Read abua Asidogh 9 Bible Online

Asidogh 9 - abua bible

Asidogh 9

¹Ologhi mạlhogh otu kụ ạmeremiom oḍual ạroko.

²Ọdi maghiigh ẹnam ẹlo amalhe, adoghoḍi rạraar aḍidugh ologhi amiim, kụ ạḅamaghi loor ịdaabili.

³Ọdi marom butelhedom ạnmanyaan ọdi mọ ọghiighi riisi dị ephoph iboom sịphe ẹmha phọ, ogbeel ghan:

⁴“Itu eḍigh, weye dị ịyaar úlegheri.” Kụ ọdi ạḅeni oye phọ ologhi úlho bọ mọ,

⁵“Tue, le eḍien ạmi, ạphughol miim mọ mị makirion bọ.

⁶Ḍụa eghoroghan awe dị mạar úlegheri, ạrol abia. Dạph ghụn eten olegheri-ịyaar.”

⁷Eḍighi ịyaar lọ nạ aaleminaan oye lọ ạḅem mọ ọno alegheri ạman, kọḅile osuom nyịna ọnhu. Eḍighi ịyaar lọ nạ aaleminaan oye ẹkaraph eḍighinom ịyaar, nạ kaḍighima mạar.

⁸Káaleminaan oye lọ ạḅem mọ ọno alegheri ạman, ọdi kạlogh nyịna ḍien. Kụ nạ aaleminaan oye ologhi, ọdi kạlogh nyịna eegu.

⁹Tọrobo ịyaar lọ nạ ạḅeni oye olegheri-ịyaar kẹḅile ẹngo nyọdi ọnon olegheri-ịyaar. Tọrobo ịyaar lọ nạ ạḅeni oye aruukuan kẹḅile ẹngo olegheri-ịyaar dị ạbugh.

¹⁰Tụtu nạ kạmoogh ologhi, nạ kạpur ạlogh eghuan Ọmoogh-we phọ. Eḍighi ịyaar dị nạ alegheri Ẹnaan Aruukuan phọ pọ nạ ạmoogh ọnaghanam ạḍughum.

¹¹Ologhi kạlogh sịa ghuḍum mọ ạna.

¹²Nạ kụ oye dị kạmoogh sụo eḍighi ịyaar lọ nạ ạmoogh ologhi, kụ nạ aghel, nạ kụ kạmiinom.

¹³Elologhi ẹkigh ạnir ạḍiaḅa dị ologhi rꞌumugholoor ụ́moogh.

¹⁴Ọdi odi ọnhu-aḍibuo otu ọdi mꞌesi ạdol dị ephunom ạnyu sịphe ẹmha phọ,

¹⁵kụ rạmagh weye lọ roten dị rọgba ḍịa ạbidi:

¹⁶“Itu eḍigh otu, weye élegheri-ịyaar!” Ọdi ạḅeni uwelologhi mọ:

¹⁷“Ạmuum lọ omi kụ radugh ghan iboom. Ạbred lọ omi kụ adugh apu.”

¹⁸Bụphe ọdaph bọ ạnir phọ úlegheri mọ awe lọ ọghi kꞌọdi komugh ni, mọ bụphe moḍigh bọ mọkar osuma ọmar iḍim.