Read abua Asidogh 29 Bible Online

Asidogh 29 - abua bible

Asidogh 29

¹Nạ ạḅaar ghan ẹmhu tọrobo amem lọ oromoghiom nyịna, eniin aḍio kokuphoghi ni nyịna ọgbemeghi kụ nạ káḅetenu mun.

²Uḍeenaan ịmi oye aruukuan lọ ạda kụ mị kaḍeenaan nyịna we dị ọḅaal ologhi. Uḍeenaan ịmi ọdaam dị ạmoogh ẹkaraph ẹzo, kụ mị kaḍeenaan nyịna we dị odi esi ịminimiin.

³Nạ ạmoogh olegheri-ịyaar, ọde ạna kaabagaam ni nyịna. Eḍighi ni élegheri-ịyaar olhiom ikpoki ọngo ạnmariir ipesi.

⁴Mem dị ọdaam mọ ạmanami mọ iiḅi ịiruen ịyaar ri, eelhe phọ kẹmeera ni, kụ mem dị ọdi ạmoogh eboom ekpooko ikpoki bịn, ọdi aagulemi ni eelhe phọ ọdi.

⁵Nạ aatumeni rịghiri ạna, pọ nạ mạkpaminaan ḍiphil loor ạna.

⁶Bụkaraph awe, ạsipioghom ạbidi kụ resiph ghan bịdi, kụ igey awe ọmoogh ọḅaal ologhi kụ ịyaar ị́pam.

⁷Ogey oye alegheri ni riliom arukulom mọ, kụ ạbuphe ẹkaraph eḍighinom ịyaar phọ ịdo ạraraar phọ ịphen kọ́naghan.

⁸Awe dị ụ́moogh ịyaar oḍighinom ạbunon awe kotue ni osumeeny ekpom ẹmha esi ịgbaragbara. Bụphe ọmoogh bọ ologhi koḍighi ịdi ạraraar kẹpo.

⁹Mem dị oye olegheri-ịyaar kụ agbo ogbo uwelologhi, uwelologhi kạmilogh bịn ạlooghi ạawalamiom ạḅeniom sịkaraph.

¹⁰Awe ẹephua ọze ghan awe okel oye dị aseleman, kụ awe aruukuan kọmaar kụ ọpam ghuḍum ọdo oye phọ ọpo.

¹¹Ighiil awe rọkaaph ghan ophin-ologhi ạbidi ogbo awe, kụ awe ologhi rọkparam ghan kụ koḅoronom.

¹²Oye dị ạda we kụ ạnaghanan ghan sịagba ọkpe, oomo awe iiḍighi ọdi koḍighi bụgbaam ọkpe.

¹³Uwekulom rꞌoye lọ rạgbiphoghom nyọdi ọḅaran eniin ịyaar — Ọmoogh-we phọ kụ ạngo riḍien ịyal phọ ạbidi.

¹⁴Eḍighi mạar dị ọdaam ạphamanam riliom arukulom mọ, ọdi kạda ni we phọ ebia.

¹⁵Oromoghiom rꞌọliom ẹnighenaan ịbam ạnmuny. Eḍighi ịdi ọony aḍighi ghan ịlo ẹḅeeraan nyọdi bịn, ọdi kasiphe umugholoor onhiin ọdi.

¹⁶Mem dị ạbukaraph awe kụ ọrolom ạgada ịikpo, ạsipioghom eepaany. Kụ awe aruukuan kọtol kụ ọmiin emeel ọdo awe phọ ạbuen.

¹⁷Lịom mọony phọ ạna bịn nạ kaabagaam ni nyọdi oomo amem. Ọdi káḍighi ghan ịdi nạ kạmoogh umugholoor.

¹⁸Eelhe dị Ẹnaan kụ íḍiemiom eḍighi eelhe dị ịtooghi ụ́moogh. Ọḅaal ologhi kụ odianaan oye dị aako ologh Ẹnaan.

¹⁹Nạ kátue atomoghiom ọony-otu rꞌoopho ọḅaam bịn. Ọdi atue ni ạnaghanan nyịna kụ káler rụru ọphamanam.

²⁰Oboom oḍuom ologhi odianaan ni uwelologhi kụ apu oye lọ rạ́atughian ghan kụ kạghaaph.

²¹Nạ ạngo ọony-otu ạna tọrobo ịyaar lọ ọdi ạwa kꞌamem ẹghoroghor kụ ẹghiom ghisigh eniin aḍio ọdi kạarom ni nyịna tọrobo ịyaar lọ nạ ạmoogh.

²²Awe oboom ofughughuuny rọtuan ghan oboom ọruonu komitiom ịiḅaghami.

²³Ophoophe aloor kạngo nyịna emeel, kụ nạ asooromi loor kọlogh ni nyịna eegu.

²⁴Ịyal awe lọ romi ghan pọ oniin ạmulogh-ḍien oniin. Kọliom ni nyọdi eḍighi ịyaar dị ọdi ạghaaph igey phọ otu ịiruen, kụ Ẹnaan ketonyon ni nyọdi lọ ọdi ụ́gba igey.

²⁵Eḍighi ooto rꞌosooromineen ọoḅaghamian aloor ịlo awe rọotughianam nyịna; nạ ạkpasaghi esi Ọmoogh-we phọ, pọ ịyaar nyịna rẹ́ḅogh.

²⁶Tọrobo oye rạwa ḍịseph esi oye lọ ạda, kụ esi Ọmoogh-we phọ bịn kụ ẹdi nạ kạmiin iiḅi ịiruen.

²⁷Oye aruukuan akel oye ẹkaraph eḍighinom ịyaar, kụ ọkaraph oye akel oye aruukuan.