Read abua Asidogh 4 Bible Online

Asidogh 4 - abua bible

Asidogh 4

¹Nmụny ạmi, ịnaghanan ịlo ọde anyina ịḅeni inyina. Iler rụru bịn nyina kẹmoogh ni ọnaghanam ạḍughum.

²Ịphen mị rịtughemi bọ inyina ẹnighe ni. Esi ịduon ịitughian oomo phọ ịne.

³Mem dị mị aḍighi ọbam ọony, ogina ọony ọde rꞌonhiin,

⁴ọde ạmi ụtughemi ịmi ạḅem ghan mọ, “Tụutughian ghan ịlo mị ạḅem kábula. Ḍighi ịpe mị ạḅeni bọ nyịna bịn nạ kabia ni.

⁵Mọogh olegheri-ịyaar rꞌọḅaranu ariḍien! Kábula ḅịle kạ́ḅitonaan ịlo mị ạḅem.

⁶Kákel ologhi, bịn ọdi kạphel li nyịna; ạphomoghian ologhi, bịn ọdi kạphel li nyịna esi ịkaraph.

⁷Ọsu ologhi kụ ẹkar ịma ịyaar dị nạ kaḍighi. Tọrobo ịnon ạraraar lọ nạ ạmoogh, ḅạram ọḅaranu ariḍien.

⁸Pọmoghian ologhi bịn ọdi kạbughe ni nyịna. Kuraam nyọdi, bịn ọdi kạngo nyịna eghuan.

⁹Ọdi kazu nyịna eghoony ạraalha.”

¹⁰Mọony ạmi, ler rụru ụngo ịmi. Mạghami mạar ịphen mị rạḅeni bọ nyịna bịn aghuḍum ạna kạdoony ni.

¹¹Mị mạtughemi nyịna olegheri-ịyaar rꞌịlo ọrol elhiom.

¹²Ịyaar nyịna kékikima eḍighi ịyaar lọ nạ arelhiom ologhi, kụ nạ kákpetaan mem lọ nạ aghiil.

¹³Oomo amem tụutughian ghan ịlo nạ mạtuugha. Olegheri-ịyaar kụ aghuḍum mọ ạna — mạar ạpham.

¹⁴Kátelhian bụkaraph awe. Kạ́tuughaany dọl ạbukaraph awe.

¹⁵Káḍighi ịdipho. Ḍụa esi ịkaraph! Ḅẹm mọ eeye bịn ạghi ḍịa ạna.

¹⁶Awe ạsipioghom kọ́naani tụtu bịdi oḍighi ịyaar dị ị́nighe. Bịdi ọmina bịn kọ́naani emuton dị bịdi moḍighi oye ịyaar dị ị́nighe.

¹⁷Ẹkaraph eḍighinom ịyaar rꞌogburugburu eḍighi eḍien rꞌamiim esi ạbidi.

¹⁸Eten dị awe aruukuan rotelhe ẹkigh erumuḍio ạḍiroor, kẹtol okpoghoronu ghan bịn tụtu ẹkar ẹḅaal ẹman.

¹⁹Eten abuḍighinom ịkaraph phọ kị́dipho, ebiil bịn mụdi aḍughul. Bịdi omeel, kọ̋miin ịyaar phọ okpetaan bọ.

²⁰Mọony ạmi, ler rụru ạnaghan ịlo mị ạḅem. Nạghan ikpo ọnhu ạmi.

²¹Kámeera ekpetenaan nyịna. Tụutughian ghan kụ aseere sịphe ologhi phọ ạna.

²²Bịdi kẹngo ghuḍum rꞌomoon aloor tọrobo oye lọ ạnaghan.

²³Gona loor ịpe nạ rạatughian bọ; ịitughian ạna kụ keelemi ghuḍum ạna.

²⁴Kạ́kaaph ịyaar dị eḍighi ọkpe. Kạ́moogh ịyaar oḍighinom ọkpe rꞌikpo ọnhu ọphuenom oye.

²⁵Pogh ạghiom risigh rꞌomeeraam dị ạkpar, kányororomi ẹmhu ạna esi umugholoor.

²⁶Mạar agbiighi ịlo nạ raḍighi, bịn oomo ịlo nạ aḍighi kẹnighe ni.

²⁷Bịleghi ịkaraph, arelhe onyen, kạ́piom eniin ẹda sịphe egey eten phọ.