Read abua Ọtughemia Phọ 10 Bible Online

Ọtughemia Phọ 10 - abua bible

Ọtughemia Phọ 10

¹Iimugheeny ịphi etue ni eḍighi ịdi okpom akoto elho eeḅi eḍu kepur ẹkaraph eḍu, kụ ẹnum iḅo elologhi kepiemi ni olegheri ịyaar dị ạbugh.

²Eḍighi ni ọlhem dị oye olegheri ịyaar kaḍighi ịdi ẹkpianaan kụ uwelologhi kaḍighi ịdi ị́nighe.

³Aḍighiil ạdol ọdi keganana ghan ni ghạlamo rꞌarisigh aruuruen lọ ọdi azuan eten; ọdi kaḍeenaan ghan tọrobo oye mọ ọno uwelologhi.

⁴Eḍighi ịyaar lọ uwo ẹmhu kụ ạghagham nyịna ologhi, káagborion ọge ạḍinya omitenom oḍighi phọ; ooni ọgbagara ọpioman kọsar ri ọbilenaan lọ nạ ạphoomi loor.

⁵Ịphen kẹn kụ ịkaraph ịiruen dị mị mạmiin sịen aḅirini phọ:

⁶bụo ịtooghi phọ ọsaḅar ruwelologhi kụ ọtolomi sịgada ịikpo kụ ọḅitonaan we ikpoki.

⁷Ḅịle kẹn, mị mạmiin ni rẹbene dị rokiilom rụsu rꞌabugbogh awe dị rotelhe owol ade ịdipho ạrebene.

⁸Nạ aguph ooni, pọ nạ kụ kasuma; nạ alereghi iikpe, pọ ẹkaraph-ịyaar kụ kelhomi nyịna.

⁹Nạ aḍighi oḍighi esi oogbo ghan asighiigh phọ, asighiigh kụ keḍighi nyịna ịyaar. Nạ apol ịpe, pọ ạḍipe kụ nạ kaḍighi nyịna ịyaar.

¹⁰Akubu ạna aḅula kụ nạ óghola, pọ nạ kạkparagha ni kụ asophom ịyaar. Ogbiighi ọghiom arisigh kụ iḍighi ọsu ologhi.

¹¹Ẹmaar osiph ẹkaraph-ịyaar ị́moogh ịdi reḍighi, eḍighi ịyaar dị mẹphur elhom nyịna.

¹²Ịkponhu oye olegheri ịyaar rekueni ghan nyọdi; kụ ikpo ọnhu uwelologhi repiemi ghan nyọdi.

¹³Ọdi ramiighom ghan oghiil ọghaaph kụ akureriom ẹkaraph ẹlaal.

¹⁴Ọghaaph uwelologhi eekuna rẹ́tol ghan. Oye ólhegheri ịdi kẹḅile emite, kụ oye ólho dị katue ụḅeni iyira ịdi kemite mem dị yira momuughu.

¹⁵Uwo oḍighi dị aphe eten ẹmha ạbidi kụ kamughom rukumuan.

¹⁶Ịiḅaghami kẹtolonaan ni eelhe mem dị ọdaam mọ aḍighi onyugheel kụ abuḍiemiom mọ rolhe ghan kọphughol oomo aḍughul tụtu ẹḅaal.

¹⁷Kụ eelhe lọ eezuan ịma amaazuan ẹmoogh ọdaam dị rạatughian ghan kụ kaḍighi, ḅịle rꞌabuḍiemiom dị rolhe ghan malhe mem dị ẹkpe, dị ọphamaghan siloor ạbidi kụ amiim úkiigh.

¹⁸Mem dị oye ạmoogh ẹgbogholeer iboom dị útue ụkpoghoron otu ọdi, osia kasiom ni otu phọ ameleghu aḍigh ologhi.

¹⁹Ọḍe rạngo ghan ọḅaal ologhi kụ amiim rạngo ọyigh, kụ nạ kátue ạteeny rꞌeniin dị ikpoki nyịna ílho.

²⁰Kạ́ḍagha ọdaam mọ, ghạlamo ịsiphe ologhi ạna areten dị ọdi kạ́naghan, kụ kạ́ḍagha rạalha ikpoki ghạlamo esi ịbooghian ni osoph ạna. Ẹnun bịn ketue ni ẹkaaph ịpe nạ ạḅem bọ ẹḅeni bịdi.