Read abua Azaya 25 Bible Online

Azaya 25 - abua bible

Azaya 25

¹Ọmoogh-we, nạ kụ Ẹnaan ạmi; Mị kaghueni nyịna kụ aboom ḍien phọ ạna. Nạ ạkaraghi aḍighi rạraar iikia; nạ ạkaraghi aḍighi ạman ịpe nạ agbiighi bọ kꞌamem dị meten ebia.

²Nạ makiton igbogh ạramha aḍighi ịzeghe kụ apiemi riisi ẹkpar phọ ạbidi mem ẹgham. Arigiga ạbudaam ạbumulogh-ḍien phọ ayoor ọlogh bọ memeleghu kụ rọ́logh mun kꞌagee-pọ.

³Awe areelhe ịikpo koboom ni nyịna; koghiilaan nyịna sịphe ạramha ịkaraph areelhe phọ.

⁴Arukulom mọ rꞌạbuphe ẹloghonaan phọ ílho bọ ạḍighaagh moghiil otu esi ạna kụ mọmoogh pẹleeny mem ịiḅaghami. Nạ ạngo bịdi oghoph mem oghim rꞌuba ọrol mem oophoogh ẹghologhol. Ạbukaraph awe rozuom ghan ịdipho oghim mem unu,

⁵ịdipho ekuom ạmuum ḍịgharaghar ade. Kụ ọlo nạ, Ọmoogh-we, makpomori ni rụnhu ạbumulogh-ḍien phọ ayoor; nạ akpereghi ịlooghi ạbukaraph awe phọ, ịdipho ọotu rạpoomi ghan bọ ḍio dị rẹkologhol.

⁶Sịen Eegum phọ ạZayon Ọmoogh-we Oomo Ịikpo phọ kaakolobian ni olhe ẹyaal ẹlo oomo areelhe aḅirini phọ — malhe ẹyaal dị eḍien phọ ẹkar emunughan rꞌọkaraghi amugey amiim.

⁷Ịsien phọ kụ edi ọdi kakpoghoron ạsighe egina amem ọotu ọto phọ akoom bọ oomo areelhe phọ.

⁸Ẹnaan Oomo Ịikpo Ọmoogh-we phọ kapiemi ni ḍuugh kꞌagee-pọ! Ọdi kagbuurogh ni izin riḍien oomo awe kụ ạsighe dọl umugholoor phọ awe phọ ọdi ọrol ghan bọ sịphe oomo aḅirini phọ. Ọmoogh-we rꞌaloor mạghaaph!

⁹Mem dị ịphen emite, tọrobo oye kạḅem ghan mọ, “Ọdi kụ Ẹnaan ayoor! Yoor mọkpasi oḍuom ologhi ayoor esi ọdi. Ọdi kụ Ọmoogh-we phọ. Ọdi mụtagharan iyoor kụ nyịidipho yoor mọmoogh ọḅaal ologhi rꞌiboh ịdi eḍighi bọ ọdi mụphel iyoor.”

¹⁰Ọmoogh-we phọ kaako ni Eegum ạZayon, kụ ọlo kọozeghi ni we phọ ạMoab ịdipho rọozeghi ghan bọ ịikpo ịbiakpa meḍighi atopha esi ạraraar dị ọde ude ọngo ẹnuum de phọ.

¹¹Bịdi kosele ni rạghaagh ạbidi omitiom mụdi rọwa ghan ọmughi ạmughi, kụ Ẹnaan keefolomi ni bịdi, kụ ạraghaagh ạbidi keḅi ni bin ekeel.

¹²Ọdi kapiemi ni riisi ẹkpar phọ ạMoab rꞌiiphopha iikpe phọ ạbidi, kụ ọkororo omeleghu osuma ọoru.