Read abua Ạsuor 96 Bible Online

Ạsuor 96 - abua bible

Ạsuor 96

¹Ịmooraan ḍimoom ạḍuor Ọmoogh-we phọ; ịmooraan Ọmoogh-we phọ, oomo aḅirini phọ.

²Ịmooraan Ọmoogh-we phọ kụ eboom nyọdi. Igbeelom tọrotoro aḍio ooḅi ọghaaph phọ mọ ọdi mụphel iyira.

³Igbeelom eegu phọ ọdi eleenyemi reelhe, ịiḍaany phọ ọdi eleenye oomo awe.

⁴Ọmoogh-we phọ ạbugh ni iboom kụ ạkpe ni ooseeny iboom; ọdi ạkpe oghueni opuemi oomo ạrumugh.

⁵Ạrumugh oomo ịpheri phọ areelhe phọ eḍighi ịkaaghineen ạrumugh, kụ ọlo Ọmoogh-we phọ kụ ạlhem sịke phọ.

⁶Eegu rꞌigbogh ekoom nyọdi; ịikpo rꞌẹnighe emuza Otu Ịiḅereghi phọ ọdi.

⁷Iboom Ọmoogh-we phọ, oomo awe sịen ade phọ; iboom eegu phọ ọdi rꞌigbogh phọ ọdi.

⁸Iboom ḍien eegu Ọmoogh-we phọ; ịsighe ruunmo erumom Otu Ịiḅereghi phọ ọdi.

⁹Ikpuḍughian ghisigh Oye Iigbia phọ mem dị ọdi amitiom loor; ipiigha egbodo ọdi, oomo ade phọ.

¹⁰Ịḅeni ghan oomo areelhe phọ mọ, “Ọmoogh-we phọ kụ ọdaam.” Ọmaar opighi de phọ kụ emiigh kpis, kụ kótue opoophe. Ọdi kasoph iiḅi ịiruen kụ ạngo ghan we.

¹¹Ịmoogh iboh, de rꞌạke. Ịmaphaan, ọphiiny rꞌoomo ịpe edi bọ ụmuum.

¹²Ịmoogh iboh, iizo rꞌoomo ịlo edi loor anyina. Ireeny phọ edi bọ rụukpua phọ kẹlo ḍịolho iboh,

¹³mem dị Ọmoogh-we phọ katu ọda ade phọ. Ọdi kạdaam reelhe aḅirini phọ iiḅi ịiruen rꞌegeny ẹphamam.