Read abua Asidogh 8 Bible Online

Asidogh 8 - abua bible

Asidogh 8

¹Iler rụru. Ologhi rạmagh ni. Igbiighi ẹḅem mọ ịnaghanan.

²Ịsiphe aroogbolom ọgbal eten rꞌịgbaranuom kụ ẹdi ọdi ạmeera.

³Ịsiphe eḍighom ẹmha phọ, ọgbal ạrunhu-aḍibuo, kụ ẹdi ọdi rạmagh.

⁴“Mị rịlhom inyina, weye; mị ạmagh tọrobo oye sịen ade phọ.

⁵Iloghi anyina kẹ̋kpo ḍụghum? Ịtuugha ịdi iloghi anyina kẹkpo. Iloghi inyina ílho ḍụghum? Ịtuugha ọsu ologhi.

⁶Ịnaghan ịma ikpo ọnhu ạmi; oomo ịlo mị ịḅeni inyina kụ elhiom.

⁷Ịlo mị ạḅem kụ ịdi eru ịne, ọkpe ukia ịmi.

⁸Tọrobo ịlo mị ạghaaph kụ igey; ịyaar ílho dị eeph mụghumo areekeleghian.

⁹Esi oye lọ ạḅaranu riḍien, oomo ạraraar eganana; esi oye lọ ạmaar alegheri, rꞌịyaar ị́booghian.

¹⁰Ipin oromoghiom ạmi kpạripe rꞌasilva. Ịsighe olegheri ịyaar epuemi ogey agol.

¹¹“Mị Olegheri ịyaar. Mị kụ ụnighe apu ịbekulari; rꞌịyaar ílho dị nạ ạwa dị kụtomaam ịmi.

¹²Mị Ologhi, kụ ariḍien ạmi ẹḅaranu ni; mị ạmoogh olegheri-ịyaar rꞌigbiighi dị ẹkua.

¹³Ọlogh eghuan Ọmoogh-we phọ, pọ oghel ịkaraph; mị akel iḅo-igbogh rꞌophoophe aloor, ịkaraph areten rꞌikpo ọnhu ọkpe.

¹⁴Mị ạmoogh igbiighi kụ aḍighi amitiom. Mị ạmoogh ọnaghanam ạḍughum, kụ mị ạkpar.

¹⁵Mị ạloghonaan ḍịghaagh rạalha ọmaar ọda; kụ bụphe ọda bọ odoghoḍi igey iilogh.

¹⁶Tọrobo oye lọ ạda we sịen ade phọ rạdaam ghan rꞌọloghonaan ạḍighaagh ạmi, mꞌabuḍiemiom areelhe mꞌikpolom awe.

¹⁷Mị ạpomoghian bụphe ụphomoghian bọ ịmi; tọrobo oye lọ ụwa ịmi kụmiin ni ịmi.

¹⁸Mị ạmoogh igbogh rꞌeghuan ọngo, edughom rꞌọghi aghisigh.

¹⁹Ịpe nạ ạsighe bọ ḍịghaagh ạmi kụ ịnighe epu gol dị ạkar ạnighe, ẹnighe epu ọkar ogey asilva.

²⁰Mị odi orelhe eten aruukuan; mị rạdaph ghan eten iiḅi ịiruen.

²¹Mị rạngo ghan ẹelha bụphe ụphomoghian bọ ịmi, kamuzeḍinaan ghan ruutu ạbidi ruphua.

²²“Ọmoogh-we phọ ạphur ụlhem ịmi, ọḅel sịphe iiḍighi phọ ọdi, mem dị mebia.

²³Ụlhem ịmi kꞌẹkar emiighom mọ, ẹḅel egbiom mọ kụ aḅirini phọ amiigh.

²⁴Mụmar ịmi kụ egbi ọteeny amem dị igbogh ạriphiiny ạbazi emite, mem dị asikol ạmuum ị́tol.

²⁵Mụmar ịmi kụ egbi ọteeny amem dị ạraaḅaraph emite, kụ ogbi osereghi aroogbolom riisi,

²⁶kụ Ẹnaan ẹlhem de phọ rꞌariisi oḅeph eḍien ḅịle rꞌẹḅel ẹezua ọogha.

²⁷Mị ụrol li sịphe mem mọ ọdi aseere bọ okuaḍio esi phọ odi bọ, mem mọ ọdi ạreghe bọ kẹ phọ ạḅeenye rịphiiny ạbazi phọ,

²⁸mem mọ ọdi aseere bọ ọotu ẹpe okuaḍio phọ, mem mọ ọdi aghunyon bọ ekilom ạmuum ạbazi phọ

²⁹kụ ạto bọ mọ ạmuum ọphiiny phọ úpeleghom ịpe ọdi ạḅem bọ. Mị ụrol li sịphe mem mọ ọdi aphighi bọ de phọ.

³⁰Mị ụrol li ọogaany ọdi ịdipho oye dị rạge ghan loor ạḍinya ịlo kọlogh otu, mị kụ ụngo ghan nyọdi iboh ḍio ḍio ḍio. Egbodo ọdi kẹn ịḅaalami ghan ologhi ạmi.

³¹Aḅirini phọ rꞌawe ịsien aḅirini phọ ụḅeeraan ghan ịmi oomo amem.

³²“Nyịidipho, ugheel ạnmuny, iler rụru, ịnaghanan ịmi. Iḍighi ghan ịlo mị ạḅem bịn nyina kẹmoogh ni ọḅaal ologhi.

³³Ịnaghanan ịtughemi ạmi, kékel. Ịsu ologhi.

³⁴Oye lọ ụnaghanan ịmi kạḅaal li ologhi — oye lọ odi ghan ịigaany eghuugh ạmi tọro aḍio rakori ghan sịphe eḍighom amarugh phọ ạmi.

³⁵Oye dị ụmiin ịmi mạmiin ghuḍum, kụ Ọmoogh-we phọ kạḅaal li ologhi esi ọdi.

³⁶Oye phọ ọpo ịmi ụ́miin bọ aḍighima ịyaar loor ọdi; tọrobo oye lọ mị akia ạpomoghian ḍuugh.”