Read abua Azaya 35 Bible Online

Azaya 35 - abua bible

Azaya 35

¹Ade ịisaar phọ kẹmoogh iboh, kụ ạsifalaway keenmenan ẹpe ẹdala phọ.

²Ade ịisaar phọ kẹmoor sụor kụ ẹlo ḍịolho iboh; kụ kẹnighe ịdipho ạraaḅaraph phọ ạLebanon, kụ ẹmoogh ẹnuum ịdipho iizo ạKarmel rꞌaSaron. Tọrobo oye kạmiin ni eegu Ọmoogh-we phọ, ạmiin igbogh rꞌịikpo phọ ọdi.

³Ịngo ịnyaam rạghaagh dị medugh rꞌaruukum dị repiigha kụ mẹkporokporo.

⁴Ịḅeni tọrobo oye lọ ologhi maḅonyonu mọ, “Ịkparami loor kụ kékiilaan! Ẹnaan retu ni ọtagharan anyina, retu ni ọliom ạbumulogh-ḍien anyina.”

⁵Awe ikpom ariḍien kọmiin ni eten kụ ạbuḅaaghaph ḅạaghaph kọnaghan ni ḍụghum.

⁶Ạrukugha kopeleghu ni ọker ịḅa kụ arokpom ọka kọlo ḍịolho iboh. Ạmuum arokol kakilogh ni ạḅeeny de ịisaar;

⁷kụ ịghologhol ịisaar keten ighool kụ ạruunu adir emuza de dị ẹgharaghar. Riisi dị asuogh eḍum kụ erugh ghan; ạroogho ọposo rꞌikpu kụ kesi.

⁸Ogbogh oḅodo kụ katen sịphe, dị oghol mọ “Eten Aruukuan.” Oḍighinom ịkaraph kátelhe oḅodo phọ ọpo rꞌamem; ạbuo arolologhi kọ́tol dị kookeleghi bụphe kotelhe bọ oḅodo phọ.

⁹Ạnam-dịka sịphe kẹ́tol; ilhom ịnam kételhe eten phọ ẹpe. Bụphe Ọmoogh-we phọ mạtagharan bọ kụ kotelhe oḅodo phọ ọpo osi otu.

¹⁰Bịdi kosi Jeruselem rꞌiboh, kụ ọmoor sụor ọyughuron iboh. Bịdi kọmoogh ọḅaal ologhi kꞌagee-pọ; kꞌagee-pọ okururu rꞌamukum ologhi kạ́tolonaan mun.