Read abua Azaya 26 Bible Online

Azaya 26 - abua bible

Azaya 26

¹Aḍio retu ni dị awe phọ kọmoor ḍụor phọ aḍien sịphe ade phọ aJuda: Ẹmha ayoor ẹmha ịikpo! Ẹnaan rꞌaloor kụ ẹkpar iikpe ọdi!

²Ikunyon rụnhu-aḍibuo iikpe ẹmha phọ kụ emeera eelhe dị ẹmoogh ọmeeraam oḍigh, eelhe dị awe ọdi roḍighi ghan bọ ịpe eḍighi bọ elhiom.

³Nạ, Ọmoogh-we, ạngo ẹepho dị emunughan bụphe ọpham bọ ogbi ạbidi ọkparami kụ ọkpasi bọ oḍuom ologhi ạbidi esi ạna.

⁴Ḍuom ologhi Ọmoogh-we phọ kꞌagee-pọ; ọdi kụphel li iyoor oomo amem.

⁵Ọdi masooromi bụphe ophoophe ghan bọ siloor; ọdi apiemi ẹmha ịikpo phọ bịdi orugh bọ, kụ alereghi iikpe phọ eḅomoghian sịphe ophugh phọ.

⁶Bụphe ọmiine bọ otelhe ghan bịn roten ạnyu ọdi nyịidipho kụ ọozeghiom nyọdi rạda aruwol ạbidi.

⁷Ọmoogh-we, nạ aḍighi eten dị ẹḅonan ẹlo abugey awe; eten phọ bịdi orelhe bọ eeleeny.

⁸Yoor ọdaph ịto ạna kụ ọkpasi oḍuom ologhi ayoor esi ạna; nạ kụ oomo ịpe yoor rọwa bọ.

⁹Mem aḍughul mị ạwa nyịna rꞌoomo ologhi ạmi; mem dị nạ asophonaan ọoruen de phọ rꞌawe ọdi, oomo ạbidi kọtuugha ni ịdi ọoruen aru.

¹⁰Ghạlamo nạ raḍighi ghan iiḅi bụkaraph awe, bịdi rọ́tuugha ghan oḍighi ịpe esel bọ. Ghạlamo ịsien ade awe aruukuan phọ ni bịn bịdi ọḅile ni roḍighi ịkaraph; bịdi okel ologhoma igbogh phọ ạna.

¹¹Ạbumulogh-ḍien ạna úlegheri mọ nạ kạliom ni bịdi; Ọmoogh-we, lọgh bịdi esi umugholoor, bịdi ọmiinom; ḅịle bịdi ọmiinom ọliom mọ nạ aakolobian bọ. Ḍeenaan ịdi nạ ạphomoghian we phọ ạna.

¹²Nạ kụngo iyoor edughom, Ọmoogh-we; tọrobo ịyaar lọ yoor orue oḍighi ịḍua esi ịpe nạ aḍighi bọ kụ emite.

¹³Ọmoogh-we Ẹnaan phọ ayoor, ạbunon kụ ụda ghan iyoor, kụ ọlo nạ bịn kụ Ọmoogh-we phọ ayoor.

¹⁴Nyịidipho bịdi momugh kụ kọ́tol mun eye; aruwaloor ạbidi kéḅerenu, ịdi eḍighi bọ nạ mạlhiom apiemiom bịdi. Oye bịdi rꞌamem rạ́atughian ghan mun.

¹⁵Ọmoogh-we, nạ maphoophe eelhe phọ ayoor, rạteghe ghan tọrobo ạga, kụ ịphen phọ meruom nyịna eghuan.

¹⁶Nạ ụliom we phọ ạna, Ọmoogh-we, kụ rꞌamukum ologhi bịdi ọoḅereghi ọngo nyịna.

¹⁷Nạ, Ọmoogh-we, maḍighi ịdi yoor omoghi omitiom, ịdipho ạnir dị oghunughun rakun ramoghi ghan bọ kamitiom loor eephina phọ.

¹⁸Yoor ụrol esi eephina rꞌịminimiin, kụ yoor ịyaar ụ́moogh; Eghạm dị ade phọ ayoor ọkpar opu ílho, kụ rꞌịyaar dị yoor ọphamanan ílho.

¹⁹Awe phọ ayoor momuughu bọ kọḅile ni omite! Aruzu ạbidi keḅula ni ẹmoogh ghuḍum. Oomo ạbuphe rọnaani bọ ologhi ariiḍi phọ ạbidi koḅerenu ni kụ ọmoor sụor iboh. Ịdipho ọnmananmana ọotu phọ rạpoomi ghan bọ de phọ, ịdipho kụ ịdi Ọmoogh-we phọ kạngo ghuḍum bụphe momuughu bọ kꞌageediidi phọ.

²⁰Weye ạmi, iḍiku iloghi aruutu anyina, eghughiom siloor anyina. Ịbooghian mọony ekulha amem tụtu ọghagh ologhi phọ Ẹnaan aagbenyenu.

²¹Ọmoogh-we phọ ạḍua marugh ọdi kꞌạke ratu ịlo ọlhiom awe ade phọ esi ịkaraph ạbidi. Ịḅaal dị ozu esi ịbooghian sịen ade phọ kogananami ni kụ ade phọ kẹ́booghi mun bụphe mọze bọ.