Read abua Azaya 34 Bible Online

Azaya 34 - abua bible

Azaya 34

¹Weye oomo areelhe phọ, itu! Iikpomoghan ẹnaghan. Oomo ade phọ rꞌạtorobo oye lọ odi sịphe aru ạnaghan!

²Ọmoogh-we phọ rạkagham ni ologhi oomo areelhe rꞌoomo awe ẹgham ạbidi. Ọdi maghel bịdi aseenaan ophiemi.

³Iḍim mọ ạbidi kóḍiighi, kụ kẹtol sịphe ẹḅoroghu ghan epurogh; kụ aruugum mọ kẹtogh rꞌịḅaal.

⁴Erumuḍio phọ, ụnwanyu phọ rꞌạraanaan phọ keetughuḍian eten ophugh. Okuaḍio phọ kape mụdi ọodoony opoḍi ạḍinya dị okpooghi, kụ ạraanaan phọ ẹkar mụdi ạrinya ạfig dị ẹḍua ạnyu oreeny-ạfig mꞌavain.

⁵Ọmoogh-we phọ maakolobian elhool ẹgham ọdi ẹpe kꞌạke, kụ nyịidipho kasoorom weye Idom mọ ọdi maghel bọ aseenaan mọ ophiemi phọ.

⁶Elhool ẹgham mọ ọdi kẹetoghoḍiom ịḅaal rꞌẹnuum mọ ạbidi, ịdipho ịḅaal rꞌẹnuum ạnmuny iyool-ịga rꞌạrutu-ịga dị ọphighironom ẹkia. Ọmoogh-we phọ kạpighiron ẹkia phọ ẹphen sịphe ẹmha phọ aBozra; ọdi kaḍighi ẹmha phọ ẹphen egbogh esi ọze ghan ịnam sịphe ade phọ Idom.

⁷Awe phọ komeleghu ịdipho ilhom ạsinam rꞌalephiri ugheel ạsinam kụ ade phọ ẹtoghom ịḅaal kụ ẹnuum ẹtoph.

⁸Ọphon kụ amem mọ Ọmoogh-we phọ kạtagharan bọ Zạyon kụ aḍighi aḅulemian bụmulogh-ḍien ọdi.

⁹Ạriphiiny phọ Idom kẹnamaghan, kụ ade phọ eten sọlfa. Oomo ade phọ kẹemor ịdipho akolta.

¹⁰Ẹmha phọ keemor ghan ootaany rꞌaḍughul, kụ ạmughi amite ghan kꞌagee-pọ. Ade phọ keḍighi ọkpagha oghiil atum oghiil kụ rꞌoye kátelhe ghan mun aten sịphe.

¹¹Aruukughum rꞌạreghiligho kụ kẹmooghom de phọ. Ọmoogh-we phọ kạḅile ni atene de phọ ọkpagha, ịdipho ẹrol bọ kụ ọlhem mọ amiigh bọ.

¹²Ọdaam kạ́tol dị kạda de phọ, kụ abuḍiemiom mọ kọḍuaghu ni ọman.

¹³Iitoor rꞌiiḅurom kụ kesiighi sịphe arigiga rꞌạramha phọ oghoonyogh bọ, kụ asuogh eḍum rꞌaruukughum kụ ketughogh.

¹⁴Ilhom ịnam kụ ketelhe yogh ghan sịphe phọ kụ ịkaraph aruwaloor ẹemaghaghan ghan. Anonom aḍughul kạki sịphe ọwa esi ophooghian.

¹⁵Aruukughum kedoghoḍi ruutu ạbidi, edoghoḍi reghelhe eḅom, kụ ẹtol eekonom nmụny ạbidi. Ạredelhe kesoor ghan sịphe oniin atum nyoniin.

¹⁶Iḅiligha ologhi ạḍinya Ọmoogh-we phọ ẹwa ẹmiin ịdi ẹghaaph ịlo ạraraar dị repooghu. Rꞌoniin ọnyo ạbuen phọ kape dị kọ́miin, ḅịle rꞌoniin kạ́tol dị kạ́moogh ooḍumughian. Ọmoogh-we phọ mạto mọ ẹrol ịdipho; ọdi rꞌaloor kụ kaakpomoghi bịdi.

¹⁷Ọmoogh-we phọ kụ kadiemi bịdi de phọ kụ ạngo tọrobo ọnyo ạbidi bin. Bịdi kọtol sịphe oghiil atum oghiil, kụ eḍighi esi ạdol ạbidi kꞌagee-pọ.