Read abua Azaya 10 Bible Online

Azaya 10 - abua bible

Azaya 10

¹Inyina moruule! Nyina rẹloghoḍi ghan ịkaraph iilogh dị rẹgbiphoghom we phọ ạmi.

²Ịpe kụ ịdi nyina ekikima bọ rukulom mọ ọmoogh ariliom ạbidi ḅịle rꞌọmoogh ghan akeel. Ịpe kụ ịdi nyina ẹsighiogh bọ ruphua phọ ịpe eḍighi bọ ịlo arukpukele ạnmariir rꞌạbunyigo ạnmuny phọ.

³Nyina keḍighi ika mem dị Ẹnaan ịlhiom inyina? Nyina keḍighi ika mem dị ọdi ạsighe muphe eelhe dị ẹkel iruom inyina? Ẹghen kụ ẹdi nyina kekiil bọ ẹki ọwa ọloghonaan ạḍighaagh? Ẹghen kụ ẹdi nyina kẹbooghi bọ ẹelha phọ anyina?

⁴Kịze inyina mem ẹgham, iini inyuughi inyina ọloghoḍi ikoli. Ghạlamo ịduon ni bịn ọghagh ologhi Ọmoogh-we phọ kákunughian; ạḍighaagh ọdi kẹḅile ni esel ịlo ọlhiom ạbidi.

⁵Ọmoogh-we phọ ạḅem mọ, “Asiria! Mị aḍighi Asiria ịdipho ẹḅam ọlhiomom ạbuphe mị rạkagham bọ ologhi phọ.

⁶Mị urom ni Asiria mọ ozuom eelhe dị Ẹnaan úlegheri, awe dị moḍighi ịdi mị mạmoogh ọghagh ologhi. Mị urom ni bịdi mọ owum omiighi ọozeghi we phọ ịdipho ẹenir sịphe aroḅodo phọ.”

⁷Kụ ogbogh ọdaam mọ Asiria ạmoogh ni ịkaraph igbiighi ịlo ologhi ọdi. Ọdi ạphur ọkpuku ologhi ophiemi ịbadi areelhe.

⁸Ọdi abaga ghan mọ, “Tọrobo oniin oḍiemiom ẹgham ạmi aḍighi ọdaam ni!

⁹Mị ụkpar apu rạmha phọ aKalno rꞌaKakemis, rạmha phọ ạHamat rꞌApad. Mị ụkpar apu Sameria rꞌạDamaskos.

¹⁰Mị usele ḍịghaagh ọlhiomom ạtorobo ọmar phọ rọoḅereghi ghan bọ ịkaaghineen ạrumugh, ịkaaghineen ạrumugh dị eḍiza epu ịpe aJeruselem rꞌaSameria.

¹¹Mị maphiemi Sameria rꞌoomo ịkaaghineen ạrumugh ọdi, kụ mị kaḍighi kẹn iniin phọ Jeruselem rꞌigbudu phọ bịdi rọoḅereghi ghan bọ.”

¹²Kụ Ọmoogh-we phọ rạḅem ghan mọ, “Mem dị mị ạmadan ịpe mị raḍighi bọ sịphe Eegum ạZayon rꞌaJeruselem, mị kạliom ni ogbogh ọdaam mọ Asiria loor oomo obaga rꞌophoophe aloor phọ ọdi.”

¹³Ogbogh ọdaam mọ Asiria ạpa mọ, “Mị bịn rꞌaloor maḍighi oomo phọ ịdi. Mị ạmoogh ịikpo ạḅile alegheri ịyaar rꞌikeḍi. Mị ugbonyon ni rụuku areelhe phọ, ạsighiogh ruphua ẹgham lọ bịdi ookolobian oseere. Ịdipho aḍilephiri ạnam mị mạazeghi aḅararami we phọ orughogh bọ rụuku phọ.

¹⁴Areelhe aḅirini phọ ụghigh otu-ẹnun, kụ mị arool ẹelha phọ ạbidi mụdi rọsighiogh reghelhe phọ. Ụ́gun rꞌophaaph odeghom ạmi, ọnhu ẹnun óphoghogho ọlooghiom ạmi!”

¹⁵Kụ Ọmoogh-we phọ rạḅem ghan mọ, “Akubu katue ni akophora mọ ọno kụ ạbugh apu oye phọ raḍighinom bọ nyịno ḍụghum? Ịfokofoko ẹman ni mạar epu oye phọ raagboom ghan bọ nyịno ḍụghum? Ẹḅam kụ oye rạpam ghan, oye kụ rạpam ghan ẹḅam.”

¹⁶Ọmoogh-we oomo ịikpo phọ kạngo ni ẹzegh dị kẹliom bụphe rolhe bọ kẹpher nyịidipho. Ologhi asiloor ạbidi ạnian keemor ghan bịn kéḍim.

¹⁷Ẹnaan ạḍiḅaal phọ Ịzirel keḍighi nịan. Oye Aghuḍuul phọ Ịzirel kaḍighi nem ạnian dị ḍiniin aḍio bịn kele ni oomo ạraraar ẹman, ghạlamo iitoor rꞌiiḅurom.

¹⁸Rụukpua ẹelha phọ rꞌarere iizo kopiemi ni ọman, ọkaraghi ịdipho phọ ẹzegh aḍuugh rekiigh ghan bọ oye.

¹⁹Iikoma ireeny bịn kụ kesugha dị ghạlamo ọbumoony bịn katue ni agbi amuneni.

²⁰Amem retu ni dị awe phọ Ịzirel bụphe okpetenaan bọ kọ́moogh mun oḍuom ologhi esi eelhe phọ ẹpe ẹwa bọ ophiemi ạbidi. Bịdi kọkar ri ọkpasi oḍuom ologhi ạbidi esi Ọmoogh-we phọ, Oye Aghuḍuul phọ Ịzirel.

²¹Iikoma awe phọ Ịzirel kotigheel Ẹnaan Oomo Ịikpo phọ ạbidi.

²²Ghạlamo ịduon oḍiza bọ ni ịdipho ikpo ịisaar ọphiiny phọ, iikoma bịn kụ kotigheel. Amuphe rakori ni we phọ, kụ ạkpianaan ni bịdi.

²³Agey ni, sịen oomo eelhe phọ Ogbogh Ọmoogh-we oomo ịikpo phọ katuom ni muphe, ịdipho ọdi ạḅem bọ oḍighi phọ.

²⁴Ogbogh Ọmoogh-we oomo ịikpo phọ ạḅeni ni we ọdi orugh bọ sịphe Zạyon mọ, “Kékiilaan bụo Asiria phọ ghạlamo bịdi ịgbiphoghom ni inyina ịdipho ạbuo Ijipt phọ oḍighi ghan bọ.

²⁵Mọony amem bịn mị kịlhiom ni inyina ạmadan, reru reten kụ mị apiemi bịdi.

²⁶Mị Ọmoogh-we oomo ịikpo phọ kạguroghom bịdi ịkpara ạmi ịdipho mị ạgurogh bọ we phọ ạMidian ẹpe Aḍighiigh phọ Oreb. Mị kạliom Asiria ịdipho mị ạliom bọ Ijipt.

²⁷Mem dị ẹteeny, mị kịtagharan inyina ạsighe dọl eeḍian phọ Asiria, kụ ọfeguma ạbidi káḍighi mun dool rụpha anyina.”

²⁸Awe ẹgham ạmulogh-ḍien phọ mọkpar opu ẹmha phọ Eai! Bịdi moten Migron! Bịdi useere rạraar iikolobian phọ ạbidi ẹpe Mikmas!

²⁹Bịdi mọḅeeny epholopool phọ kụ rọtol ḍughul phọ ẹpe Geba! Awe phọ ịsiphe ẹmha phọ aRama rokpereghaan, kụ awe phọ ịsiphe ẹmha aGibia, ẹmha phọ ạSol ọdaam mọ mosumughu.

³⁰Ịlooghi, weye aGalim! Ịnaghan, weye aLaisa! Imegheron, weye Anatot!

³¹Awe phọ aMadmena rꞌaGebim rosumughu ọphel asighuḍum ạbidi.

³²Rodon ạbumulogh-ḍien phọ mosi ẹmha phọ ạNob, kụ odi sịphe oḅughogh rạghaagh rọpaarogh Eegum ạZayon, ẹmha phọ aJeruselem.

³³Ọmoogh-we oomo ịikpo phọ kạgbuton ni ḍịghaagh iphelegbe phọ ọdi bịdi omeel ịdipho ịla oreeny dị ọkoy kụ remeleghu. Uwo ẹmhu ophoophe aloor phọ rꞌọpo aphoph bọ apu oomo ạbidi koler ri kụ iiphopha kophere yogh ni.

³⁴Ọmoogh-we phọ kạsighe akubu alherom bịdi ịdipho ireeny ologhi ẹekpua; ịdipho igey ireeny eḍum ạLebanon remeel ghan bọ.