Read abua Asidogh 21 Bible Online

Asidogh 21 - abua bible

Asidogh 21

¹Edughanaan Ọmoogh-we phọ ọmaar ọpham ologhi ọdaam mọ ịdipho orelhiom ạmuum okol.

²Nạ ragbi mọ tọrobo ịlo nạ aḍighi ẹnighe ni, kụ legheri mọ Ọmoogh-we phọ kụ rạaḅeghion igbiighi ạna.

³Ḍighi ịlo ẹnighe kụ esel. Ịphen phọ ẹḅeeraan Ọmoogh-we phọ epu oruomaan ọdi rịkia.

⁴Ophoophe aloor rꞌoobaga bịn kụ ẹdi ạbukaraph awe olegheri, kụ ịphen phọ ạsipioghom.

⁵Mạar igbiighi bịn nạ kạmoogh ni kụ eepaany; nạ aagborion ghan ạphughan oḍighi omitiom, nạ kạ́moogh ịdi kẹmanam.

⁶Igbogh dị eḍigh ḍịghaagh ạna reten iigbegheḍiom kerorori nyịna ẹlogh ọnhu aḍuugh, kụ egbi ophe.

⁷Ạbukaraph awe phọ kope ni esi ogburugburu ạbidi; bịdi úmeera oḍighi ịlo ẹkpe.

⁸Awe lọ odimom apum rotelhe ghan ẹkulhakulha eten; awe dị ụ́pioman roḍighi ghan ịlo ẹnighe.

⁹Ẹnighe epu ọsiiny ạnyu otu kụ ọrol kpạripe rꞌorughan oniin otu rꞌọnmooma nmọoma ạnir.

¹⁰Ạbukaraph awe rọmoogh ghan ẹephua oḍighi ịkaraph; bịdi rọ́nma ghan ighirigiir oye.

¹¹Mem lọ ọliom oye ophoophe aloor, ghạlamo oye lọ ịitughian ụ́moogh ạtuugha ni ịyaar. Oye olegheri ịyaar kalegheriom ịyaar esi ịlo ọḅeni nyọdi.

¹²Ẹnaan, Oye Aruukuan phọ, alegheri ni ịlo remite iloghi aruutu ịkaraph awe, kụ ọdi kapiemi ni we ẹkaraph eḍighinom ịyaar.

¹³Eḍighi ịyaar dị nạ úmeera ọnaghanan emoghi arukulom, nạ amoghi ọloghonaan ạḍighaagh oye kạ́naghan.

¹⁴Eḍighi ịyaar dị oye rạghagham nyịna ologhi, aruunmo dị nạ ạghi ịbooghian kụ ạngo kẹpoomi ni nyọdi.

¹⁵Mem dị osoph iiḅi ịiruen, ologhi abugey awe kạḅaal li, kụ ịkaraph awe kọsua ḍịghaagh.

¹⁶Aḍuugh rekori ni tọrobo oye lọ ayeela ạgbol esi igey ịitughian.

¹⁷Ọmoogh aḍiboom ạḍiḅeeraan ịma ạraraar, miim rꞌegbogh eḍien, kẹ́ngo nyịna ẹelha.

¹⁸Ạbukaraph awe roḅulemi ghan loor ạbidi ịiḅaghami lọ bịdi ọwa ọngo abugey awe.

¹⁹Ẹnighe epu orugh ẹdala ọmiinom rꞌorughan ạnir ạḍinmooma ạḍiaḅa rꞌiboom ịnun.

²⁰Awe olegheri ịyaar rọtolom ghan ẹelha rꞌigbogh, kụ ạbuo elologhi roliom ghan ikpoki ạbidi mem mem lọ eḍigh ḍịghaagh.

²¹Nmo ghan inmo ạmoogh iigbia aḅirini bịn nạ kạtol li abia; bụnon kọngo ni nyịna eghuan, ọmaar ọpham nyịna.

²²Ogbogh ọnyo ẹgham olegheri-ịyaar kaziton ẹmha rạghaagh awe ịnyaam, kụ alereghi iikpe oghoony dị bịdi oḍuom ologhi.

²³Eḍighi dị nạ rạwa okpetenaan ịiḅaghami, pọ miigha loor kụ ạghaaph ịyaar.

²⁴Uḍeenaan ịmi oye ophoophe aloor bịn mị kaḍeenaan nyịna oye iḅo-igbogh, rꞌeḅaara ḅaara eḍighinom ịyaar ḅịle rẹ́moogh ọnma ighirigiir.

²⁵Uwo ẹgbogholeer dị úmeera oḍighi oḍighi rakiigha loor ọdi bịn;

²⁶oomo ịdi ọdi rạatughian, ịlo ạraraar lọ repu nyọdi ọmoogh. Kụ ọlo oye aruukuan kạngo ni kụ ạngo rꞌophooph ologhi.

²⁷Ọmoogh-we phọ akel mem dị ạbukaraph awe ọngo nyọdi rạraar aghuḍum mꞌẹlo nụun ọngoom rꞌịkaraph ịitughian.

²⁸Ạsiagba oye ọkpe rómeeraam ghan, kụ ikpo ọnhu oye phọ ọpo ragbiighi ghan bọ rạraar kụ ẹdi kọsighe.

²⁹Awe aruukuan ologhoma siloor ạbidi; ạbukaraph awe kọpu bịn mọ bụno igeny awe.

³⁰Olegheri-ịyaar oye, ọḅaranu ariḍien rꞌọmiin eten — oomo ịne ị́logh ḍịghaagh dị Ọmoogh-we úlhoonaan rꞌạna.

³¹Nạ kạmeremi ni rụsu ọghimom ẹgham; kụ Ọmoogh-we phọ bịn kụ kạngo ọkpar-opu.