Read abua Asidogh 27 Bible Online

Asidogh 27 - abua bible

Asidogh 27

¹Káabagaam iḍue phọ kẹḅaal bọ. Nạ ólhegheri ịlo kemite igbo ạnyiidipho rꞌịlo iḍue phọ.

²Bịle ạbunon awe kụ ọseph nyịna — ghạlamo aruuruen; kạ́sepha loor ạna.

³Ẹemor asighiigh rꞌịisaar ị́manam ọ́tomaam ịiḅaghami dị eghiil eḍighinom ịyaar kemitiom.

⁴Ophin-ologhi abeeph ni kụ rạpueghi ghan ni rạraar, kụ kị́yaar ọ́tomaam igbeghian.

⁵Ẹnighe epu ooleminaan oye egaan rꞌọwile ịdi ọdi kagbi mọ nạ ọ́moogh ịyaar oḍighinom ọno rꞌẹnum.

⁶Ọyaghiri pọ ọyaghiri ghạlamo amem lọ aḍighi nyịna ịlo ị́nighe; kụ mem lọ ạmulogh-ḍien kụ ạkomom ọpha ạna ḍịghaagh ọdi — gona loor.

⁷Mem dị eḍien mẹpher nyịna, nạ kạḅitonaan ni ẹnuum aḍiowo kụ mem lọ ọkoony rasiph nyịna, ghạlamo eḍien lọ rekiḍim, rẹdugh ni.

⁸Oye lọ ạkelan ẹmha, ạkigh ẹnun dị ẹḍua sịphe otu phọ ọdi.

⁹Ạsenti rꞌarolho eeḅi eḍu rẹngo ghan nyịna ọḅaal ologhi, kụ ịiḅaghami kẹwalawalami ẹepho ologhi ạna.

¹⁰Úbula ghan rịghiri ạna ḅịle rꞌạrighiri ọde ạna. Eḍighi ịyaar dị nạ odi esi ịiḅaghami, kápuru umor ạna ọphel ạna; amatuman ạna kạphel nyịna apu umor lọ ạkelan.

¹¹Mọogh olegheri-ịyaar, mọony ạmi, kụ kịḅeeraan ni ịmi; mị kạmoogh ni ịlo ọphagharanaan tọrobo oye lọ ụḅeni yogh ịmi.

¹²Awe ologhi kọmiin ịiḅaghami dị retu kụ ọgbol, kụ oye dị ịitughian ụ́moogh katelhe ạki asuma kụ ạḅem mọ eeghe kụ isu ịmi mem dị oḍighi pạ.

¹³Tọrobo oye lọ ạyegheyeghe iboom dị kaguanaan ọkpianaan ọmugh ooruen, ạkpe ọsighiogh aruphua ọdi ọbo ọkpiom ọmugh phọ.

¹⁴Ọsumeeny ọyaghiri eḅon ạḍiroor rꞌạḍimagh dị ẹghi ạnyu iboom ẹkigh ịdipho osu ọkaraph ọnhu.

¹⁵Ạnir aḍiboom ạḍiaḅa ạkigh mụum dị rạteph toy toy ḍio ọlophia.

¹⁶Ika kụ ịdi nạ kaḍighi kụ akpomori ọnhu ọdi? Nạ mạghi ghan ni osophe oghim ḅịle mꞌokpoph ẹezua ạmunum ạpham?

¹⁷Oye kạtuugha ḍịghaagh ọnon oye, ịdipho okuron kạkola bọ okuron.

¹⁸Mạar ạpham oreeny-ạfig bịn nạ kạmoogh ni iimuma olhe. Ọony-otu lọ ạmaar ạpham ọde-otu ọdi kạmoogh ni eghuan.

¹⁹Aghisigh ạna kụ ẹdi nạ ạmiina bọ loor ạmuum mọ kụ eye phọ ạna kụ ẹdi nạ ạmiina bọ sịphe ologhi phọ ạna.

²⁰Ạruuphua oye ẹkigh ọmar iḍim: oomo amem epholopool edianaan ni ịnon.

²¹Nịan ropoghom ghan gol rꞌasilva; dọl oye kotue ni ọoḅeghion opogh.

²²Ghạlamo nạ ukuphogh uwelologhi kụ rạwa omugh, nạ kátue akuphogh elologhi ạsighe loor ọdi.

²³Mạar aphogh iyool-ịga ạna rꞌạsinam ạna,

²⁴loor esi dị ẹelha ị́meera eniin esi, areelhe bịn kẹ́tol kꞌagee-pọ.

²⁵Nạ aagbo rọogho phọ aphoph bọ kụ agbi oogbo ạtuphe úpoph bọ ịphalagbal ẹeḅaraph phọ mem dị tụpheri phọ ạroogho rasiighi ni.

²⁶Nạ katue ni amitiom rukpe awul dị ọsighiogh sịphe asuphuugh iyool-ịga phọ kụ akoom de rꞌikpoki phọ nạ aal bọ iniin ạrutu-ịga phọ ạna.

²⁷Ịpheri phọ ạrutu-ịga phọ kemitiom mạmaam ẹngo nyịna rꞌeghunotu rꞌạnmanyaan-otu ạna kẹn.