Read abua Ạḍuor Ạsuor 2 Bible Online

Ạḍuor Ạsuor 2 - abua bible

Ạḍuor Ạsuor 2

¹Mị oopho ạfalaway eḍum ẹpe Saron, ịma ạfalaway sịphe eḍiiny igbo ạraaḅaraph phọ.

²Ịdipho ịma ạfalaway ogbo iiḅurom ịma ọnyani ạmi ogbo ạnmariir.

³Mụdi oozin ẹḍara igbo ireeny ẹekpua phọ, ịdipho kụ ẹdi ọtomaam nyọon ạmi igbo ạbunon awe. Ịḅeeraan ịmi ọrol esi oogho phọ ọdi, kụ iimuma ọdi ẹdugh ọnhu ạmi.

⁴Ọdi ụpham ịmi arumom otu amugbogh amalhe ọdi kụ aphoophe ạlagba ẹphomoghian uukpereghiom ịmi.

⁵Ḅịle aḅulemiom ịnyaam ạmi ịgbaghaḍineen ạraraar kụ aḍighi ịdi mị kaamanam kụ ạazaghamian loor ạmi rꞌẹḍara. Aḍiboom ạḍiḅeeraan medughe loor ạmi.

⁶Ạḍighaagh ekeeny ọdi edi eeḍian ẹmhu ạmi kụ ạḍighaagh elhiom ọdi rịipholion ghan ịmi.

⁷Iguanaan ịmi, nmạriir aJeruselem; ikunya esi aḍien ạrunuen ikem mọ rꞌizoogh phọ mọ nyina kéesophoghom ẹphomoghian ayoor.

⁸Mị rạnaghan ẹḍogh oye ẹphomoghian ạmi, Ọdi akiil ẹpe ạraaḅaraph phọ kụ ratu, kụ rạḅeenyogh roogbolom mọ oru ọteeny ạmi.

⁹Oye ẹphomoghian phọ ạmi ạkigh ezoogh, mụdi onyugheel ọoroogh. Ạmeera bịn atuman iikpe phọ. Ọdi aten sịphe eghuugh-ookuugh phọ kụ rapogh ghan ropogh eghuugh phọ.

¹⁰Oye ẹphomoghian phọ ạmi rụḅaanaan ịmi. Tue nụun, ạnir ẹphomoghian ạmi, Osegbe ạmaka ạmi, ụdaphan ịmi.

¹¹Arunu memuneen, ọlophia ọ́lhoph mun;

¹²ẹpe ịbam ạramha phọ ạsifalaway meenmenan. Nyịidipho amem ọmoor ạsuor; rọnaghan sụor arukuru-ghọzo ẹpe eḍum mọ.

¹³Iimuma ạfig memiigh rẹḅaal; ookuugh phọ rapurom eeḅi eḍu ịizughum avain. Tue nụun, ạnir ẹphomoghian ạmi, ọnyani ologhi ạmi, ụdaphan ịmi.

¹⁴Nạ ạkigh ọkurughozo dị ạaghian ịbaay asighiigh Ḍighi pạ mị ụmiin ịma aghisigh phọ ạna kụ ạnaghan ịma ẹḍogh phọ ạna.

¹⁵Siphi rụukpa-ako phọ, ịbam ạruukpa-ako phọ, ọbo bịdi kẹpue oghoony ịizupha avain phọ ịpe mẹemanam bọ.

¹⁶Oye ẹphomoghian ạmi ọlo ạmi kụ mị ọlo ọdi. Ọdi rạngo ghan ịḅal ḍita ịnam mọ ọdi igbo ịma ạsifalaway phọ

¹⁷tụtu ookuugh ạḍiroor amiigh oghugh kụ ufiri phọ aḍigh ighu. Tigheel, osegbe ạmasini ạmi, mụdi ezoogh, mụdi elephiri ezoogh ẹpe ạraaḅaraph phọ aBeter.