Read abua Ọtughemia Phọ 5 Bible Online

Ọtughemia Phọ 5 - abua bible

Ọtughemia Phọ 5

¹Mạar agona loor mem lọ nạ ạghi Otu Ịiḅereghi phọ. Ẹnighe ọghi ịtuugha sịphe epu ọphinyon ạrikia ịdipho aruwelologhi phọ rọpinyon ghan bọ, awe dị úlegheri ịlo eru igey rꞌịkaraph.

²Tụutughian ghan kụ agbi ọghaaph. Káguan ghan iguegue aruguanaan ạngo Ẹnaan. Ọdi odi kꞌạke kụ nạ odi sịen ade phọ. Kạ́kaaph ghan apeelhe ịlo ẹkpe ọghaaph.

³Nạ ạaḅaghamian loor iboom, pọ nạ kạmalha yogh ịkaraph ạramalha. Nạ ạyugh iboom, pọ nạ kạḅaaghi ni ịdi ị́kpianaan.

⁴Esi ịduon phọ mem lọ nạ maguanaan Ẹnaan ịyaar, gboogborion ghan ạngo. Ọdi ọ́moogh ịyaar oḍighinom uwelologhi. Ḍighi ịpe nạ maguanaan bọ oḍighi phọ.

⁵Kpạripe káguan rꞌoguan kụ nạ kạbile oḍighi omitiom.

⁶Kámeera ikpo ọnhu ạna eḍighi ịdi nạ kạpioman, bịn kụ nạ ạḅeni oyil ạrikia phọ Ẹnaan mọ nạ ụghaaph aani ni bịn. Eeghe kụ nạ aḍighi ịdi Ẹnaan kẹmooghom nyịna ophin ologhi? Eeghe kụ nạ aḍighi ịdi ọdi kapiemi rạraar dị nạ makumuan ni aakpomoghi?

⁷Tọrobo ạramalha lọ nạ ạmalha yogh, tọrobo ịwalawala iiḍighi lọ nạ aḍighi yogh, ḅịle tọrobo ịlo nạ ạyugh, nạ kạmeera ni ghisigh Ẹnaan rꞌoghiilaan.

⁸Kíḍighi iikia esi ạna ọmiin dị bụo ịtooghi phọ rọgbiphoghom rukulom mọ, kụ ọḅile robiririom bịdi esi ịiruen rꞌelhiom ạbidi. Tọrobo oye oḍighi ạmoogh ni uwo ẹmhu dị rapogh nyọdi, kụ ịyal phọ ạbidi ạbunon abugbogh kụ ropogh.

⁹Ghạlamo rꞌọdaam mọ bịn raḍuom ghan ologhi ibugha.

¹⁰Nạ ạphomoghian ikpoki, pọ nyịna kẹ́gbaanyan ghan; nạ aporogh ẹelha, pọ oomo ịpe nạ ạwa bọ kụ kị́di nạ kạmoogh. Oopho ni bịn.

¹¹Ịdipho ẹelha phọ rẹbugh bọ ḍịghaagh ạna, ịdipho kụ ẹdi nạ kạngo eḍien ịbadi ịnhu. Ạsuo dị nạ ạmoogh, olegheri mọ nạ ạmoogh ikpoki bịn.

¹²Oye arukumuan kạmoogh ni kụ iini kạ́moogh ẹlo ẹmanam olhe, kụ ọlo kạnaani ni ḍughul rꞌẹepho. Ogbogh oye ạmoogh ni iboom aruphua, kụ ọlo kạ́naani ghan ḍughul loor ọoḅaghamian aloor.

¹³Pọrono ẹekia ịyaar aḍiigu dị mị mạmiin sịen aḅirini phọ: awe ọḅile rooko ghan ikpoki koseerian mem lọ kẹkpe olhiom,

¹⁴kụ ọsighe otelhiom eten dị amabi kạtol bịn kụ ikpoki késugha mun oseenaan ạnmuny ạbidi.

¹⁵Yira kọḍua aḅirini phọ ọphon ịdipho yira ọrol bọ kụ oru — rꞌoopho ạraghaagh. Ghạlamo ịdipho yira mokumuan bọ ni, ịyaar rọ́pam kogheelom.

¹⁶Ị́nighe! Yira kokeel ịdipho ọrol bọ kụ oru. Yira rokumuan ghan ni, rọkparagha ghan osiph ookuugh phọ, kụ eeghe kụ ẹdi yira ọmoogh.

¹⁷Yira ọtolom ghuḍum ayira esi ufiri rꞌọto, ọoḅaghamian aloor, ophin ologhi rꞌịirurughian.

¹⁸Ịphen ịdi mị mạwa amitiom: ọkar egey ịyaar dị oye kaḍighi, olhe rꞌọphughol kụ ọghelom aruphua phọ ịpe ọdi makumuan bọ ạmoogh esi ekulha amem mọ Ẹnaan mẹngo bọ nyọdi: ọphon kụ amaazuan phọ oye.

¹⁹Eḍighi ịyaar dị Ẹnaan ẹngo oye ẹelha rꞌaruphua kụ emeera mọ ọdi ạghelom, pọ ọdi ạngo ḍịseph ạḅile ạghelom ịpe ọdi mạmoogh bọ. Eḍighi ruunmo kꞌẸnaan.

²⁰Ịdipho Ẹnaan mẹngo bọ nyọdi ọḅaal ologhi, pọ ọdi kụ́uḅaghamian loor tọrobo ịlo aghuḍum mọ akper.