Read abua Asidogh 5 Bible Online

Asidogh 5 - abua bible

Asidogh 5

¹Mọony ạmi, ler rụru kụ ạnaghan olegheri-ịyaar phọ ạmi rꞌọḅaranu ariḍien.

²Bịn nạ kalegheri ni ịlo ọphama aloor, kụ ikpo ọnhu ạna keḍeenaan mọ nạ ạmoogh ni olegheri-ịyaar.

³Ịidoronhu ạnir ọnon oye kẹmen ịdipho ẹnuum aḍiowo, kụ ịkpunogh phọ ọdi ẹkorom ịdipho ạmunum-ọliv,

⁴kụ, ruukuna phọ, ịyaar dị ọdi aseenaan nyịna eghiḍim rꞌeephina.

⁵Ọdi kạsighe ni nyịna asiemi ọmar iḍim; eten phọ ọdi ratelhe bọ eten aḍuugh.

⁶Ọdi ólho eten aghuḍum, kụ rayeela ni bịn, óloghoma ịlo remite.

⁷Nyịidipho ịnaghan, nmụny ạmi, kụ kébula ịphen mị rạḅem bọ.

⁸Ịgbol esi ọdo ạnir phọ ọpo; ítuman ghan eghuugh ọdi.

⁹Nyina ẹghi, ạbunon awe kụ kọsighe eghuan phọ nyina ẹmoogh ghan bọ kụ nyina emugh ẹpuuny rạghaagh awe dị ụ́moogh ọnma ighirigiir.

¹⁰Ii, aruuruen kụ kọsighe oomo aruphua anyina, kụ ạsuo arukumuan anyina keḍighi ịlo ọnon oye.

¹¹Nyina kẹmina kụ ẹkonan ẹmina aḍuugh anyina, mem dị iphulupul anyina mẹgbo ẹḍuaghu,

¹²kụ nyina ẹḅem mọ, “Eeghe kụ mị útue bọ ụ́tuugha? Eeghe kụ iḍighi kụ mị úmeera bọ oye uulhemi ịmi?

¹³Mị ụ́naghanan bụtughemia phọ ạmi. Mị úler bọ rụru ụngo bịdi.

¹⁴Kụ ekperenom bịn muufolomi ịmi esi ogbo awe.”

¹⁵Meelom ạnir phọ ọpo ạna kụ ạngo nyọdi bịn ẹphomoghian ạna.

¹⁶Ạnmuny lọ nạ ạmaraghian rꞌạbunon ạnmariir erugh kóḍighi nyịna ịma.

¹⁷Ẹnighe ni dị ạnmuny ạna ophoph ọmanam, kọloghonaan nyịna ḍịghaagh, káruuruen.

¹⁸Ịduon phọ mọogh iboh esi ạnir ạna kụ ạmiin ọḅaal ologhi rꞌọnyani lọ nạ aphin —

¹⁹ạnighe kụ ạdugh-ọmiin ịdipho ọya ọnuen. Ẹnighe ariisi aloor ọdi ẹngo nyịna ọḅaal ologhi; ọdi aghurughiom nyịna ẹphomoghian ọdi.

²⁰Esi ika kụ nạ kạngo bọ ẹphomoghian ạna ọnon ạnir, mọony ạmi? Esi ika kụ ẹnighe ạnir ọnon oye kụ emoogh nyịna?

²¹Ọmoogh-we phọ ạmiin ni tọrobo ịyaar lọ nạ aḍighi. Tọrobo ekpisi lọ nạ ạghi, ọdi rapogh ni.

²²Ạsipioghom oye ẹkaraph eḍighinom ịyaar aḍiphil dị ọkpame. Esi ọseki ịkaraph phọ ọdi kụ ẹdi ọdi kameel.

²³Ọdi kamugh loor esi dị ọdi ọ́maar ọphama aloor. Eboom elologhi ọdi kụ kẹsighe nyọdi ẹloghoḍi.