Read abua Asidogh 3 Bible Online

Asidogh 3 - abua bible

Asidogh 3

¹Mọony ạmi, kábula ịlo mị ạtughemi nyịna. Oomo amem tụutughian oḍighi ịlo mị ạḅeni nyịna oḍighi.

²Ịtughemi ạmi kẹngo nyịna kụudoony aghuḍum rꞌạḍigbo.

³Kámeera omeelom rꞌọḅogh aloor ọngo ekpetenaan nyịna. Kpụa dọl phọ ạḍien orum ạna kụ ạge sịphe ologhi ạna.

⁴Nạ aḍighi ịduon phọ, nạ kạḅeeraan ni Ẹnaan rꞌoye.

⁵Kpạsaghi oomo ologhi ạna esi Ọmoogh-we phọ. Káḍuom ologhi ịdi nạ agbi mọ nạ alegheri.

⁶Tụutughian Ọmoogh-we phọ tọrobo ịyaar lọ nạ raḍighi, bịn ọdi kaḍeenaan ni nyịna eeḅi eten.

⁷Kámeera ologhi ạna aakeleghi nyịna mọ nạ alegheri ịyaar dị epu ịitughian ạna. Nạghanan Ọmoogh-we phọ bịn kụ úḍighi ghan ịkaraph.

⁸Ḍịen kụ eru dọl ạna, kẹkigh ogeny ọogho dị rakeelemi riisi ạna kụ rasophe riiphina ạna.

⁹Ngọ Ọmoogh-we phọ ịkar igeny ibugha ịsiphe ozo phọ ạna aghueniom nyọdi.

¹⁰Nạ aḍighi ịduon, ekue ạna komuzeḍiom eḍien kụ amiim ạna kaapaany dị rꞌịlo ooko kẹkpar ri.

¹¹ Mọony ạmi, mem lọ Ọmoogh-we phọ aaleminaan nyịna, mạar alher rụru. Kạ́sighe ghan mụdi ịyaar ị́man.

¹²Ọmoogh-we phọ raaleminaan ghan bụphe ọdi ạphomoghian bọ, ịdipho ọde kaaleminaan bọ mọony ọdi lọ ọdi raabagaam.

¹³Ọḅaal ologhi kụ odianaan oye dị ạsu ologhi.

¹⁴Ạsuo dị odi sịphe apu ọdi odi loor asilva, ẹman ịyaar esi ạna epu gol.

¹⁵Olegheri-ịyaar kụ ạman ịyaar apu ịbekulari; ịyaar ílho dị nạ kạwa kụ kọtomaam.

¹⁶15 Olegheri-ịyaar kụ kạngo nyịna kụudoony aghuḍum, ḅịle rꞌẹelha rꞌeghuan.

¹⁷Olegheri-ịyaar kaḍighi ịdi ạdol kedugh kụ arelhiom nyịna dị rꞌịyaar nyịna kẹ́ḅogh.

¹⁸Bụphe ọsu bọ ologhi ọmoogh ọḅaal ologhi; ologhi kạngo bịdi ghuḍum.

¹⁹Ọmoogh-we phọ ạlemom de phọ rꞌologhi ọdi; esi olegheri ịyaar ọdi kụ ọdi aseere bọ okuaḍio esi phọ odi bọ.

²⁰Olegheri-ịyaar ọdi kụ aḍighi ịdi ạmuum akil ọphiiny kụ ọotu phọ aten ọlophia dị azuughian sịen ade phọ.

²¹Pạmanam ologhi ạna rꞌọḅaranu ariḍien ạna, mọony ạmi. Kámeera ekpetenaan nyịna.

²²Bịdi kẹngo nyịna ghuḍum — ịma aghuḍum rꞌaḍidugh.

²³Nạ katelhe ni eten kọl kọl kọl dị ịyaar kákpetaan owol.

²⁴Nạ kạ́moogh eepuph mem lọ nạ ạmina, kụ nạ kạnaani kpọsoph ḍughul.

²⁵Nạ kạ́aḅaghamian loor esi ọdo ekperenom ịiḅaghami phọ ịpe remitenaan bọ bụo ạsipioghom mụdi oghim.

²⁶Ọmoogh-we phọ kạmaar ri ạpham nyịna. Ọdi kámeera nạ ameel ḍiphil.

²⁷Tọrobo amem lọ nạ katue ni, ḍighi iiḅi ạngo bụlo ọwa.

²⁸Kạ́ḅeni matuman ạna mọ kori iḍue kụ, eḍighi ịyaar lọ nạ katue ni ạpel nyọdi nyịidipho.

²⁹Kạ́mooghom igbiighi dị kẹngo matuman ạna ịiḅaghami; ọdi odi ọogaany ạna kụ aḍuom nyịna ologhi.

³⁰Ịpakian dị ẹmhu ílho kạ́pakian rꞌoye dị nyịna ịkaraph úḍighi.

³¹Kágbeghe weye egburugburu eḍighinom ịyaar. Kạ́tuughaan ịpe bịdi roḍighi bọ,

³²loor esi dị Ọmoogh-we phọ akel weye ạsipioghom, kụ ọdi akuraam weye aruukuan.

³³Ọmoogh-we phọ atonyon rughunotu abuḍighinom ịkaraph, kụ ạseph rughunotu awe aruukuan.

³⁴Ọdi ọ́moogh ịyaar oḍighinom we dị ophoophe loor, kụ ạngo ooḅi ọghor bụphe osooromi bọ loor.

³⁵Awe olegheri-ịyaar kọmoogh ḍigeny aḍien arughuenian, kụ ighiil awe kọbughe roofola ạbidi bịn.