Read abua Azaya 16 Bible Online

Azaya 16 - abua bible

Azaya 16

¹Sịphe ẹmha phọ ạSela ẹpe ẹdala ịisaar phọ, awe phọ ạMoab ụsighe ni ruunmo ọony oyool-ọga ọghiom ọdaam mọ aJeruselem.

²Bịdi ụrol iigbom Ọphiiny Anon kụ okori ọḅile ghan oghir ooghiraan ịdipho ịnun dị ophorogh omitiom otu ạbidi.

³Bịdi ọḅeni we phọ aJuda mọ, “Ịḅeni iyoor ịlo koḍighi. Ighoph iyoor ịdipho oreeny dị ạmoogh uba dị ạpho mem ẹghologhol ogbo ootaany, kụ emeera yoor oḍigh uba esi anyina ophooghian. Yoor ughiil ẹgham kụ ụ́moogh marugh. Ạaghi iyoor esi dị oye iyoor kụ́miin.

⁴Imeera yoor ọrol aani de phọ anyina. Ighoph iyoor esi ạbuphe rọwa bọ ophiemi ayoor.” (Ịgbiphoghom rꞌophiemi ạraraar kekunughian kụ bụphe ropiemi bọ eelhe phọ ogbi ogheel.

⁵Reru reten, kụ oniin ọlo ẹemara ẹemara aDevid aḍighi ọdaam dị kapoghom we phọ ọmeeraam rꞌẹphomoghian. Ọdi kaagborion ni oḍighi ịpe eḍighi bọ elhiom, kụ ọdi kạmiin ni mọ oḍighi ghan ịdi eeleeny.)

⁶Awe phọ aJuda ọḅem mọ, “Yoor mọnaghan ni ịdi awe phọ ạMoab robaga. Yoor olegheri ni mọ bịdi awe iituma dị ologhoma igbogh, kụ obaga phọ ạbidi aḍighi ni oopho bịn.”

⁷Awe phọ ạMoab komoghi ni loor ẹmhu ịiḅaghami phọ esoorom bọ bịdi. Oomo phọ ạbidi komoghi mem dị bịdi ọotughian eeḅi eḍien phọ bịdi olhe ghan bọ sịphe ẹmha phọ aKir Heres. Koporogh ni bịdi osiemi esi dị oḍuom ologhi úlho.

⁸Iizo phọ etuman bọ Hesbon rꞌiizo iimuma avain phọ aSibma mophiemi — ireeny phọ ịpe amiim mọ ạbidi aghiigh ghan bọ bụdaam areelhe phọ. Mem dị eten iizo avain phọ ileeny ni ẹḍua kꞌẹpe ẹmha phọ aJazer kụ esi ẹpe erumuḍio phọ remite ghan bọ eḍigh kꞌologhi ẹdala ịisaar phọ, kụ ẹpe erumuḍio phọ remeel ghan bọ kꞌẹpe ạḍieri phọ ạḍighaagh Ọphiiny-Ạla phọ.

⁹Nyịidipho mị ramoghinaan iizo avain phọ aSibma, ịdipho mị amoghinaan bọ ịpe aJazer. Izin ạmi rẹkar ri ịlo aHesbon rꞌEliale, ịdi eḍighi bọ iimuma ọku ílho dị kẹngo we phọ ọḅaal ologhi.

¹⁰Rꞌoniin oye dị ologhi ạḅaal ólho iizo ade phọ ẹnuum mọ. Rꞌoniin ọ́lhooghi kẹn mꞌọ́moor ạsuor sịphe iizo avain phọ. Rꞌoniin ómiim iimuma avain oḍighi amiim; ịlooghi iboh mekunughian.

¹¹Mị odi ịkuph rꞌokururu ẹlo ạMoab, rꞌemoghi ẹlo aKir Heres.

¹²Awe phọ ạMoab roḍulha siloor ọghi ghan ịiḅereghi ẹpe ạraphan ẹeḅaraph phọ ạbidi rꞌẹpe arubughotu aruru phọ ạbidi, kụ ḍịghaagh kẹ́logh.

¹³Ḍịphe kụ adom mọ Ọmoogh-we phọ arom bọ ịlo ạMoab mem dị meten.

¹⁴Kụ nyịidipho Ọmoogh-we phọ ạḅem mọ, “Esi ịraar ạsia bịn eboom mọ ẹelha phọ ạMoab kepe ni. Esi aḍita awe ọdi, iikoma awe dị asiloor medugh kụ kosugha.”