Read abua Azaya 36 Bible Online

Azaya 36 - abua bible

Azaya 36

¹Ẹman bọ ḍioph rꞌinya ạsia ạHezekaya aḍighi bọ ọdaam mọ aJuda bịn ạSenakerib ogbogh ọdaam mọ Asiria ạghi azuom ẹgham oomo ạramha phọ aJuda ẹmoogh bọ ni riisi ẹkpar ạsighiogh ạmooghom.

²Kụ ọdi ạto ạḅeni uwo ẹmhu ọnyo oḍighi ọdi mọ ạpham ḍita awe ẹgham ạḍua Lakis asi Jeruselem, kụ ạkpaariom mọ ạHezekaya ọdaam mọ aphoophe rạghaagh. Uwo ẹmhu ọnyo oḍighi phọ ạghi ni ạrol eten dị etuman esi phọ ạbuloom arukpe phọ oḍighi ghan bọ oḍighi sịphe ọgbal ebiḍiph phọ ạmuum mọ rakil ghan bọ kasoor ẹsiinyom ạḍighaagh phọ.

³Ịraar awe aJuda umite ni ọteeny nyọdi: Ẹliakim ọony ạHilkaya ọnyo oḍighi phọ rapogh ghan bọ ogiga ọdaam mọ; Sebna ọgeeghiom sịphe ogiga ọdaam mọ; rꞌaJoa ọony Asaf ọnyo oḍighi phọ rasereghi ghan bọ ịgeeghi ịlo oomo ịpe emiteghu bọ.

⁴Uwo ẹmhu ọnyo oḍighi Asiria phọ ạḅeni bịdi: “Ogbogh ọdaam mọ rạwa olegheri ịyaar phọ eḍighi bọ kụ oḅio ạHezekaya ạkpar bọ.

⁵Ịḅeni nyọdi mọ, ‘Nạ ragbi mọ ikpo ọnhu ketue ni ẹsighe esi ẹmaar ẹgham rꞌẹnyaam ḍụghum? Ạnhian kụ ẹdi nạ ạatughian mọ kạtol ọman ạna ọḅaar ẹmhu esi Asiria?

⁶Nạ aḍuom ologhi Ijipt kụ ọphel ạna, kụ ịpe kẹkigh ọsighe ọokpo ikpu kụ otene ịkpara orelhiom — kabunaan bịn agim ḍịghaagh ạna. Ịduon phọ kụ ẹdi ọdaam mọ Ijipt ạrol mem lọ oye aḍuom nyọdi ologhi.’”

⁷Uwo ẹmhu ọnyo oḍighi Asiria phọ ạḅile ạghaaph mọ, “Kụ eru mạar dị nyina ịḅeni ịmi mọ nyina eḍuom ologhi Ọmoogh-we Ẹnaan phọ anyina, ọpo phọ kụ kọ́di ạHezekaya ạphueghiom rubughotu phọ, aroḅologhi bọ oomo arenmeny ạrikia phọ, kụ ạḅeni bọ mọ aweye aJuda rꞌaJeruselem ọoḅereghi ghan eniin esi bịn?

⁸Mị kạkaaphan rꞌạna akol ḍien ogbogh ọdaam mọ. Mị kạngo nyịna ịyal ọonir ạrusu eḍighi ịyaar dị nạ katue ni amitiom bụdi kokiilom ghan.

⁹Nạ óolheeny ghạlamo rꞌọkar ọbam ọnyo oḍighi Asiria kụ nạ rạḅem ghan mọ awe Ijipt oruomaan nyịna rughuugh-ẹgham rꞌạbudi kọtol ọman ạrusu kụ obe.

¹⁰Nạ ragbi mọ mị mazuom ni ẹgham eelhe phọ ạkpar apu dị Ọmoogh-we phọ kụ ḍịghaagh ụ́logh? Ọmoogh-we phọ rꞌaloor kụ ụḅeni ni ịmi mọ mị uzuom ẹgham eelhe phọ upiemi.”

¹¹Kụ Ẹliakim, Sebna rꞌaJoa ụḅeni ni oye ọnyo oḍighi phọ mọ, “Seseeny ḅạ ghan ọnhu Aramaik ụḅeni iyoor. Yoor ọnaghan ni. Kạ́ḅa ghan ọnhu aHibru. Oomo awe phọ odi bọ sịphe iikpe phọ oler ri rụru rọnaghan.”

¹²Ọdi ạphagharanaan mọ, “Nạ ragbi mọ nạ rꞌọde-otu phọ ạna bịn kụ bụdi ogbogh ọdaam mọ urom bọ ịmi oru ọḅaanaan phọ ḍụghum? Eeye, mị ạḅile ni rạkaaphan we phọ odi bọ sịphe iikpe phọ, bụdi kole rịir ạbidi kụ ọpughol munum ạbidi, ịdipho nạ kẹn kaḍighi bọ.”

¹³Kụ ọnyo oḍighi phọ ạmeera kụ ạlho ạghiom ạnyu ọnhu aHibru mọ, “Iler rụru ẹnaghanan ịpe ogbogh ọdaam mọ, ọdaam mọ Asiria, rịḅeni bọ inyina.

¹⁴Ọdi ịphur inyina rụru mọ kémeera Hẹzekaya iikeleghi inyina. ẠHezekaya kátue ịphel inyina.

¹⁵Kụ kémeera ọdi ịkpaariom inyina oḍuom ologhi Ọmoogh-we phọ. Kéḍuom ologhi mọ Ọmoogh-we phọ kịphel li inyina, ḅịle mọ ọdi katue ni asophoghom we ẹgham Asiria phọ ayoor ọsighe ẹmha phọ anyina ọmoogh.

¹⁶Kẹ́naghanan Hẹzekaya! Ogbogh ọdaam mọ Asiria ạto rịḅeni inyina mọ imite sịphe ẹmha phọ ephoophe rạghaagh. Komeera ni oomo anyina elhe iimuma avain rꞌạfig anyina kụ ẹphughol mụum asighuḍia anyina —

¹⁷tụtu ogbogh ọdaam mọ ịngo inyina eelhe ọrol dị kẹkigh nyẹpe anyina, esi dị iizo avain ediighi ọngo anyina miim, kụ ịbiakpa edi oḍighinom ạbred.

¹⁸Kémeera ạHezekaya ibi inyina ọotughian mọ Ọmoogh-we phọ kịtagharan ni inyina. Ịkaaneen ạrumugh ịnon areelhe irue ni ẹphel rạmha ạbidi ẹsighe ḍịghaagh ogbogh ọdaam mọ Asiria ḍụghum?

¹⁹Ạrumugh phọ ạHamat rꞌApad edi ẹghen nyịidipho? Ạrumugh aSefaavaim edi ẹghen? Ẹmugh edi ni dị ẹphel Sameria ḍụghum?

²⁰Puramem kụ ẹdi ạrumugh oomo ạramha phọ ịphen ẹphel rạmha ạbidi ẹsighe ḍịghaagh ogbogh ọdaam mọ ayoor ḍụghum? Ika kụ ịdi nyina regbi bọ mọ Ọmoogh-we phọ katue ni ạpel Jeruselem ạsighe ḍịghaagh ọdi phọ?”

²¹Kụ awe phọ oḅoroghian bịn nam, ịdipho ạHezekaya ọdaam mọ mạḅeni bọ bịdi; bịdi ịyaar ụ́ḅem.

²²Kụ Ẹliakim, Sebna rꞌaJoa ọphanyi rụsuoma ạbidi loor ọto kụ ọghi ọteeny Hẹzekaya kụ ọḅeni nyọdi oomo ịpe ọnyo oḍighi Asiria phọ ạghaaph bọ.