Read abua Azaya 13 Bible Online

Azaya 13 - abua bible

Azaya 13

¹Ḍịen kụ adom ḍịo ạBabilon, dị Azaya ọony phọ Amoz ạar bọ Ẹnaan.

²Ạnyu ekpokolo ẹeḅaraph dị ịyaar répoph, gim ạlagba ẹgham mọ. Lọ ạghiom bụo ẹgham mọ kụ aphoophe ḍịghaagh ạna oḍeenaan ạbidi mọ mẹteeny mem ozuom ạrunhu-aḍibuo ẹmha phọ ephoophe bọ loor.

³Ọmoogh-we phọ mạmagh amitiom bụo ẹgham obagaam mọ rꞌoḍuom ologhi phọ ọdi ịlo ee ẹgham iigbia rꞌọliom ạbuphe ọdi rạkagham bọ ologhi.

⁴Iler rụru ẹnaghan ọyugh ạnyu ạraaḅaraph phọ — ạḍiaḅa oboom ọoloogh awe, ạḍiaḅa areelhe rꞌạramar awe dị reekpomoghan. Ọmoogh-we Ạbuo Ạraagham mọ raakolobian bụo ẹgham ọdi ịlo elephiri.

⁵Bịdi ọḍua ịikela areelhe dị ẹkel ẹpe aruukuna aḅirini phọ kụ rotu. Loor esi ọghagh ologhi ọdi Ọmoogh-we phọ ratu ni oogulemi oomo eelhe phọ.

⁶Imoghi emoghi eephina! Aḍio Ọmoogh-we phọ mẹkpulan, aḍio phọ ḍịphe Ẹnaan Oomo Ịikpo phọ ketuom bọ muphe phọ.

⁷Ạraghaagh ạtorobo oye kẹkporoghaan ni, kụ ạkpo ologhi ạtorobo oye ạḍua.

⁸Oomo phọ ạbidi kokpereghaan ni kụ eephina phọ eler bịdi, ịdipho oghunughan dị rakun ạnir. Oniin kapogh nyoniin reegu, rꞌasighisigh umugholoor.

⁹Aḍio Ọmoogh-we phọ retu ni — ḍio ọghagh ologhi rꞌofughughuuny phọ ọdi. Kokiton de phọ otene ẹdala, kụ tọrobo oḍighinom ịkaraph kopiemi ni.

¹⁰Tọrobo ẹenaan rꞌạtorobo egu ạraanaan kẹ́mu mun, mem dị erumuḍio phọ remite kebil li, kụ ụnwanyu phọ ḍịḅaal kạ́ngo mun.

¹¹Ọmoogh-we phọ ạḅem mọ, “Mị katuom muphe sịen ade phọ kụ ạliom oomo ạbukaraph awe esi ịkaraph ạbidi. Mị kasooromi tọrobo ọlo rabaga rꞌọlo igbagbaar.

¹²Bụphe kokpetenaan bọ koku opu gol.

¹³Mị kaḍighi ni ịdi ạsike phọ keekpeka kụ apighemi de phọ ẹḍua dọl phọ ọdi, ḍio phọ ạḍiphe mị Ọmoogh-we oomo ịikpo phọ kaḍeenaan ọghagh ologhi ạmi.

¹⁴“Aruuruen phọ orugh bọ sịphe Bạbilon kokiil ọḍua okeel reelhe ạbidi, ọowalami ịdipho ạrunuen dị rekpetenaan bọ ịtaya, ịdipho iyool-ịga dị okoriom ụ́moogh.

¹⁵Oye lọ osiph kogimi ni okiigh.

¹⁶Bịdi ropogh ni kụ ẹloghonaan ílho, ịbam ạnmuny ạbidi kọgurogh ni ọze, ruutu ạbidi obumogh rạraar ọsighiogh, kụ nmạriir ạbidi kobiighi ni.”

¹⁷Ọmoogh-we phọ ạḅem mọ, “Mị rạkpaariom bụo aMedia ozuom ạBabilon. Bịdi ụ́manami mạar silva kụ gol kẹn kọ́deghom bịdi.

¹⁸Ọpham sịkumugh rꞌịkpina kọziom ni oomo ugheel phọ. Bịdi kọ́nma ighirigiir bụlo rọmaam mꞌọmoogh igbiririph ịbam ạnmuny.

¹⁹ẠBabilon kụ ọmar dị ạnighe apu oomo ịpheri phọ; ọdi kụ eghuan awe phọ ọdi. Kụ mị Ọmoogh-we phọ kapiemi ni Bạbilon ịdipho mị aḍighi bọ Sọdom rꞌaGomora!

²⁰Rꞌoniin oye kátugh mun sịphe. Ọlo Arebia dị rakiraan ólho dị kạḅile ạza ogbogo ọdi sịphe, kụ okoriom ịga ólho dị ịnam ọdi kẹḅal sịphe.

²¹Keḍighi esi dị ịnam ẹdala ịisaar ketugh rꞌesi dị aruukughum kẹlogh rutu ạbidi. Igbogh ịnun ketugh sịphe, kụ ipeleeny ịga kẹezeghi ghan rạraar phọ ọphueghi bọ eten.

²²Ibogh-otu phọ rꞌasigiga ạbudaam kemenyon ghan rꞌemoghi ạsino rꞌasuogh eḍum. Amem ophiemi ạBabilon mẹteeny! Ariiḍio ọdi remunughan kẹman.”