Read abua Asidogh 10 Bible Online

Asidogh 10 - abua bible

Asidogh 10

¹Ịphen asidogh ạSolomon: Ọony ologhi kaḍighi ịdi ẹebu-ọman ọde ọdi kẹbugh; ọpo elologhi phọ kạngo okururu onhiin ọdi.

²Aruphua dị nạ ạmoogh reten iḅuaḅua kéḍighi nyịna ịma; kụ ạdol aruukuan kẹpel ghuḍum ạna.

³Ọmoogh-we kámeera ọkoony ạze bugey awe kụ ọdi kámeera awe ẹkaraph eḍighinom ịyaar ọmoogh ịlo bịdi ọwa.

⁴Ạdol ẹgbogholeer keseere nyịna ekulom, kụ arukumuan keḍighi nyịna ọolha.

⁵Oye ologhi kabugha eḍien mem dị mewila; eḍighi roofola ọnaani oomo amem ibugha phọ.

⁶Ogey oye kạmoogh ḍịseph; ikpo ọnhu ọkaraph oye rẹbooghi ghan ẹeghara ogburugburu.

⁷Bugey awe kọotughian mọ ạbidi ạḍiseph; kụ bụkaraph awe, kọnuun ni obula.

⁸Awe ologhi kọnaghan ni ogey oroma. Awe ọghaaph elologhi kope ni bịn.

⁹Awe egeny ẹeghara rꞌịyaar kẹ́ḅogh; kụ bụo iḅuaḅua kosiph ni.

¹⁰Oye lọ ạaghi igey phọ rạngo ghan ịiḅaghami; kụ oye lọ ạḍagha ịyaar amitiom rạngo ghan ẹepho.

¹¹Ikpo ọnhu ogeny oye pọ aḍikol aghuḍum, kụ ikpo ọnhu ọkaraph oye rẹbooghi ghan ẹeghara ogburugburu.

¹²Ạmulogh-ḍien ramitiom ghan ịiḅaghami, kụ ẹphomoghian rẹ́miin ghan ọpioman.

¹³Awe ologhi rọkaaph ghan ịlo ologhi; kụ ighiil ọkpe ọgurogh.

¹⁴Ạbuo ologhi kookpomoghi olegheri-ịyaar lọ bịdi kotue; kụ mem lọ ạbuo elologhi ọghaaph ịyaar, ịiḅaghami ị́kelan.

¹⁵Ẹelha rẹpel ghan rạalha phọ; ekulom eegulemi rukulom mọ.

¹⁶Ịikpia oḍighi iiḅi pọ aghuḍum; kụ oḍighi ịkaraph remitiom ghan ịnon ịkaraph.

¹⁷Awe dị oler ọnaghan rụru mem dị rooleminaan bịdi kọtol li; kụ bụphe kómeeraam bọ mọ bụno mọpioman ni odi dọl ooto rꞌosooromineen.

¹⁸Oye dị ạaghi mụlogh-ḍien pọ ọgbaam ọkpe. Tọrobo oye lọ aleenye ịkalaghian pọ uwelologhi.

¹⁹Oboom ọghaaph, pọ ọpioman ọ́kpar. Nạ aḍighi oye ologhi, nạ kaḅoorian.

²⁰Ikpo ọnhu ogey oye ẹkigh ọkar ogey asilva; igbiighi ọkaraph oye ị́man mạar.

²¹Ikpo ọnhu ogey oye kẹngo sụo ịbadi awe; kụ ọlo elologhi keghiigh ni nyịna.

²²Ạḍiseph Ọmoogh-we phọ kụ ẹdi rẹngo ghan oye ẹelha; iboom arukumuan kéḍume nyịna iboom.

²³Eḍighi elologhi ọmoogh ẹephua oḍighi ịkaraph. Olegheri ịyaar kụ ạḅeeraan we ologhi.

²⁴Awe aruukuan rọmoogh ghan ịlo bịdi ọwa, kụ abuḍighinom ịkaraph kọmoogh ghan ịpe bịdi rokiilaan bọ iboom.

²⁵Oghim atu bịn kụ ạghimom we ẹkaraph eḍighinom ịyaar ạḍuanam, kụ ịyaar kẹ́ḅogh bụo egeny ẹeghara.

²⁶Kápir uwo ẹgbogholeer oḍighinaan ạna ịyaar, ọbo ọdi kabeeph ghan bọ ịdipho ạmukpueneen amiim rạlhaal ạna ḅịle mꞌạmughi dị kaḍiku riḍien ạna.

²⁷Nạghanan Ọmoogh-we phọ bịn nạ kạtol li abia. Oḍighinom ịkaraph kamugh ẹpuuny.

²⁸Oḍuom ologhi abugey awe rạngo ghan iboh, kụ ạbukaraph awe úḍuom ologhi ịyaar.

²⁹Ọmoogh-we phọ raakpereghi ghan we egeny ẹeghara, kụ aagulemi bụphe roḍighi bọ ịkaraph.

³⁰Awe aruukuan kọmoogh ghan oomo amem eekpereghian; kụ abuḍighinom ịkaraph kóḍum sịphe ade phọ.

³¹Awe aruukuan rọkaaphom ghan olegheri ịyaar, kụ anem lọ ẹghaaph ịkaraph kosophe ni.

³²Awe aruukuan olegheri igey ikpo ọnhu ọba, kụ ạbukaraph awe oomo amem rọkaaph ghan ịlo kepin ologhi.