Read abua Ạḍuor Ạsuor 6 Bible Online

Ạḍuor Ạsuor 6 - abua bible

Ạḍuor Ạsuor 6

¹Nạ ạnir phọ ạnighe bọ apu oomo ạbunon phọ, oye ẹphomoghian phọ ạna mạghi ẹghen? Ụḅeni iyoor ẹpe oye ẹphomoghian phọ ạna rạki bọ, ọbo yoor ọwaanaan nyịna nyọdi.

²Oye ẹphomoghian phọ ạmi mạghi oghoony ọdi, esi phọ aḍiiphughi phọ ẹsi bọ. Ọdi rạngo ghan ịḅal ḍita ịga phọ ọdi sịphe oghoony phọ kụ raakpomoghi ghan ịma ạsifalaway.

³Oye ẹphomoghian phọ ạmi ọlo ạmi, kụ mị ọlo ọdi. Ọdi rạngo ghan ịḅal ḍita ịga phọ ọdi sịphe ogbo ịma ạsifalaway phọ.

⁴Ạnir ẹphomoghian phọ ạmi, nạ ạkar ạnighe ịdipho aJeruselem, ạnighe ịdipho ẹmha aTirza, ạsighe kẹn ḍiphooghu ịdipho igbogh ạramha phọ ịphen.

⁵Sịghe riḍien ạna esi ạmi; bịdi isiph ni ịmi bịn ẹpam ẹkananaam. Ạsilaal ạna rẹker ghan ịdipho aḍita ạrutu-ịga dị repeleghu kesoor rạaḅaraph phọ ạGiliad.

⁶Ạralaal ạna ẹḅaal ịdipho aḍita iyool-ịga dị pụruku owur mụum. Rꞌoniin ọnyo ạbidi óphe; oomo phọ ịne ẹmaar ẹkasian kụ edi.

⁷Arukpo ạna rẹmuanan ologhi ạnmana phọ ạna.

⁸Ọdaam ẹmha phọ ạmoogh odiinydi ạrukueni, ọphaanyadi ịgaanyeen ạnmariir, rꞌarisina ạnmanyaan dị opel ogbi!

⁹Kụ ọlo mị ạpomoghian nyoniin kụ ọdi aḍigh ologhi ạmi ịdipho ọkurughozo. Ọdi ogina ọnyani onhiin ọdi, ọoseeny onhiin ọdi. Oomo ạnmariir ropogh ghan nyọdi kụ ọseph; ạrukueni phọ rꞌigaaneen ạnmariir phọ rọseph ghan nyọdi.

¹⁰Ọphon phọ ạnhian dị ọghiom ekpeḍien kụ ạghigh bọ eḅon ạḍiroor? Ọdi ạnighe kụ akpoghoronu rạmu, rạtaphan ịdipho erumuḍio ḅịle mꞌụnwanyu.

¹¹Mị masoor asi sịphe ogbo ạrimir-ighool ọmiin ịzururuuny ireeny phọ ẹsi bọ eḍiiny phọ, ọmiin ịizughum loor ịizupha avain phọ rꞌịdi ạrinya ekpetughe phọ reenmenan.

¹²Aloor ạmi repiigha ni; nạ maḍighi ịdi mị mạmoogh ẹephua ẹphomoghian ịdipho okiilom oghuugh ẹgham ude dị mạnyaaghian ịlo ẹgham.

¹³Kẹr ịḅa, nyạni ọlo aSulam. Yoor ọmiin aani ịḅa phọ ạna. Eeghe kụ ẹdi nyina rẹwa bọ ọmiin ịḅa lọ mị rạker igbo ạsikool awe dị okoom rophogh?