Read abua Azaya 28 Bible Online

Azaya 28 - abua bible

Azaya 28

¹Moruule ọmar phọ Ịzirel! Eegu ọdi reḍim ịdipho ẹnighe ịizughum afalawa loor ẹmhu abuḍiemiom ạbupughol miim mọ ọdi. Rụmu obagaam mọ ạbidi ogbul li rolho eeḅi eḍu. Amiim mọ rạze bịdi kụ omeleghu.

²Ọmoogh-we phọ ạmoogh ni oniin ọokpara rꞌịikpo dị maakolobian ozuom ạbidi ẹgham, dị katu ịdipho oghim iiḅoghoḍi ibikpo, ịdipho ogbogh ọlophia, ịdipho okiilia aḍigho dị aleeny eleeny, kụ ạtoph de phọ.

³Obaga ạbupughol miim abuḍiemiom mọ, kọozeghiom rạda aruwol ọḅararami.

⁴Eegu abuḍiemiom mọ robaga bọ reḍim kụ kepe ịdipho ịḅel iimuma ạfig dị rẹḅaal bịn mọku olhe ọman.

⁵Aḍio retu ni dị eegu Ọmoogh-we oomo ịikpo phọ kẹkigh ịdipho eghoony ọdaam mọ esi awe phọ ọdi okpetenaan bọ.

⁶Ọdi kạngo ologhi iiḅi ịiruen buugboom ịiruen, ḅịle rꞌạkpo ologhi ugheel ẹkpar ạrunhu-aḍibuo ẹmha phọ.

⁷Ghạlamo ariil uḍien rꞌariil ạrikia phọ, bịn amiim maghiigh iboom dị rọbelebele. Bịdi mọphughol muboom ạmuya rꞌạmugbagara amiim, kụ mokpetaan ịgbaragbara. Ịpughol mẹsighe riil uḍien phọ dị ịlo ọnaghan mun ọghaaph ịmiin phọ Ẹnaan rẹkiom ghan bọ ílho, kụ ariil ạrikia phọ amiim maghiigh, dị ịlo oogbo ịiruen asighiton lọ ọghiom bịdi ílho.

⁸Mozuughiom izuughi ịdaabili phọ bịdi rọtolom ghan bọ, kụ rꞌesi dị ẹḅaal ísugha.

⁹Bịdi rụnunom ghan ịmi. Bịdi rọḅem ghan mọ, “Oye phọ ọpo ạatughian mọ ọno rạtughemi ghan ạnhian? Ạnhian kụ rạwa dom ọdi? Adom mọ ẹnighenaan ịbam ạnmuny dị pụruku oghine mạmaam!

¹⁰Ọdi rạkpar ghan ọtughemi ayira ekpo ạḍikool etum ekpo, ịyaar etum ịyaar, ịtuugha etum ịtuugha.”

¹¹Eḍighi mạar dị nyina ịmi kị́naghanan, pọ Ẹnaan kẹsighe ruuruen dị rọḅa iiruen ạrunhu kụ ịtughemiom inyina ịlo ẹkpe.

¹²Ọdi ạwa ni ọngo oomo anyina ẹereegh rꞌịma, kụ nyina eghel ọnaghanan ọdi.

¹³Ịdipho kụ iḍighi kụ Ọmoogh-we phọ kịtughemi bọ inyina ekpo ạḍikool etum ekpo, ḍịkool etum ḍịkool, ịyaar etum ịyaar. Pọ kụ amem dị nyina kekpetaan ghan rꞌạtorobo ẹda dị nyina ẹgbatan. Kiḍighi ni inyina rạraar elegh, iikoroghi inyina ọlogh ikoli.

¹⁴Nyịidipho nyina awe obaga phọ rẹtooghi bọ rạraar sịen Jeruselem kẹngo we phọ ạbuen, iler rụru esi ịphen Ọmoogh-we phọ rạḅem bọ.

¹⁵Nyina rebaga ghan mọ nyina meghiran ịyo rꞌaḍuugh kụ ẹḅophan rꞌọmar iḍim. Nyina emeeraam mọ amuphe inyina kị́teeny mem lọ ọdi aru, ịdi eḍighi bọ nyina eḍuom ologhi mọ ọkpe rꞌiigbegheḍiom kịngo ni inyina pẹleeny.

¹⁶Nyịidipho, ịphen kụ ịdi Ẹnaan Oomo Ịikpo Ọmoogh-we phọ ạḅem: “Mị rapighi sịphe Zạyon ephighiom dị emiigh kụ ẹkpar. Mị ragim sịphe ẹko ogbo dị ẹpe ạnyu phọ ọge ikpo ọnhu phọ ịphen, ‘Omeeraam dị ạkpar ạḅaram kẹn ni ọkparam.’

¹⁷Iiḅi ịiruen kụ keḍighi oḍigh ọtoom ephighiom mọ, kụ ọgba igey aḍighi oḍigh oolemiom ọdi.” Iiḅoghoḍi ibikpo kekilom ẹsighe oomo ọkpe phọ nyina eḍuom bọ ologhi, kụ ạrumuum aḍigho epiemi ẹkpar phọ anyina.

¹⁸Ịyo phọ nyina eghiran bọ rꞌaḍuugh kokunughi ni, kụ ọḅoph ọnhu phọ anyina rꞌọmar iḍim mọ koogbonyon ni. Mem dị amuphe aru ekperenom kizuoghom ni inyina kọkpar ri opu.

¹⁹Kabugh ghan bịn ạḅile abugh, ạḍiroor etum ḍịroor. Nyina kẹkparam ghan ḍughul rꞌootaany. Tọrobo aḍimoom adom dị ẹḍua kꞌẸnaan kẹpam ghan emoom ịyaar oghiilaan!

²⁰Nyina kẹkigh oye esi aḍidogh dị ạkparagha ghan ọmina ẹmina dị ekper ẹphughan osele owol, rꞌọkololoony ukpe ẹghologhol dị ụ́manam ozua.

²¹Ọmoogh-we phọ kabe ni ịdipho ọdi aḍighi bọ ẹpe Eegum aPerazim rꞌịsiphe Eḍiiny phọ ạGibion, ịlo oḍighi ịpe ọdi agbiighi bọ oḍighi phọ — ghạlamo ịduon eḍighinom ạraraar ọdi eḍighi bọ ni ịlo iikia. Ọdi kạmadan ni oḍighi ịiḍaany phọ.

²²Kẹ́miloghom rụru phọ mị rịphur bọ inyina! Eru mạar dị nyina ẹmiloghom, kịkparanaan ni inyina ịlo okpetenaan. Mị mạnaghan ni igbiighi Ọmoogh-we oomo ịikpo ịlo ophiemi oomo eelhe phọ.

²³Iler rụru ẹnaghan ịphen mị rạḅem bọ; izuumaam ẹnaghanan ịphen mị rịḅeni bọ inyina.

²⁴Oḅephom ozo rágbor ghan kạghi oguphogh rꞌowul ozo phọ kụ okoriom aḍio oḅeph iḅeph.

²⁵Owul ozo phọ bịn ọdi ạzuph ịikiripha ịdipho ọoza rꞌoobian. Ọdi ạzuphogh ịbadi ọdo ịbiakpa ạkoolomi, kụ rụuku phọ ọdi ạzuph ọnon ọdo ọbiakpa.

²⁶Ọdi alegheri ịlo oḍighi oḍighi phọ ọdi, ịdi eḍighi bọ Ẹnaan mẹtughemi ni nyọdi.

²⁷Ọdi rạ́akpaam ghan egbogh ẹḅam ikpo ịizupha phọ, ọdi rạakpaam ghan ẹbam ẹḅam dị ẹtuugh ẹrol omitiom ikpo ọoza mꞌoobian; kpạripe ọdi aḍighinom ireeny dị eephoogh ẹḅile eeleeny.

²⁸Ọdi rạponyon ghan ịlo ikpo ịbiakpa phọ keḅomoghian; kụ ọdi alegheri ni ịdi oghiilom oghuugh ọponyonom mọ kụ ikpo ịbiakpa phọ képuughi.

²⁹Ọmoogh-we Oomo Ịikpo phọ kụ ạngo bọ oomo olegheri-ịyaar phọ ọphon. Igbiighi phọ Ẹnaan ịlo olegheri-ịyaar, ḅịle reḍighi ghan ni igey.