Read abua Ạḍuor Ạsuor 5 Bible Online

Ạḍuor Ạsuor 5 - abua bible

Ạḍuor Ạsuor 5

¹Mị maḍigh ologhi oghoony ịizupha ạmi, ạnir ẹphomoghian phọ ạmi dị mị kapin, Mị raakpomoghi maa ạmi rꞌarolho eḍu kịrokiro; mị rạlaay ghan ẹnuum aḍiowo ạmi rꞌigumogum mọ. Mị rạpughol ghan miim ạmi kạḅile ạmoophi mạmaam ạnam. Ile, we ẹphomoghian, kụ ẹphughol tụtu ẹphomoghian ighiigh inyina ịdipho amiim.

²Mị ạmina ni kụ ekpom ạmi ị́naani. Mị ụmalha ni dị oye ẹphomoghian phọ ạmi rakar eghuugh phọ. Mị utu uḍigh, ạnir ẹphomoghian ạmi, aḍidugh ologhi ạmi, ọkurughozo ạmi. Ooto mạḅore ẹmhu ạmi, kụ ạsilaal ạmi megururu loor ooroogh phọ.

³Mị mạkatanaan ukpe kụ rakori; mị kạḅile bọ amuuna ika? Mị maatola ruwol ạmi; mị kạḅile bọ ạlogh ẹenir ika?

⁴Oye ẹphomoghian phọ ạmi ạsighe ḍịghaagh ọdi ạpam eghuugh phọ, kụ edugh esi ạmi dị ọdi masi sịen.

⁵Mị ụnya mọ ọdi aḍigh ologhi otu. Ạraghaagh ạmi amaa kụ odi, Ạsunugh ạmi ogbul elho amaa, ịdipho mị ạpham aani bọ ọkasiom eghuugh phọ.

⁶Mị maghughuronaan oye ẹphomoghian phọ ạmi eghuugh phọ, kụ ọdi magheel. Ịdi mị ạkar rạwa ghan ọnaghan ẹḍogh phọ ọdi! Mị ụwa ni nyọdi, kụ mị ụ́miin; Mị ụmagh ni kụ ịmi ụ́phagharanaan.

⁷Abukoriom aḍughul phọ rotelhe bọ ẹmha phọ ụmiin ni ịmi; bịdi ụgur ri ịmi ọkpoghoron; abukoriom iikpe oghoony ẹmha phọ ọphaanyi ukpe ozua ạmi.

⁸Iguanaan ịmi, nmạriir aJeruselem, mọ eḍighi ịyaar dị nyina ẹmiin oye ẹphomoghian phọ ạmi, mọ nyina kẹḅeni ni nyọdi mọ mị madugh loor aḍiboom ạḍiḅeeraan.

⁹Ạnir dị ạnighe apu oomo ạbunon, oye ẹphomoghian phọ ạna ạgbatanaan ni oomo ạbueri phọ? Eeghe rꞌịyaar iikia ịlo ọdi kụ iḍighi bọ kịro dị yoor koguanaan bọ nyịna?

¹⁰Oye ẹphomoghian phọ ạmi aḍighi ooḅi kụ ạmoogh ịnyaam; ọdi bịn kụ ooḅi dị ạgbatanaan esi aḍioph ọonir awe.

¹¹Aghisigh ọdi enaba kụ ạḍorodoro; ạsilaal ọdi emelemele, ebil ịdipho ẹghiligho.

¹²Ariḍien ọdi ẹnighe ịdipho arukurughozo dị ẹlhel ọgbal aḍikol dị ạmuum rakil, arukurughozo dị ootolom mạmaam ạnam kụ ẹmeera ọgbal okol ạmuum.

¹³Arukpo ọdi ẹnighe ịdipho ịma oghoony dị ạroogho rꞌịizupha eeḅi eḍu kụ edi. Ịidoronhu ọdi ẹkigh ịma ạsifalaway dị ọḅoriom elho amaa.

¹⁴Rạghaagh ọdi ọmaar kụ ọlhem, kụ ọdi ạlogha ghan sigulu dị ọdamaghiom ịbekulari. Aḍizu ọdi ẹkigh ọper pẹr oḍu ọoma dị ọdamaghiom ịnmananmana ịkuta.

¹⁵Ạrugbo ọdi eḍighi sịkool ooḅi ạmabul dị osereghi ropogh agol. Ọdi ạmaar ạmeera ịdipho ạraaḅaraph ạLebanon rꞌạrasaga ạbidi dị eselogh.

¹⁶Ọnhu ọdi ạmen ọkpun; tọrobo ịyaar ịlo ọdi rịḅeeraan ghan ịmi iboom. Ịduon kụ ẹdi oye ẹphomoghian phọ ạmi ạrol, nmạriir phọ aJeruselem.