Read abua Azaya 17 Bible Online

Azaya 17 - abua bible

Azaya 17

¹Ọmoogh-we phọ ạḅem mọ, “ẠDamaskos káḍighi mun ẹkpana ẹmha ạkiom ghisigh; ọdi kaḍighi eḅum amuphe.

²Rạmha phọ ạSiria kọḍuaghu ni kꞌagee-pọ. Bịdi keḍighi riisi dị iyool-ịga rꞌạsinam kẹḅal ghan ịḅal, kụ oye bịdi káporogh.

³Ịzirel kạ́moogh mun ẹkpar, kụ ạDamaskos kạ́moogh mun ophogha aloor phọ ọdi. Bụo ạSiria phọ okpetenaan bọ kọtol li dọl aroofola ịdipho awe phọ Ịzirel. Mị Ọmoogh-we Oomo Ịikpo phọ mạḅem.”

⁴Ọmoogh-we phọ ạḅem mọ, “Aḍio retu ni dị ạḍibugh phọ Ịzirel kesi eekuna, kụ ẹelha phọ ọdi eḍighi ekulom.

⁵Ịzirel kạkigh ozo ịbiakpa dị mọku, kaḍighi ọkpagha ịdipho ozo dị odi eḍiiny aRefaim mem dị mọokpanion ọman.

⁶Iikoma awe bịn kụ kọtol, kụ Ịzirel kạkigh oreeny-ọliv dị mọku ọman emuton ịyal mꞌịraar arughuuny lọ esugha kꞌẹpe eekuna ạnyu phọ mꞌẹphurukpu dị ọwile ẹphen ịla ude phọ. Mị Ọmoogh-we Ẹnaan phọ Ịzirel phọ mạḅem.”

⁷Mem dị aḍio phọ ạḍiphe ẹteeny, awe kokiton ni osoman Ọlemia phọ ạbidi, Oye Aghuḍuul phọ Ịzirel, mọ ạloghonaan bụno ḍịghaagh.

⁸Bịdi kóseere mun ologhi esi arenmeny phọ bịdi ọkanagh bọ rꞌạraghaagh ạbidi, rꞌesi igbudu Asera um-ạke, ḅịle rꞌesi arenmeny ọsuughi ịnsens.

⁹Mem dị aḍio phọ ạḍiphe ẹteeny, aweye ịikpara ạramha kosumughu ni ịdipho ịpe ạbuo aHivait rꞌạbuo Ạmorait phọ oghinom bọ mem mọ bịdi rọḍua bọ ḍịghaagh phọ Ịzirel.

¹⁰Ịzirel, nạ mawula Ẹnaan phọ ẹtagharan bọ nyịna, ẹḅile bọ eghoph nyịna ịdipho aḍigbogh aḍighiigh. Kpạripe ghụn nạ ạḅile rạzuph ghan iimuma roghoony iigbia ọbo nạ aaseeny ghan eeruen ẹmugh.

¹¹Kụ ghạlamo iḍighi mạar dị iimuma phọ esi eemanam ḍiniin ạḍiroor phọ ạḍiphe nạ ạzuph bọ, ịyaar ọku kẹ́tol li. Ịiḅaghami rꞌạḍikpara ạdol dị eekonom ílho bịn kụ kẹtol.

¹²Ịgbaragbara ịikpara areelhe ẹkigh ịdipho ḍịaḅa ọphiiny dị ratuḅuan rꞌẹgurom igbogh arookpoogh oologh.

¹³Erumom dị areelhe phọ rotu bọ ẹkigh ịdipho ạmuum oologh, kụ Ẹnaan ẹkpalham ghan bịdi oḅula ọman, oporogh ọḍua ịdipho ịisaar ọogaany ẹeḅaraph, ịdipho ịpherepe ookuugh iphoroḅoor.

¹⁴Dulhe oḍighi ịlo okpereghaan, rẹteeny ḍịroor bịdi mogheleghu. Ẹpe kụ eḍighieny ạtorobo ọlo ạphueghi ạḅile awum ruphua ade phọ ayira.