Read abua Ạḍuor Ạsuor 7 Bible Online

Ạḍuor Ạsuor 7 - abua bible

Ạḍuor Ạsuor 7

¹Pọ eeghe ọokia ọnyani dị nạ aru! Pọ eeghe ịdi ạrada ạna ẹnighe ologhi arokoro. Ẹkulaam ạrugbo phọ ạna ẹkigh rukumuan oye ạmaka.

²Ẹkpa edi ni sịphe dị amiim eeḅi eḍu rámuneen ghan. Ạḍighoroghi ịbiakpa edi ni sịphe dị ịma ạsifalaway esi ekoom.

³Ịyal phọ ạramamaam ạna ẹkigh ịyal ạrunuen mꞌizoogh dị ọmar ịyal.

⁴Orum ạna ạkigh ẹsogolo esi otu ạnyu dị oḍighinom oḍu ọoma. Ariḍien ạna ẹkigh rụudu ạmuum ẹpe ẹmha aHesbon, etuman ọbalalaany ọnhu-aḍibuo egbogh ẹmha phọ ẹpe. Izon ạna ẹnighe ịdipho ẹsogolo esi otu ạnyu phọ ạLebanon ọpo ạmeera bọ rakori ghan ẹmha phọ Dạmaskos.

⁵Ẹmhu ạna, ọpam ọmeremi ịdipho Eegum ạKarmel. Ạsilaal phọ ạna ọkpa bọ ẹkigh ịma ọmelemele ukpe; ẹnighe ọdi kesiph ni ọdaam ẹkananaam.

⁶Pọ eeghe ẹnighenom mọ nạ ạnighe bọ; pọ eeghe ịdi ạraraar ạḍiḅeeraan ẹphomoghian phọ ạna emunughan.

⁷Nạ ạdugh-ọmiin ịdipho alhe dị ạmeera, kụ ạramamaam ạna ẹkigh ịphunubun alhe.

⁸Mị kạsiiny ni alhe phọ kụ ạsonyon ikpo phọ. Esi ạmi ạramamaam ạna ẹkigh sịgba iimuma avain; aḍiphooghu ạna ẹkigh eeḅi eḍu ọmir,

⁹kụ ọnhu ạna ạkigh ọkar amugey amiim. Ẹnighe ni dị amiim kakil ạteeny oye ẹphomoghian phọ ạmi, akil ạnyu ịidoronhu rꞌạralhaal ọdi.

¹⁰Mị ọlo oye ẹphomoghian phọ ạmi, kụ ọdi rụwa ni ịmi.

¹¹Tue, osegbe ạmaka ạmi, omite ọghi ẹpe ạrughulukul phọ kụ ọmina ḍughul ẹpe ịbam ạramha phọ.

¹²Yira koḅon oḅetenu kụ opoghoghom ireeny avain phọ ọmiin mọ bịdi momiigh ni ophoph, mụghumo ịpe ekpooghian bọ memiigh ọotaranu kụ mụghumo arekpetughe phọ reḍum ni. Ẹpe kụ ẹdi mị kạngo nyịna ẹphomoghian ạmi.

¹³Nạ kapura ni eḍu ẹḍara rꞌoomo ịma iimuma dị etuman ọnhu-aḍibuo ayoor. Osegbe ạmasini ạmi, mị maakolobian aseenaan nyịna rạraar ạḍiḅeeraan, igbaany rꞌimoom.