Read abua Azaya 22 Bible Online

Azaya 22 - abua bible

Azaya 22

¹Ḍịen adom ḍịo esi phọ oghol bọ mọ Eḍiiny Ịmiin phọ. Eeghe kụ remite? Uḍighi ika kụ oomo awe ẹmha phọ ọmoogh bọ ọḍe ạnyu aruutu phọ?

²Oomo ẹmha phọ edi esi ịgbaragbara, ọyugh rꞌighiil iboh kụ imuza. Awe phọ anyina omuughu bọ sịen ẹgham mọ ẹphen úmugh erugh ẹgham.

³Oomo abuḍiemiom mọ anyina rosumughu mem dị rꞌekpo ẹkpina kọ̋raph kụ osiphi bọ.

⁴Nyịidipho ụwile ịmi bịn ụkaraghi umoghinaan oomo awe phọ ạmi momuughu bọ. Kẹ́wa ọodereghi ạmi.

⁵Ọphon amem okpereghaan, emeel, rꞌịgbaragbara sịphe Eḍiiny Ịmiin phọ, kụ Egbogh Ẹnaan Oomo Ịikpo Ọmoogh-we phọ kụ uruom iyira. Iikpe ẹmha phọ ayoor monyuughi, kụ emoghi ọwaam ọloghonaan ạḍighaagh memenyon igbo ạraaḅaraph phọ.

⁶Ạbuo ẹgham ẹpe ade phọ Ilam ughiilom ịnam-ạsu kụ oru, ọkparamian ḍịghaagh sịkumugh rꞌịkpina. Awe ẹgham ade phọ aKir ụpham ni ịsuaram ạbidi.

⁷Sịphe ariḍiiny ẹnuum mọ aJuda arughuugh ẹgham kụ imuza. Ạbuo ẹgham ọman ịnam-ạsu ụmeera ghisigh ạrunhu-aḍibuo phọ aJeruselem.

⁸Oomo arikpisi ẹkpar phọ aJuda emeleghu eetughuḍian. Mem dị ịpe phọ emite bọ, nyina ịghi ni sịphe rosereghi ghan bọ rẹenema ẹgham mọ ẹsighiogh emiteghom.

⁹Nyina ịmiin ni mọ uḅomoghi ni ịbadi ariisi iikpe phọ aJeruselem. Nyina ịiḅeghion ni ephogh oomo aruutu phọ ịsiphe Jeruselem kụ enyuughi iniin eler ịlo ọmoogh ipoḍi asighiigh oselemiom iikpe ẹmha phọ. Ịlo oseerian ạmuum,

¹¹nyina eguph ooni ologhi ẹmha phọ ooko ghan ạmuum mọ rakil bọ ẹpe ogbaany ọodu phọ kasoor. Kụ ọlo nyina ízuumaam íphogh Ẹnaan, nyọpo agbiighi bọ oomo ịphen kꞌageedi kụ aḍighi ịdi ịphen phọ emiteghu.

¹²Egbogh Ẹnaan Oomo Ịikpo Ọmoogh-we phọ ịmagh ghan inyina mem mọ ọpo mọ imoghi rꞌọto, ịlo oghula ạrumhu anyina kụ oonmenan iinmenan ọto.

¹³Kpạripe ghụn, nyina ịmilogh ghan elhe ẹyaal. Nyina ịze ghan iyool-ịga rꞌạsinam ạany, ẹḅile ẹphughol miim. Nyina ẹḅem mọ, “Ẹkpe ni olhe rꞌọphughol. Ọori iḍue yira komuughu ni.”

¹⁴Egbogh Ẹnaan Oomo Ịikpo Ọmoogh-we phọ rꞌaloor ụḅaanaan ịmi kụ ạḅem mọ, “Ịkaraph phọ ịphen kọ́sar ọ́bilenaan bịdi tụtu bịdi ọkpo omugh. Mị Egbogh Ẹnaan Oomo Ịikpo Ọmoogh-we phọ mạḅem.”

¹⁵Egbogh Ẹnaan Oomo Ịikpo Ọmoogh-we phọ ụḅeni ịmi mọ kịa kꞌaSebna, uwo ẹmhu ịtooghi ọto kꞌọdaam mọ kụ ạḅeni mọ,

¹⁶“Nạ ragbi ghan mọ nạ eeghe oye ạnhian? Nạ ụmoogh eeghe elhiom oguph oḍi ọlo aloor ạna sịphe ọogaany ẹeḅaraph asighiigh phọ?

¹⁷Iini sịen nạ ạman ni ịyaar, kụ ọlo Ọmoogh-we phọ kaḍighiron nyịna atoph.

¹⁸Ọdi kakilemi nyịna ịdipho ạbol kụ aroph nyịna ạlogh eelhe dị ẹbughom. Nạ kamugh ni ẹpe phọ sịphe ịigaany arughuugh ẹgham mọ nạ abagaam ghan bọ. Nạ asiphe umugholoor ọto kꞌuw-otu phọ ạna.

¹⁹Ọmoogh-we phọ kạar ri nyịna oḍighi phọ ạna kụ asooromi ḍigbogh ạdol phọ ạna.”

²⁰Ọmoogh-we phọ ạḅeni Sebna mọ, “Mem dị ịpe emite, mị katom ni ọmagh otelhedom ạmi Ẹliakim ọony phọ ạHilkaya.

²¹Mị kạsighe ạsuoma rꞌokuughaam oḍighi phọ ạna ạkpologhi nyọdi kụ ạḅogh oomo ịikpo phọ nạ ạmoogh ghan bọ ạngo nyọdi. Ọdi kạkigh ịdipho ọde awe phọ aJeruselem rꞌaJuda.

²²Mị kạngo nyọdi ịikpo dị emunughan ọrolom eeḍian ọdaam mọ, nyọpo ẹemara ẹemara phọ aDevid. Ọdi kụ kạpam ịsabi otu iiḍighi phọ: kụ esi lọ ọdi aghughi, oye kákughuron.

²³Mị kạlogh ezen ạkparami nyọdi ịdipho ẹkan, kụ ạdol arughuenian ẹdaph nyọdi eḍigh oomo eghun phọ ọdi.

²⁴“Kụ asiya phọ ọdi rꞌạbuo ọngaani phọ koḍighi dool ọdi. Bịdi koyororom ghan nyọdi ịdipho asuugh rꞌạrukpa dị ọkomoghi loor ọkereriom!

²⁵Mem dị ịpe emite, ẹkan phọ ẹpe ọkparamiom bọ ni ezen phọ kẹkporan ni emeel. Kụ ịpe keḍighi eekuna oomo ạraraar phọ ịpe ẹkomogh bọ ạnyu ọdi.” Ọmoogh-we phọ mạghaaph.