Read abua Ạḍuor Ạsuor 3 Bible Online

Ạḍuor Ạsuor 3 - abua bible

Ạḍuor Ạsuor 3

¹Mị ạmina ẹmina ạmi ḍughul etum ḍughul phọ, mị ụmalha ghan ịlo ọpo mị ạphomoghian bọ. Mị ụwa ghan ni nyọdi kụ mị ụ́miin nyọdi.

²Mị ụghi ni ayeela ghan sịphe egbogh ẹmha phọ, arelhe yogh oomo ịbam areten rꞌịdi ekpisi íkputon. Mị ụwa ni nyọpo mị ạphomoghian bọ, mị ụwa ni, kụ mị útue ụ́miin.

³Abukoriom aḍughul phọ rotelhe yogh bọ egbogh ẹmha phọ ụmiin ni ịmi. Mị upuru ni bịdi, “Nyina ẹmiin ni oye ẹphomoghian phọ ạmi ḍụghum?”

⁴Íbia mị ạḍua bọ esi ạbidi, bịn mị ạmiin nyọdi. Mị ụpham ni nyọdi kụ mị úmeera mun mọ ạḍua tụtu mị ạsighe nyọdi asiemi kꞌonhiin ạmi, ẹpe ọkar osoph phọ ụmar bọ ịmi.

⁵Iguanaan ịmi, nmạriir aJeruselem; ikunya esi aḍien ạrunuen ikem ḅịle rꞌizoogh phọ kụ nyina kéesophoghom ẹphomoghian phọ ayoor.

⁶Ẹphen phọ eeghe dị ẹḍua bọ de ịisaar phọ kụ retu mụdi ẹphuluḅul ạmughi, dị repur eeḅi eḍu ịnsens rꞌamaa, ịnsens phọ ịpe abumuul ḍighi phọ robool ghan bọ?

⁷ẠSolomon ratu, ọsaany ni sịphe ạgada ọdaam eelhe phọ ọdi; odiinydi awe ẹgham kụ abukoriom mọ, ọkaraghi igey awe ẹgham mọ Ịzirel.

⁸Oomo phọ ạbidi ạbuo ẹmaar ịlo eenom elhool ẹgham; bịdi awe dị ẹgham ẹḅeeraan iboom. Oye ye ạbidi ạḅanaam ni elhool ẹgham, ogonomaam aloor esi awe lọ kotu ozuom ạbidi ḍughul.

⁹Otool Sọlomon ọdaam mọ ologhi ạgada ọdaam eelhe phọ ọdi dị ọkaam ọkar ogey oreeny.

¹⁰Ịmeremiom mọ okpoghom silva; loor phọ, ozuom ukpe ịnme dị olhoom gol. Ẹtolom mọ okpereghiom oodor dị ạnmariir aJeruselem kụ ọmaar olooghi rꞌẹphomoghian.

¹¹Nmạriir ạZayon, itu ẹmiin Sọlomon ọdaam mọ. Ọdi azua eghoony ọdaam eelhe phọ onhiin phọ ọdi azu bọ ẹmhu ọdi ḍio apinien phọ ọdi, ḍio ọḅaal ologhi rꞌibo phọ ọdi.