Read abua Azaya 11 Bible Online

Azaya 11 - abua bible

Azaya 11

¹Ọophi aDevid ọdaam mọ ạkigh ịdipho oreeny dị molher ude; kụ ọkaraghi ịdipho imoom ịla kẹtaarogh bọ sịphe egisi phọ kụ ịdi omoom ọdaam kạḅile amite sịphe ogbo ẹemara ẹemara phọ aDevid.

²Uwaloor Ọmoogh-we phọ kạngo nyọdi olegheri-ịyaar, rꞌọnaghanan ạḍughum mọ rꞌịitughian ọphamam awe phọ ọdi. Ọdi kalegheri ịpe Ọmoogh-we phọ rạwa bọ kụ ạngo nyọdi eghuan,

³kụ ạmoogh ḍịḅeeraan esi ọnaghanan ọdi. Ọdi kạ́tuan ḍimite rꞌụḅem mọ bịn asoph ọoruen.

⁴Akeel rꞌapum mọ ọdi ạteeny ni rukulom bụphe ẹloghonaan phọ ílho bọ. Esi ịtooghi ọdi kọliom ni we phọ, kụ awe ạsipioghom komuughu ni.

⁵Ọdi kapoghom we phọ rꞌelhiom rꞌịlo aghuḍuul.

⁶Ilhom ịnam rꞌiyool-ịga kẹḅoph ni etughan rꞌẹepho, kụ ariitiir kẹmina ni ude rꞌạnmuny ạrutu-ịga. Ạnmuny ạsinam rꞌạnmuny ạnam-dịka kẹḅoph ni elhian, kụ ịbam ạnmuny opogh bịdi.

⁷Ạsinam rꞌareephe ạno kele ni egina esi, kụ ạnmuny ạsinam rꞌạnmuny areephe ạno kẹmina ni ude rꞌẹepho. Ạnam-dịka kele ịgharaghar ikpo ịbiakpa ịdipho ạsinam.

⁸Ghạlamo ọbumoony ịyaar kéḍighi eḍighi mạar dị ọdi aphegh atuman elhom ẹkaraph-ịyaar.

⁹Sịphe Zạyon, ẹeḅaraph iigbia phọ Ẹnaan, ịyaar kẹ́tol dị keḍighi mạar oye mꞌịkaraph. Ọnaghan ạḍughum Ọmoogh-we phọ kaleeny eleeny de phọ ịdipho ạmuum amuza bọ rịphiiny phọ.

¹⁰Aḍio retu ni dị omoom ọdaam mọ, ọophi ọnyo ẹemara ẹemara phọ aDevid ọdaam mọ kaḍighi ịdipho eḍeenaan esi areelhe phọ. Bịdi kookpomoghan sịphe ẹkpana ẹmha phọ ọdi kụ ọngo nyọdi eghuan.

¹¹Aḍio phọ ạḍiphe ẹteeny, Ọmoogh-we phọ kạḅile kẹn ni ạsighe ịikpo phọ ọdi aḅulemiom we phọ ọdi bụphe osugha bọ ẹpe Asiria rꞌIjipt, ẹpe areelhe phọ ạPatros, Sụdan, Ilam, Bạbilonia rꞌạHamat rꞌịsiphe iigbom ạriphiiny phọ rꞌạnyu arukpu-ogbo ọphiiny phọ.

¹²Ọmoogh-we phọ kagim ni ạlagba ọlo oḍeenaan areelhe phọ mọ ọno mạḅile raḅulemi egina esi we phọ Ịzirel rꞌaJuda ọwalala bọ inya phọ ạrughulukul aḅirini phọ.

¹³Ọmar phọ Ịzirel kápin mun ologhi aJuda, kụ aJuda káḍighi mun mụlogh-ḍien Ịzirel.

¹⁴Bịdi kọḅophoghan kụ ozuom bụo aFilistia phọ ẹpe erumuḍio phọ remeel ghan bọ kụ ọpueghi rạraar awe phọ ạbuphe orugh bọ ẹpe erumuḍio phọ remite ghan bọ. Bịdi kọkpar opu we phọ Idom rꞌạMoab, kụ awe phọ Amon kọnaghanan ni bịdi.

¹⁵Ọmoogh-we phọ kạkaragharami oolhe ọphiiny phọ aSuez kụ ọdi kamitiom ọghologhol ookuugh ọgharagharami ọphiiny phọ aYufratis, ạbile oḍual ịbam ạruphu bịn, ọbo oye lọ ạwa katue ni atelhe ạḅeeny.

¹⁶Olhom oḅodo ọḍua kạtolonaan ni we phọ Ịzirel okpetenaan bọ dọl phọ ạbidi Asiria, ọkaraghi ịdipho ạrolonaan bọ bụrude ạburude ạbidi mem mọ bịdi ọḍua bọ Ijipt.