Read abua Asidogh 31 Bible Online

Asidogh 31 - abua bible

Asidogh 31

¹Ịphen kụ ikpo ọnhu ẹepho dị onhiin ạLemuel ọdaam mọ ạḅeni nyọdi:

²“Nạ ọony ologhi ạmi, ọphagharanaan ịiḅereghi ạmi. Mị kạḅeni nyịna eeghe?

³Kápiemi oomo ịnyaam ạna loor ipesi ḅịle rꞌoomo ikpoki ạna loor ạnmariir: bịdi mophiemi yogh ni bụdaam.

⁴Nạghan, Lẹmuel. Ạbudaam kụ́pughol ghan miim ḅịle kụ́moogh ekpooko ạmuukpara amiim.

⁵Mem lọ bịdi ọphughol bịdi obula iilogh phọ bịn ọḅitonaan riliom awe dị ị́nighenom.

⁶Ạmuukpara amiim ạmuo awe lọ romuughu, mụo ạbuphe odi bọ esi ọmiinom.

⁷Ọwile bịdi ọphughol owula ekulom mọ rꞌamukum ologhi phọ ạbidi.

⁸“Kạaphanaan we lọ kótue ọkaaphanaan siloor. Pạmanaan riliom oomo ạbuphe ẹpelenaan ílho bọ.

⁹Kạaphanaan bịdi kụ aḍighi oye igey ịiruen. Pạmanaan riliom arukulom mọ rꞌạbuphe ẹkparam bọ.”

¹⁰Ẹkpar ri iboom ọmiin ogey ạnir! Ọdi ạman mạar apu ikpo-ẹbe.

¹¹Olhom ọdi ạmoogh oḍuom ologhi esi ọdi, kụ kátue ni bịn aḍighi uwekulom.

¹²Oomo phọ amem mọ ạnir phọ raḍighi ghan nyọdi ịdi ẹnighe, kị́karaph.

¹³Ạnir phọ óphooghian olho ghan awul rꞌọmur ukpe.

¹⁴Ọdi ạpam ghan eḍien rikpisi dị ẹkel arighelom otu, ịdipho ụnwunyaru abumuul ḍighi raḍighi ghan bọ.

¹⁵Ọdi kaḅetenu kụ egbi ọḅaal, ọsa eḍien dị kole rꞌọḅeni ạnmanyaan-otu phọ rukumuan dị bịdi kokumuan.

¹⁶Ọdi agho de kụ aal, kụ ạsighe ikpoki phọ aḅephom ozo avain.

¹⁷Ọdi ạkpar ri iboom ḍịghaagh, ạmoogh ịnyaam kụ ódugh rꞌamem.

¹⁸Ọdi alegheri ịdi tọrobo ịyaar lọ ọdi aḍighi ẹman, kụ ạtol oḍighi kꞌogbo aḍughul.

¹⁹Ọdi akool iri ọdi kụ aloom rukpe ọdi.

²⁰Ọdi ạngo ẹlo ạmoogh rukulom mọ rꞌạbulo ạsidol ẹkparam.

²¹Ẹephoom nyọdi ị́iḅaghami loor esi dị eghunotu ạbidi ọmoogh rukpe ẹenyuum.

²²Ọdi ạkol ịma arukpe ọde ghan ẹmina kụ ạkpologhian ghan iḍiil ịma ịyegheyeghe arukpe.

²³Olhom ọdi, okpolom oye dị aaleghaan.

²⁴Ọdi ạnir dị rạkologh ghan rukpe rꞌikuughaam kụ kaala we asiḍighi.

²⁵Ọdi ạmoogh ịnyaam kụ ọlogh eghuan, kụ óghiilaan ịlo iḍue.

²⁶Ọdi rạkaaphom ghan rꞌolegheri ịyaar rꞌosooromi aloor.

²⁷Ọdi rakumuan ghan oomo amem kụ kazuumaam aphogh ịlo otu phọ ọdi ọwa.

²⁸Ạnmuny phọ ọdi rọngo ghan ni nyọdi ḍịseph, kụ olhom mọ ọdi raboom ghan nyọdi.

²⁹Ọdi ạḅem, “Ịbadi ạnmariir ilhom ọnighe ni, kụ nạ kụ ụkar ụnighe apu oomo ạbidi.”

³⁰Ẹnighe dị reemagha ghan kabi ni kụ ẹnighe epe, kụ ọlo ạnir dị aghueni Ọmoogh-we phọ ạkpe ni oboom ghan.

³¹Kuom ghan nyọdi esi oomo iiḍighi phọ ọdi. Ạnir phọ ạkpe dị tọrobo oye kạngo ghan nyọdi eghuan.