Read abua Azaya 30 Bible Online

Azaya 30 - abua bible

Azaya 30

¹Ọmoogh-we phọ mạghaaph: “Moruule bụphe ọda bọ Juda ịdi eḍighi bọ bịdi mụgbagharan ịmi. Bịdi rọdaph igbiighi dị mị kụ ụ́ngo kụ ọḅile ọgeeghian rịnya ạmuḅoph dị ịmi ị́ḅeeraan, rọḅam ghan iniin ịkaraph ạnyu ịnon.

²Bịdi ọki mọ Ijipt ọloghonaan bụno ḍịghaagh dị úpuru oroma ọlo ạmi. Bịdi rọwa mọ Ijipt ooko bụno; esi ịduon phọ bịdi mọkpasi oḍuom ologhi ạbidi esi ọdaam mọ Ijipt.

³Kụ ọdaam mọ kạ́moogh ịikpo ọloghonaan ạbidi ḍịghaagh, kụ eekoom mọ Ijipt kekunughiom muphe.

⁴Ghạlamo ịduon abutelhedom mọ ạbidi mosi bọ ni Zoan rꞌaHanes rạmha phọ Ijipt,

⁵awe phọ aJuda komoghi ni mọ ạbuno upu ni bịn oḍuom ologhi eelhe dị rebi ghan bụno mem lọ bụno rọwa ọloghonaan ạḍighaagh.”

⁶Ḍịen kụ adom Ẹnaan ịlo ịnam ade ịisaar ẹpe esoorom mọ: “Abutelhedom mọ urelhe ọḅeeny eelhe aḍuugh-aḍuugh, ekpisi dị ạnam-dịka ediighi, ekpisi dị ilhom ạrakaraph-ạraraar rꞌịpheepheeny asinonom edi ghan. Ịnam adool rꞌạsikamel ạbidi ịsaany ghan ruunmo dị ẹman ikpoki ọghiom eelhe dị kẹ́ngo bịdi rꞌẹnum ọloghonaan ạḍighaagh.

⁷Ọloghonaan ạḍighaagh Ijipt oopho ni bịn. Esi ịduon phọ, mị mạta Ijipt mọ ‘Ọphoneen Anonom.’”

⁸Ẹnaan ịḅem mọ mị ụge ụlogh ḍịnya ịpe awe phọ ạbuen ọrol bọ, ọbo ẹtol olegheriom mọ bịdi ịkaraph awe.

⁹Bịdi odi ghan oomo amem ọgbagharan ghan Ẹnaan, ọgba ghan ọkpe, rokel ghan olher ạruru ọnaghanan Ọmoogh-we phọ.

¹⁰Bịdi rọḅeni ghan riil phọ Ẹnaan mọ oḅoorian. Bịdi rọḅem ghan mọ, “Iyoor kị́ḅeni ịlo eḍighi elhiom. Ịḅeni ghan iyoor ịpe yoor rọwa bọ ọnaghan phọ. Ịbile yoor ọphamanam dọl iikeleghian phọ ayoor.

¹¹Ịkporion iyoor rạghaagh, ẹwile oghughi ghan eten ayoor. Yoor ụ́wa ọnaghan ịlo Ẹnaan anyina, Oye Aghuḍuul phọ Ịzirel.”

¹²Kụ ịphen kụ ịdi Ẹnaan Oye Aghuḍuul phọ Ịzirel ẹḅem: “Nyina ẹḅitonaan ịpe mị ịḅeni bọ inyina kụ eḍuom ologhi ọwa asighiton rꞌamabi.

¹³Erugh miphum inyina. Nyina ẹkigh ịdipho iiphopha iikpe rꞌesi dị eruphaan kꞌạnyu resoor ude; nyina kemeel li ekperenom.

¹⁴Nyina keetughuḍian ịdipho oko dị ameel aḅomoghian ịdi rꞌọpherepe lọ ạmanam ọghophom ạnian kạ́tol, ọkorom kẹn ạmuum ẹepe.”

¹⁵Ogbogh Ọmoogh-we, Oye Aghuḍuul phọ Ịzirel rạḅeni ghan we phọ mọ, “Itigheel kụ eḅoorian iḍuom ịmi ologhi kụ nyina ẹmoogh ịnyaam rꞌạpeleeny.” Kụ ọlo nyina ímeera!

¹⁶Kpạripe, nyina igbiighi oḍiku ạrusu eegborion eghiil kụ okpetenaan ạbumulogh-ḍien phọ anyina esi oghiilom ạrusu dị reegborion. Kụ nyina ị́pioman — okpetenaan kụ ịyaar dị ẹkpe oḍighi! Nyina ẹetughian mọ ạrusu anyina keegborion ni ịdi ẹkasian, kụ olọ bụphe riphorogh bọ inyina koogborion ni opu!

¹⁷Oniin ọonir anyina kokiil li ọḍua mem dị nyina ẹmiin oniin nyoniin ọlo ẹgham ạmulogh-ḍien phọ ạbidi, kụ oogh ạbuo ẹgham kọkasian ni oḍighi ịdi oomo anyina kekiil ẹḍua. Ịyaar késugha esi awe ẹgham mọ anyina emuton ogina oreeny ạlagba sịphe ạnyu ẹeḅaraph phọ!

¹⁸Kụ ghạlamo ịduon phọ ni bịn Ọmoogh-we phọ rakori ni ọnma anyina ighirigiir. Ọdi ạnya ni ọsenyaan anyina ịdi eḍighi bọ ọdi raḍighi ghan ịpe esel bọ oomo amem. Ọḅaal ologhi odianaan bụphe ọkpasi bọ ologhi ạbidi esi Ọmoogh-we phọ.

¹⁹Nyina awe phọ erugh bọ Jeruselem, emoghi anyina memuneen. Ọmoogh-we phọ ạmoogh ni igbiririph, kụ mem dị nyina emoghi ẹmagh nyọdi mọ ạlogh ḍịghaagh, ọdi kịnaghanan ni inyina.

²⁰Ọmoogh-we phọ kaḍighi dị nyina kẹmiinom, kụ ọdi rꞌaloor kạtol li sịphe ọtughemi ghan anyina, kụ kéḍighi mun ịdi nyina kụ kẹḅile ghan ẹwa nyọdi.

²¹Eḍighi mạar dị nyina ephe eten phọ ẹghi elhiom mꞌekeeny, pọ nyina kẹnaghan ni ẹḍogh ọdi ọman anyina dị rẹḅem ghan mọ, “Ịsien kụ eten phọ. Ịdaph nyọdi.”

²²Nyina kẹsighe nmụny aghuḍuul phọ anyina ọdamaghiom bọ silva rꞌạnmuny aghuḍuul phọ anyina okpoghom bọ gol kụ etoḅologhi ịdipho ẹenir, kụ ẹlooghi mọ, “Ịḍua sịen egbodo ạmi.”

²³Tọrobo amem lọ nyina ẹzuph iimuma phọ anyina, Ọmoogh-we phọ kaseere ni ọlophia oḍighi ịdi kemite kụ ịngo inyina ibugha dị esoor, kụ ịnam mọ anyina kẹmoogh tuboom ạroogho ọḅal.

²⁴Ạsinam mọ rꞌịnam adool phọ rebul ghan iizo phọ anyina kelhe ịma rꞌigey ariiḍien ịnam.

²⁵Ḍio phọ kọsighiogh bọ riisi ẹkpar ạbumulogh-ḍien phọ kụ ọze we ạbidi, ạmuum kakil li amite sikol ạtorobo eegum rꞌẹeḅaraph.

²⁶Ụnwanyu phọ kạmu ịdipho erumuḍio phọ, kụ erumuḍio phọ kẹlagharan oḍual amem epu ịpe edi ghan bọ, ịdipho ạḍiḅaal oḍual aḍughul-otu ḍiniin aḍio. Oomo ịphen phọ kemiteghu mem dị Ọmoogh-we phọ mạghoroghi aakonom riisi phọ ọdi aḍighi yogh bọ siloor awe phọ ọdi.

²⁷Rọmiin ghan ni ịikpo rꞌeegu Ọmoogh-we phọ kꞌesi dị ẹkel. Ạnian rꞌạmughi kụ reḍeenaan ghan ọghagh ologhi ọdi. Ọdi ạḅa ikpo ọnhu reemor ghan ịdipho ạnian.

²⁸Ghisigh ọdi ratom ghan ookuugh ịdipho ạmuum-aḍigho dị rakilom ghan tọrobo ịyaar kạsighe. Aḍigho rekilom ghan reelhe kephiemi kụ kekunughi ịkaraph igbiighi phọ ạbidi.

²⁹Kụ nyina awe phọ Ẹnaan kẹḅaal ologhi kụ ẹmoor sụor ịdipho eḍighinom aḍughul ẹyaal iigbia. Nyina kẹmoogh ọḅaal ologhi ịdipho ạbuphe ropula ghan bọ ịbam aruuḍue roten kọghi Ogbogh Otu ịiḅereghi Ọmoogh-we phọ, ọsuaram mọ Ịzirel.

³⁰Ọmoogh-we phọ kaḍighi ni ịdi tọrobo oye kạnaghan ẹḍogh igbogh phọ ọdi kụ aloghoma ịikpo ọghagh ologhi phọ ọdi. Asinem ạnian, ekperenom ogbogh ọlophia, iiḅoghoḍi ibikpo, rꞌoghim kẹtol li.

³¹Bụo Asiria phọ kokpereghaan ni mem dị bịdi ọnaghan ẹḍogh Ọmoogh-we phọ kụ ologhoma ḍiphin ẹliomom mọ ọdi.

³²Ịdipho Ọmoogh-we phọ katomoghi bọ bịdi, awe phọ ọdi koti ghan iitia rꞌephegh ạrakama rꞌạrene phọ. Ẹnaan rꞌaloor kebianan ni bụo Asiria phọ.

³³Mem dị meten ebia, uukolobian ni ekpisi dị aḍiboom ạnian kele ọdaam eelhe phọ Asiria. Esi phọ ẹkel kụ ẹtegh, kụ okpol egu ịpe ḍi aḍiphooghu Ọmoogh-we phọ kẹkpooniom nịan.