Read abua Ạsuor 92 Bible Online

Ạsuor 92 - abua bible

Ạsuor 92

¹Ọpo eeghe ịdi ẹnighe ọngo ghan ạḍiseph nyịna, Ọmoogh-we, ọmoor sụor ọngo eghuan nyịna, Ọkaraghi Egbogh Ẹnaan,

²ogbeelom ẹphomoghian phọ ạna ḍịroor ạḍiroor rꞌébi ghan oguan phọ ạna dulhe adulhe

³rꞌephegh ạraraar iitia dị ọkpamaghiom iḍigh rꞌịma ẹḍogh loor ọne.

⁴Iboom iiḍighi phọ ạna, Ọmoogh-we, ịngo ịmi ọḅaal ologhi; loor esi ịdi nạ aḍighi, mị rạmoor sụor iboh.

⁵Pọ eeghe ạḍibugh dị iiḍighi phọ ạna ẹbugh, Ọmoogh-we; ịitughian phọ ạna ẹkel li iboom.

⁶Phọn ịyaar dị uwo elologhi kálegheri; oghiil oye kạ́naghanan.

⁷Ghạlamo ịdipho ịkaraph awe kotue bọ ni opoph ịdipho ọmirimiir, bụphe oḍighi bọ ịkaraph oḍum, kotue ni oogulemi bịdi bịn kꞌagee-pọ,

⁸loor esi dị nạ, Ọmoogh-we, kụ ogbogh kꞌagee-pọ.

⁹Yoor olegheri ni mọ ạbumulogh-ḍien ạna komugh ni, ḅịle kobinighiom ni oomo ạbuo ẹkaraph eḍighinom ịyaar.

¹⁰Nạ mụngo ịmi ịikpo aḍilephiri ạnam eḍum; nạ mụsephom ịmi ọḅaal ologhi.

¹¹Mị mạmiin ni bụmulogh-ḍien phọ ạmi momeel bọ ạḅile ạnaghan emoghi awe ạsipioghom.

¹²Awe aruukuan koḍum ịdipho areelhe ạmunum; bịdi kopoph mụdi ọsaga ẹpe Lẹbanon.

¹³Bịdi ọkigh ireeny dị ọzuph sịphe otu Ọmoogh-we phọ, dị eḍum agey sịphe Otu Ịiḅereghi Ẹnaan phọ ayira,

¹⁴dị kemuum ni iimuma mem dị mọkpo kụ oomo amem ẹminamina kụ ẹmoogh ịnyaam.

¹⁵Ịphen phọ eḍeenaan mọ Ọmoogh-we phọ oye aruukuan, mọ ạsipioghom ílho loor ọpo uukpereghi bọ ịmi.