Read abua Ạsuor 90 Bible Online

Ạsuor 90 - abua bible

Ạsuor 90

¹Ọmoogh-we, oomo amem nạ maḍighi ghan marugh ayoor.

²Tụtu nạ kạlem bọ rạaḅaraph phọ mụghumo omitiom aḅirini phọ, nạ bịn kụ uḍighi Ẹnaan dị edi ghan kꞌagee-pọ kụ kaḍighi Ẹnaan kꞌagee-pọ.

³Nạ ạḅeni oye mọ aḅula ịpe ọdi ạrol ghan bọ; nạ akiton nyọdi atene ịisaar,

⁴Oniin ọonir ạsia esi ạna ẹkigh ḍiniin aḍio; ẹkigh ịdipho iḍue phọ meten bọ, ịdipho ookpera ạwa aḍughul phọ.

⁵Nạ ụsighe iyoor ạḍuanam ịdipho aḍigho; yoor ụrol ẹnum amem bịn mụdi ạmalha. Yoor ọkigh ọmirimiir dị asi ḍịroor,

⁶dị aphoph kụ awulawula, kụ ạgharaghar bịn amugh dulhe.

⁷Ophin ologhi ạna kụ uugulemi bọ iyoor; yoor rokiilaan ni ogbogh ọghagh-ologhi phọ ạna.

⁸Nạ aseere ịkaraph ayoor ghisigh ạna, ịkaraph ịbooghian ayoor esi dị nạ kạmiin ghan.

⁹Ophin ologhi ạna masoph ghuḍum ayoor akpere; ạsia phọ ayoor ị́man mun ịyaar ẹkigh onyam-ọḅatan bịn;

¹⁰Oḍualdi ạsia bịn kụ ẹdi yira ọmoogh, ọphaanyadi ạsia lọ yira ọkpar; ghạlamo ịduon phọ, ịyaar dị kiruom iyira ịiḅaghami rꞌọto; aghuḍum mọ óbia bịn masi eekuna, bịn yira moten.

¹¹Ạnhian kụ mạkar ghan aloghoma irighitiigh ophin-ologhi phọ ạna? Ạnhian kụ alegheri oghiilaan dị ogbogh ọghagh-ologhi phọ ạna katumom?

¹²Ụtughemi iyoor ịlo olegheri ịdi aghuḍum ayoor akper, ẹrol dị yoor ọsu ologhi.

¹³Kạpur aḍio kụ ẹdi ophin-ologhi phọ ạna kạtol? Nmạ ighirigiir, Ọmoogh-we, esi abutelhedom mọ ạna.

¹⁴Umuzeḍiom iyoor tọrobo ạḍiroor rꞌẹphomoghian ạna, ẹrol dị yoor ọmoor ọḅile ọmoogh ọḅaal ologhi oomo aghuḍum mọ ayoor.

¹⁵Ụngo iyoor ọḅaal ologhi dị ạmanam ịdipho ọto phọ nạ ụngo bọ iyoor oomo ạsia ịminimiin phọ ayoor.

¹⁶Meera yoor abutelhedom mọ ạna ọmiin ogbogh oḍighi phọ ạna; meera ạnmuny ạnmuny ayoor ọmiin igbogh phọ ạna.

¹⁷Ọmoogh-we Ẹnaan ayoor, meera ạḍiseph phọ ạna ẹrolan rꞌayoor; ụngo iyoor edughom oomo ịlo yoor oḍighi.