Read abua Ọtughemia Phọ 7 Bible Online

Ọtughemia Phọ 7 - abua bible

Ọtughemia Phọ 7

¹Aḍiiḅi aḍien kụ ịnighe epu elho eeḅi eḍu ḍi ẹman igbogh ikpoki; kụ aḍio dị nạ amugh kụ ịnighe epu ḍio dị ọmar nyịna.

²Ẹnighe epu ọghi otu dị emoghi kụ edi rꞌọghi esi dị ọḍe kụ odi, loor esi dị ẹkpianaan bụphe odi bọ eye ọotughianam ghan asiloor ạbidi mọ aḍuugh rekori ni oomo ayira.

³Ọkururu kụ ạnighe apu rẹer; katue ni ạpue risigh ạna kụ ọlo kaselemi ni ọnaghan ạḍughum ạna.

⁴Oye dị oomo amem rạatughian ghan ịlo ọḅaal ologhi pọ uwelologhi. Oye olegheri ịyaar rạatughian ghan ni ịlo aḍuugh.

⁵Ẹnighe dị awe olegheri ịyaar kọlhiom ghan nyịna epu dị aruwelologhi kụ kọsaram nyịna.

⁶Mem dị uwelologhi ạmilogh, rẹkigh ghan mụdi iitoor kụ rẹkpataghaan ụnian. Oopho ni bịn.

⁷Mem lọ uwo olegheri ịyaar aagbegheḍiom oye, ọdi raḅo ghan mụdi uwelologhi. Eḍighi ịyaar dị nạ alhe otioman, pọ nạ mạphue ẹzo ạna.

⁸Ekureriom ạtorobo ịyaar kụ ịnighe epu emiighom mọ. Ọmoogh ọkparam kụ ịnighe epu ophoophe aloor.

⁹Pạmaghan ofughughuuny ạna; ologhi ẹḍim pọ elologhi.

¹⁰Kápuru ghan mọ, “Uḍighi ika kụ ạraraar ageediidi phọ ẹnighe bọ epu ịphen ạnyiidipho.” Ḍịen káḍipuru ologhi.

¹¹Tọrobo oye dị odi eye ạkpe ni olegheri ịyaar; olegheri ịyaar ạkighimaam olhe erua,

¹²kụ kạngo nyịna ọophooneen oḅio ịdipho ikpoki. Olegheri ịyaar kụ kạmaar ạpham nyịna — ọphon kụ ạsuo olegheri-ịyaar.

¹³Tụutughian ịlo ịpe Ẹnaan meḍighi bọ. Ika kụ ẹdi oye kạgbuton bọ asele ịyaar dị Ẹnaan ẹkulemi?

¹⁴Mem dị rẹnighenaan nyịna, ḅạal ologhi, kụ mem dị ịiḅaghami eru, kịom ologhi bịn: Ẹnaan ẹḅar ri ọḅaal ologhi rꞌịiḅaghami kụ rẹngo ghan. Nạ ólhegheri ịlo kẹḅile emite.

¹⁵Aghuḍum ạmi oopho ni bịn, kụ ịsiphe phọ kụ ẹdi mị mạmiin tọrobo ịyaar. Ogey oye kamugh ni kụ ọnon ạtol li rạki, ghạlamo ọkaraph oye ni.

¹⁶Esi ịduon phọ kạ́nighe ạpughan ḅịle kạ́moogh oboom olegheri ịyaar ạpughan — eeghia kụ nạ kakiigha bọ loor ạna?

¹⁷Kạ́moogh eboom ẹkaraph ẹzo, ḅịle kẹn káḍighi uwelologhi — eeghia kụ nạ kamugh bọ kụ egbi ọteeny amem ạna?

¹⁸Gbọlonaan ịyal aruukuna phọ. Eḍighi ịyaar dị nạ ạlogh eegu Ẹnaan, kẹnighenom ni nyịna.

¹⁹Olegheri ịyaar kaḍighinaan ni iboom ạraraar oye apuemi ịdi ḍioph ạbudaam koḍighinaan eniin egbogh ẹmha.

²⁰Oye ólho sịen aḅirini phọ dị raḍighi ghan ịdi ẹnighe oomo amem dị kạ́pioman.

²¹Kạ́naghanan ghan tọrobo ịyaar lọ awe kọkaaph — ọbo nạ kạnaghan ghan bọ ịdi ọony-otu ạna raronyon ghan nyịna.

²²Kụ nạ aloghoma ni mọ nạ rꞌaloor maronyon ghan ni bụnon awe ịbadi amem.

²³Mị ụsighe olegheri ịyaar ạmi kụ ạwaaghiom ghan bọ oomo ịphen phọ. Mị ụkururu ni olegheri ịyaar kụ ipeel li ịmi.

²⁴Ika kụ ẹdi oye kalegheri bọ ịyaar dị aghuḍum aru? Ạkel ude ạpughan ọnaghanan, ạkpar kẹn iboom ọnaghanan.

²⁵Mị ụḅogh ni loor ạmi ạngo ologhi ẹmaar rꞌịtuugha; mị ụnya ni ọmoogh olegheri ịyaar rꞌịlo ọphanyanaan asipuru phọ ạmi, rꞌọtuugha ịdi ẹkaraph ẹzo rꞌelologhi edi esi élegheri-ịyaar.

²⁶Mị ụmiin ni ịyaar dị eghiḍim epu ḍuugh — ạnir-ephoph. Ẹphomoghian phọ ọdi ạngo bọ nyịna kesiph nyịna ịdipho aḍiphil mụghumo ọseki kụ ạraghaagh phọ ọdi aghurughiom bọ nyịna kẹghoroghi nyịna ịdipho izime. Oye dị raḍighi ghan ịpe ẹḅeeraan bọ Ẹnaan kakpetenaan ni, kụ ạnir phọ kasiph ni oḍighinom ịkaraph.

²⁷Ii, Ọtughemia phọ ạḅem ni. Mị ụwa ịphen phọ amitiom ẹnum ẹnum mem dị mị rạwa ghan ọnaghanan ọphanyanaan phọ.

²⁸Mị mạwa ni ọnon ọphagharanaan kụ mị ụ́miin. Mị ụmiin ni oniin oye esi oniin ọonir dị mị katue ạngo eghuan, kụ rꞌoniin ạnir-ephoph mị kọ̋miin.

²⁹Ịphen phọ kụ oomo ịdi mị mạtuugha: Ẹnaan ịlhem ni iyira eselemi ẹḅile eelemi; kụ yira moseere siloor ayira ḍịkamakama ạdol.