ḍio ḍio ḍio mị rạmagh ghan nyịna kạḅile aphoophe rạghaagh ạnyu esi ịiḅereghi.

¹⁰Nạ kaḍighinaan ni ịiḍaany bụphe momugh bọ ḍụghum? Iḍim keḅerenu ni eboom nyịna ḍụghum?

¹¹Kọkaaph ni ịlo ẹphomoghian phọ ạna ologhi oḍi mụghumo ịlo ébi ghan oguan phọ ạna ẹpe ọmar iḍim ḍụghum?

¹²Rọmiin ghan ni ịiḍaany phọ ạna esi ufiri ḍụghum, mụghumo ịma ẹrolom mọ ạna de ạbulo awe mowula ḍụghum?

¹³Ọmoogh-we, mị rạmagh ni nyịna ọloghonaan ạmi ḍịghaagh; tọrobo ạḍiroor mị ạaḅereghi nyịna.

¹⁴Eeghe kụ nạ ughel bọ ịmi, Ọmoogh-we? Uḍighi ika kụ nạ ụgumom bọ ịmi ọman phọ?

¹⁵Kꞌamem dị mị aḍighi mọony, mị mạmiinom kụ atuman ḍuugh. Mị maminenom loor eephina ịminimiin dị ẹḍua ḍịghaagh ạna kụ eru.

¹⁶Oboom ophin ologhi phọ ạna ruphiemi ịmi; ozuom ghan ạmi phọ ạna ruugulemi ịmi.

¹⁷Ịiḅaghami phọ ịphen ikoom ịmi oomo aḍio mụdi ạmuum-aḍigho; iko ịmi ẹlhogh ogbo oomo ịigaany.

¹⁸Nạ mạgbarion rịghiri ạmi rꞌiigbo ạmi ạkele esi ạmi kụ ufiri bịn kụ ogina amatuman ạmi.