Read abua Azaya 21 Bible Online

Azaya 21 - abua bible

Azaya 21

¹Ḍịen adom ḍịo ạBabilonia. Ịdipho ọkaraph ookuugh dị aghugh rạḅeeny ẹdala ịisaar ẹpe esoorom mọ, amuphe kạḍua de oghiilaan kụ atu.

²Mị mạmiin ịmiin ạraraar igbagbaar dị kemite, ịmiin iikeleghian rꞌamuphe. Nyina ạbuo ẹgham Ilam, itu ozuom. Nyina ạbuo ẹgham aMedia, itu oḅinighian ozuom ọsighiogh rạmha phọ! Ẹnaan kekureri ni ịminimiin phọ ịpe ạBabilon kụ aseere bọ.

³Ịpe mị ạmiin bọ ạḅile ạnaghan sịphe ịmiin phọ mịngo ịmi oboom oghiilaan rꞌeephina, eephina ịdipho ẹlo ạnir dị oghunughun rakun.

⁴Ẹmhu phọ ạmi reeghiraan, kụ mị raakpeka loor oghiilaan. Mị ụwa ghan dị adulhe ketu, kụ ọlo ọdi ịmi ịyaar úruom emuton okpereghaan.

⁵Sịphe ịmiin phọ mookolobian ẹyaal; ọde igbidagbida arukpe dị aruuruen phọ ọomaghagh bọ kọtolom. Bịdi role ḅịle rọpughol. Ekperenom, bịn ẹḍogh ẹlho mọ: “Buḍiemiom, iikolobian ịsuaram anyina!”

⁶Pọ kụ amem dị Ọmoogh-we phọ ụḅeni ịmi mọ, “Kịa aseere oye okori kụ ạḅeni mọ ạghaaph ghan ịlo ọdi rạmiin.

⁷Eḍighi ịyaar dị ọdi ạmiin we dị oḍiku ịnam-ạsu kụ rotu, ịyal ịyal awe nyoniin, dị rokiilom ịnam adool rꞌạsikamel, ọdi kạmaar apogh bịdi akiririom.”

⁸Okoriom mọ ạlho ạmagh mọ, “Ye phọ, mị odi ghan rakori sịen ḍikori ḍughul rꞌootaany.”

⁹Ekperenom, bịn bịdi mosi sịen! Awe ịnam-ạsu phọ, ịyal ịyal. Kụ okoriom mọ ạkaaph amitiom mọ, “ẠBabilon mameel! Oomo ịkaaghineen ạrumugh phọ bịdi ọoḅereghi ghan bọ memeleghu eḅomoghian sịphe ude phọ.”

¹⁰We ạmi Ịzirel, inyina mọponyon ịdipho ikpo ịbiakpa, kụ nyịidipho mị magbeel ịḅeni inyina ooḅi ọghaaph phọ dị mị mạnaghan esi Ọmoogh-we Oomo Ịikpo phọ, Ẹnaan phọ Ịzirel.

¹¹Ḍịen kụ adom ḍịo Idom. Oniin oye ụmagh ịmi kꞌẹpe Idom mọ, “Okoriom, eeghe ẹnum amem kụ isugha ḍughul phọ? Ụḅeni ịmi ọdo amem dị esugha ḍughul phọ?”

¹²Kụ mị ạpagharanaan mọ, “Ạḍiroor rẹḅaal li kụ aḍughul kẹḅile ni ekul. Eḍighi mạar dị nạ ạwa ọḅile opuru, ḅula kụ apuru.”

¹³Ḍịen kụ adom ḍịo Arebia. Nyina awe aDedan, bụphe arugbogo erelhe ạbidi edi bọ sịphe ọkpagha arere phọ Arebia,

¹⁴ịngo mụum bụphe ạmuum rạpu bọ, bụphe oḍigh bọ ḍibuo anyina. Nyina awe ade phọ ạTema, ịngo ghan eḍien ruuruen phọ.

¹⁵Awe rokiil okpetenaan arolhool ẹgham dị mookolobian ọziom ạbidi, okoronaan ạsikumugh dị mọkpamaghi ọraph, ọḍua esi oomo omuzaan aḍuugh ẹgham.

¹⁶Kụ Ọmoogh-we phọ ụḅeni ịmi mọ, “Esi aḍiniin ạlha bịn igbogh phọ arughunughun phọ aKedar kesi ni eekuna.

¹⁷Awe ạsikumugh phọ kụ awe ẹkpar phọ aKedar, kụ iikoma ạbidi bịn kụ kosugha. Mị Ẹnaan phọ Ịzirel Ọmoogh-we phọ kụ mạḅem.”